Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso .Imajen/Joanico de Araújo.

DILI, 30 maiu 2022 (TATOLI)–Prezidente repúblika, José Ramos Horta, indika Gaspar Afonso Soares hanesan Ema ho Defisiénsia (RhD) dahuluk ne’ebé sai asesór prinsipál ba Xefe Estadu iha Palásiu Prezidensiál durante tinan lima nia laran.

Notísia Relevante: “Nehek De’it Bele Buka Hahán Ba Feen no Oan, Tansá Ita Labele”

Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso Soares, hateten Prezidente Repúblika fó konfiansa ida-ne’e ba nia no nia sei hahú hala’o ninia knar hanesan asesór prinsipál iha kuarta (01 juñu 2022).

“Obejtivu primeiru hasoru malu ho prezindete Repúblika, Jose Ramos Horta, mak atu lori ha’u-nia membru sira hodi komprimenta no fó parabéns ba Prezidente Repúblika. Depois segundu, ha’u sei mai ativa iha ne’e hahú 01 de juñu hanesan asesór prinsipál ba Prezidente Repúblika,” Gaspar Afonso hateten ba jornalista sira hafoin hasoru malu ho Xefe Estadu, iha Palásiu Prezidente Nicolau Lobato, Bairru Pite, Dili, segunda ne’e.

Hosi tinan 2002 to’o mai agora, orgaun soberania ida primeira-ves envolve direta Ema ho Defisiénsia atu fó kontribuisaun no dezenvolve ba rai ida-ne’e ba futuru.

Iha Konstituisaun RDTL, artigu 16, alinea 2, hateten katak laiha diskriminisaun ba rasa, kór, étniku, fíziku, mentál. La’os ba ko’alia karidade de’it, apoia karidade de’it, maibé la envole iha servisu públiku sira Estadu nian.

“Ho ne’e, ba oin, mídia sira hasoru ha’u karik, la’ós ona diretór ba AHDMTL, maibé sei mai hamutuk Prezidente Repúblika, durante tinan lima, sai asesór prinsipál ba asuntu sosiál nian,” Afonso hateten.

Gaspar sente orgullu tanba Prezidente Repúblika ema ida-ne’ebé mak koñesidu iha mundu, iha nia diskursu sira sempre temi dehan sei lori ema ho defisiénsia matan ida ne’ebé mak koñesidu iha Timor-Leste.

“Afinál, ha’u halo buat sira-ne’e, Ramos Horta mós akompaña hela, durante ha’u-nia luta ba ema ho defisiénsia. Ne’ebé orgullu, agradese maske eskola seidauk hotu maibé Prezidente bolu ona mai sai hanesan asesór. Ne’e la’ós tanba ha’u-nia matenek, ne’e tanba ema ho defisiénsia sira hamutuk 38.118, sira-nia lian mak ha’u mai ne’e,” nia dehan.

Iha tinan lima sai asesór la halo buat ruma, maibé bainhira iha buat ruma iha AHDMTL ninian, hosi palásiu bele interven direta ba asuntu ema ho defisiensia nomós ba vulnerabilidade sira seluk tanba asuntu ema ho defisiénsia ne’e buat ida komun inklui asuntu LGBTQ no komunidade sira seluk.

“Ha’u agradese ba Maromak tanba bele fó oportunidade ba ha’u atu servisu iha primeiru órgaun soberania iha ita-nia rain. Ne’e orgullu boot ba ha’u no ida-ne’e pasu primeiru ha’u atu hakat iha palku polítika hodi kontribui dezenvolve ba rai ida-ne’e. Rai ida-ne’e presiza ema hotu nia kontribuisaun, ema defisiensia no ema la ho defisiénsia sira-nia kontribuisaun,” nia dehan.

Nia informa, Gabriel Fonciano de Sousa ne’ebé mak sei asume nu’udár diretór interinu tranzitóriu durante tinan ida, hahú hosi 01 jullu 2022 to’o 01 jullu 2023.

“Ha’u mai ona iha palásiu, mais ha’u-nia espíritu, fuan, klamar hela nafatin iha AHDMTL atu motiva no fó korazen nafatin ha’u-nia ema sira iha ne’ebá atu nafatin hanesan ne’ebe halo krítiku iha AHDMTL, no mós iha Palásiu Prezidensiál,” nia hateten.

Ho ne’e, nia dehan, Xefe Estadu mós orienta ona ekipa ida lidera hosi Alexandrino Xavier hodi ba observa kondisaun iha AHDMTL nia fatin, tuir kompromísiu sira-ne’ebé mak antes hato’o ona iha kampaña eleitorál.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here