Mane ETV Palaban hosi sub-rejiaun Pante Makassar, kontra ESG Puinbeno hosi sub-rejiaun Oésilo. Imajen Tatoli/Abílio Elo Nini.

OÉ-CUSSE, 30 maiu  2022 (TATOLI) – Ekipa jogadór feto hosi Eskola Sekundáriu Jerál (ESG) Palaban no mane hosi Eskola Tékniku Vokasionál (ETV) Palaban, sai kampiaun ba modalidade voleiból iha kompetisaun desportu eskolár époka 2021 iha Rejiaun Administrativa Espesiál Oé-Cusse Ambeno (RAEOA).

Jogu finál ba modalidade voleiból ne’e realiza iha kampu parke desportivu 30 juñu Sikluli, iha segunda dader-ne’e, ekipa jogadór mane hosi estudante ETV Palaban kontra ekipa hosi Eskola Sekundáriu Jerál Puinbeno hodi hadau valór 25 kada set ida durante set 5.

Jogu voleiból ne’e hahú iha set dahuluk hahú manas, tanba ekipa hatudu forsa hanesan hodi gaña valór hanesan 25-25, entaun árbitru kontinua jogu ne’e atu buka ekipa ida liu, nune’e iha set primeiru, ekipa ESG Puinbeno konsege manán liu ho valór 28, tanba ekipa ETV Palaban nia valór hetan de’it 26, nune’e jogu iha menutu dahuluk set primeira lidera provizóriu hosi ESG Puinbeno ho rezultadu 28-26.

Hakat ba set daruak, ekipa hosi ETV Palaban susesu hanehan ESG Puibeno, ho valór 25, no ESG Puinbeno hetan de’it valór 15, nune’e jogu set daruak lidera provizóriu hosi ekipa ETV Palaban ho rezultadu 25-15.

Kontinua ba set terseiru, ekipa hosi ESG Puinbeno susesu manán tán ETV Palaban, ho valór 29, tanba ETV Palaban hetan de’it valór 27, nune’e jogu set terseiru lidera privizóriu hosi ekipa ESG Puinbeno ho rezultadu 29-27.

Kontinua tán ba set kuatru nian, ekipa ETV Palaban konsege manán fali ekipa ESG Puinbeno ho valór 25, tanba ESG Puinbeno hetan de’it valór 15, nune’e iha set kuartu ne’e lidera hosi ekipa ETV Palaban ho rezultadu 25-15.

Tanba ekipa rua hatudu forsa hanesan kada ekipa manán set rua-rua, entaun árbitru lori-tán ekipa rua hakat ba set ikus nian atu buka vensedór hodi hadau valór 15, valór 8 troka fatin.

Nune’e jogu iha menutu dahuluk, ekipa ETV Palaban lidera kedas ho rezultadu 8, ESG Puinbeno hetan de’it 4, nune’e árbitru foti desizaun troka fatin, maibé nafatin lidera hosi ETV Palaban, hodi manán ekipa ESG Puinbeno ho valór 15-9.

Nune’e, ekipa jogadór mane hosi ETV Palaban ofisialmente sai kampaiun iha modalidade voleiból ba desportu eskolár époka 2021, no segundu lugár hosi ESG Puinbeno, terseiru lugár hosi ESG Baqui.

Feto ESSAO sai kampiaun voleibál desportu eskolár époka 2021 iha RAEOA. Imajen Tatoli/Abílio Elo Nini.

Kona-ba feto, primeiru lugár Eskola Sekundáriu jerál Palaban, segundu lugár hosi Eskola Sekundáriu Santo António Oé-Cusse, no terseiru lugár hosi Eskola Sekundáriu Jerál Leobeno.

Hafoin jogu remata, treinadór ekipa jogadór ESG Puinbeno, Florindo da Conceição, orgullu maske lakon maibé ekipa rua hatudu jogu disiplina, laiha problema to’o termina, nu’udar treinadór, konsidera jogu ne’e hanesan amizade ida, no rekoñese katak ekipa ESG Puinbeno lakon.

“Ami lakon maibé ne’e hanesan matéria ida, sei hadi’a jogu iha futuru, liuhosi jogu ida-ne’e hanesan esperiénsia ida ba ami, atu prepara iha futuru, karik hosi ministériu kontinua tán jogu ne’e iha tinan oin mai, ami sei hadi’a ami-nia jogu ne’e,” nia katak.

Treinadór ekipa jogadór ESG Baqui, Roberto Anunu, kontente tanba autoridade kria jogu ne’e ho objetivu atu anima estudante sira, nune’e sujere ba autoridade RAEOA no Sekretaria Estadu Juventude no Desportu, atu kontinua jogu iha futuru.

Treinadór ekipa jogadór Leobeno, Luis de Jesus Mala, kontente tanba autoridade kria jogu ne’e atu anima komunidade no estudante sira, oinsá atu dezenvolve talentu juven sira nian.

Purtantu, iha desportu eskolár ba époka 2021 ne’e, realiza ba Eskola Sekundáriu Jerál hitu no Eskola Tékniku Vokasionál haat, ne’ebé eziste iha territóriu Oé-Cusse.

Jogu ba faze finál ne’e, lidera hosi árbitru Marcos Sila, asistente dahuluk Raimundu Elo no Asistente daruak António Neno.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan