OÉ-CUSSE, 30 maiu 2022 (TATOLI) – Ekipa jogadór hosi Eskola Sekundáriu Kátolika Santu António Oé-Cusse (ESSAO), sai kampiaun ba modalidade futeból iha kompetisaun desportu eskolár époka 2021 iha Rejiaun Administrativa Espesiál Oé-Cusse Ambeno (RAEOA).

Jogu finál ba modalidade futeból ne’e realiza iha kampu futeból Oébau, iha segunda loraik-ne’e, ekipa jogadór ESSAO manán liuhosi suta penalidade kontra ekipa Eskola Sekundáriu Jerál (ESG) Palaban ho rezultadu 4-3.

Jogu ne’e hahú iha primeira parte ho tempu menutu 45, ekipa rua lansa kedas kontra-atake ba malu ho idak-idak nia tékniku no tátika jogu hodi hetan vitória. Nune’e jogu to’o menutu 19, ekipa ESSAO lansa dahuluk golu ida, liuhosi jogadór Eujebio de Araújo, númeru kamizola 16.

Rezultadu ne’e halo ekipa hosi ESG Palaban hahú tensaun, konsege revolta iha menutu 29, jogadór Adérito Lasi, númeru kamizola 7 lansa golu, nune’e jogu iha primeira parte ekipa rua hatudu forsa hanesan 1-1.

Hakat fali iha segunda parte tempu hanesan menutu 45, ekipa rua nafatin iha vontade lansa kontra atake ba malu, ekipa rua jogu ho ofensivu halo bola barullu iha liña oin, hodi fó oportunidade barak ba avansadu sira lansa sutu barak, maibé guarda rede konsege salva no barak liu sai hosi guardiaun.

Ho presaun ne’e, halo jogu manas liután, to’o menutu 20, jogadór Mouzinho Afonso de Araújo, hosi ESSAO, hetan kartaun mean, tanba komete irregularidade iha kmapu laran.

Nune’e fó oportunidade ba ekipa ESG Palaban halimár fali ho jogu kalma hodi duir bola barak ba avansadu sira, atu prodús golu ba ninia avansadu, maibé defeza ESSAO metin liu, hakat ladi’ak.

Jogu kontinua la’o, ekipa rua idak-idak hatudu estratéjia hodi troka jogadór-sira, no jogu komesa rame liután tanba ekipa rua fó presaun ba malu.

Nune’e jogu segunda parte termina hodi kompletu tempu ba menutu 90, ekipa rua hatudu forsa hanesan ho rezultadu 1-1.

Tanba iha jogu primeira parte no segunda parte ekipa rua prodús rezultadu hanesan, árbitru aumenta-tán extra time ho durasaun minutu 30, kada minutu 15 troka fatin, hodi buka vensedór, maibé rezultadu mantein ho 1-1.

Nune’e árbitru sira lori-tán ekipa rua ne’e ba faze finál, liuhosi suta penalidade, kada ekipa deside jogadór na’in-lima reprezenta ekipa hodi suta penalidade. Ekipa ESSAO guarda rede hili jogadór Saturnino Mendes, no ekipa hosi ESG Palaban hili Jacob Siqui sai guarda rede.

Iha suta penalidade dahuluk, hahú hosi ekipa ESG Palaban liuhosi jogadór, Marino Taimenas (6), konsege lansa golu dahuluk, no tuir kedas ekipa ESSAO liuhosi jogadór, Alarico Mota (11), mós lansa golu, hodi hatuur rezultadu 1-1.

Tuir mai, suta penalidade daruak hosi ESG Palaban, lansa golu liuhosi jogadór, Flaviano Babis (12), no tuir kedas ekipa ESSAO liuhosi jogadór, Eujebio de Araújo (16) lansa golu, hodi muda rezultadu ba 2-2.

Hakat ba penalidade datoluk, ekipa ESG Palaban la konsege lansa golu liuhosi jogadór, António da Costa (4), hodi fó oportunidade ba ekipa ESSAO lansa golu liuhosi jogadór, Fernandino Mauputa (16), hodi rezultadu ba 3-2.

Ho rezultadu ne’e lori sorte di’ak ba ekipa ESSAO, tanba iha Penalidade dahaat, jogadór Herandino Bana Taimenas (16), hosi ESG Palaban la konsege lansa golu, hodi vontade ba jogadór António Hornai (13) hosi ESSAO lansa golu, hodi muda rezultadu sa’e ba 4-2.

Hakat ba penalidade ikus, ekipa ESG Palaban lansa golu liuhosi jogadór, Juvito Lopes (13) lansa golu, no tuir kedan ekipa ESG Palaban mós lansa golu liuhosi jogadór, Calisto Balok (15).

Nune’e jogu finál ne’e termina iha faze penalidade lidera ofisialmente hosi ekipa ESSAO ho rezultadu 4-3, hodi sai kampiaun desportu eskolár nícel ensinu sekundáriu ba époka 2021 iha RAEOA.

Ho rezultadu ne’e, treinadór ekipa jogadór hosi ESG Palaban, agradese ba Sekretáriu Estadu Juventude no Desportu, no espera desportu eskolár iha kontinuasaun atu anima estudante nivél ensinu sekundáriu sira, hodi hatudu kualidade desportu iha rejiaun ne’e.

“Lakon manán, ne’e nromál, maibé importante liu maka jogu ne’e iha nia kualidade, ami espera jogu ne’e iha kontinuasaun ba tinan oin, nune’e bele hatene no identifika estudante ne’ebé maka iha talentu di’ak bele uza atu reprezenta rejiaun ba kompete iha nivél nasionál, karik iha nivél nasionál loke desportu ba kada munisípiu,” nia orgullu.

Treinadór ekipa jogadór ESSAO, Joaquim de Andrade, agradese ba ekipa jogadór sira tanba konsege hetan vitória, maski hetan kartaun mean, maibé ekipa nafatin unidu to’o jogu remata ho rezultadu sai kampiaun.

“Ha’u apresia ho programa ida-ne’e hosi edukasaun tanba realiza desportu eskolár ne’e, atu hatene ita-nia estudante sira iha nível ensinu sekundáriu ne’ebé iha prestasaun di’ak ba modalidade desportu, nune’e ita espera iha futuru bele realiza-tán,”nia hatene.

Iha biban ne’e, Adjuntu Prezidente Autoridade RAEOA, Maximianu Neno, reprezenta prezidente autoridade RAEOA, kongratula komisaun organizadóra koopera ho seguransa PNTL realiza desportu eskolár hosi inisiu to’o enseramentu situasaun la’o ho pás no hakmatek.

Nu’udar autoridade, agradese mós ba jogadór, profesór sira tanba mai partisipa iha eventu ne’e, maske mai ho distánsia dook hosi sub-rejiaun Oésilo, Pássabe no Nítibe, hodi hatudu kualidade desportu ba modalidade, futeból, voleiból ba feto no mane inklui atletizmu ba feto no mane.

“Ha’u hakarak kongratula imi hotu, tanba ojetivu hosi programa desportu eskolár ne’e, atubele promove talentu desportu hosi estudante nível ensinu sekundáriu, nune’e bele hametin unidade pás no estabilidade iha komunidade nia leet, entre eskola-oan sira, profesór-sira no autoridade, eventu ne’e envolve eskola hotu mai hosi sub-rejiaun haat,” nia orgullu.

Fahe Prémiu ba modalidade voleiból

Prémiu ba taxa desportu eskolár ba modalidade voleiból mane hosi ETV Palaban, hosi sub-rejiaun Pante Makasar hetan $120,00. No prémiu ba ekipa primeiru lugar ba mane hosi ETV Palaban hetan $250,00 dolar, segundu lugár hosi ESG Puinbeno hosi sub-rejiaun Oésilo hetan $200,00 dolar, no terseiru lugár hosi ESG Baqui hosi sub-rejiaun Pante Makasar, hetan $100,00 dolar.

Primeiru lugár ba feto, hosi ESG Palaban hosi sub-rejiau Pante Makasar hetan $250,00 dolar, segundu lugár hosi ESSAO hetan $200,00 dolar, no terseiru lugár hosi ESG Leobeno hosi sub-rejiaun Oésilo hetan $100,00 dolar.

Prémiu ba modalidade futeból

Prémiu ba taxa desportu eskolár foti hosi ekipa ESSAO okupa primeiru lugár hamutuk $200,00 dolar, no prémiu ba jogadór-sira hetan $300,00 dolar, segundu lugár hosi ESG Palaban hetan $200,00 dolar, terseiru lugár hosi ETV Lifau hetan $100,00 dolar.

Prémiu ba modalidade atletizmu

Prémiu ba primeiru lugár kilómetru 7 ba mane hosi ESG Leobeno, sub-rejiaun oésilo hetan $200,00 dolar, no feto hosi ETV São Paulo Pássabe hetan $200,00 dolar. No prémiu ba primeiru lugár kilómetru 5 ba mane hosi ESG Leobeno hetan $150,00 dolar. No feto hosi ESG Haubeno sub-rejiaun Nítibe hetan $150,00 dolar.

Prémiu ba segundu lugár, kilómetru 7 ba mane hosi ESG Haubeno hetan $150,00 dolar, no feto mós hosi ESG Haubeno hetan $150,00 dollár. No prémiu ba segundu lugár kilómetru 5 mane, hosi ESG Baqui hetan $125,00 dolar no feto hosi ESG Leobeno hetan $125,00 dolar.

Prémiu ba terseiru lugár kilometru 7 mane, no feto inklui prémiu ba primeiru lugár ba 5 kilómetru mane, no feto komisaun suspende tanba sei mosu fallansu, nune’e tuir planu sei rezolve iha komisaun ho eskola iha loron tersa semana ne’e.

Ikusliu prémiu ba kuatru lugár kilómetru 7 mane, hosi ETV São Paulo Pássabe hetan $100,00 dolar, no feto hosi ESG Puinbeno hetan $100,00 dolar.

Jornalista: Abílio Elo Nini
Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here