Arsebispu Arkidioseze Metropolitana Dili, Don Virgílio do Carmo da Silva. Imajen Tatoli/Egas Cristóvão

DILI, 30 maiu 2022 (TATOLI)—Arsebispu Arkidioseze Metropolitana Dili, Don Virgílio do Carmo da Silva, SDB, hateten bainhira rona Amu Papa Francisco nomea nia sai kardeál dahuluk ba Uma Kreda Timor-Leste nian, nia sente hakfodak hodi kompara nia an hanesan ho Jesus bainhira reza iha jardin.

Notísia Relevante: PR Horta kongratula Don Virgílio atu sai Kardeál

Arsebispu ne’e halo konkluzaun ida katak grasa ida-ne’e hanesan rekunésimentu ida Maromak halo liuhosi Amu Papa hodi fó ba nia, maibé ida-ne’e Amu Papa fó ba igreja no sarani Timor-Leste.

“Entaun, ikus mai to’o iha konkluzaun ha’u sente katak loos Amu Papa la fó ida-ne’e ba ha’u Virgílio maibé nia fó igreja no sarani Timor-Leste. Tanba sarani no igreja Timor-Leste mak merese simu grasa ida-ne’e nu’udar rekuñesimentu ida Maromak halo liu hosi Amu Papa ninian ne’ebé halo tiha ona tinan 500 nu’udar envajelizasaun no komemorasaun restaurasaun independénsia 20 maiu dala 20,” Arsebispu Arkidioseze Metropolitana Dili, Don Virgílio do Carmo da Silva, hateten ba jornalista sira hafoin Prezidente Repúblika fó kongratulasaun ba nia iha Kámara Eklisiatika, Lecidere, segunda ne’e.

Amu salesiano ne’e haktuir, nia sente hakfodak bainhira rona desizaun ida-ne’e no nia parte la espera ho desizaun Amu Papa Francisco nian bele hili nia sai Kardeál.

“Sentimentu, tanba hau la mehi ba ida-ne’e no la buka. Tan ne’e, rona ida-ne’e, sente hakfodak. Atu dehan loloos de’it, horikalan ha’u susar atu toba, lahatene, buat ruma hosi ne’ebé derrepente de’it,” Don Virgílio espresa nia hanoin.

Antes ne’e, komunikadu imprensa ne’ebé Agência TATOLI, asesu hosi Salezianu Dom Bosco Timor-Leste, katak iha konkluzaun Regina Coeli 29 iha fulan-maiu 2022 nian, Papa Francsico anunsia naran Kardeál foun ba Santa Kreda.

Kardeál foun ne’ebé Papa Francisco hili hamutuk 21. Entre sira, ida mak Don Virgílio do Carmo da Silva ne’ebé sei sai nu’udar Kardeál dahuluk uma Kreda Timor-Leste nian.

Don Virgílio hetan nomeasaun sai bispu iha janeiru 2016 no partisipa iha Sínodu ne’ebé dedika ba joven sira iha tinan 2018. Iha tinan 2019, Papa Frnacisco nomea Don Virgílio sai Arsebispu ba Arkidioseze Metropolitana Dili nian.

Konsistóru ba kriasaun Kardeál foun sira-nian sei realiza iha loron-sábadu, 27 agostu 2022. Sira reprezenta Uma Kreda iha mundu tomak, no reflete kultura tomak ne’ebé eziste iha mundu ho ninia variedade tomak, kontestu no ministériu pastorál sira.

Tuir planu, Papa Francisco sei realiza enkontru ho ho Kardiál sira hotu iha loron 29 no 30 agostu atu reflete kona-ba Konstituisaun foun ba Cúria Roma nian, Servisu Sentrál Governu Igreja Katólika nian, nu’udar projetu sentrál Papa atuál nian.

Konstituisaun Apostólika Praedicate Evangelium” (Haklaken Evangelho, ne’ebé publika iha loron 19 marsu tinan ne’e, Papa Francisco sujere Cúria ida-ne’ebé fó atensaun maka’as ba Uma Kreda ninia moris iha mundu no iha sosiedade, rejeita atensaun espesiál ba jestaun interna asuntu Vaticano nian.

Nune’e, iha Regina Coeli ba loron 29 maiu, Papa Francisco heteten “Ita reza atu Kardeál foun sira tulun ha’u iha ha’u- nia misaun nu’udar Bispu Roma nian ba povu tomak Maromak nian.”

Koléjiu tomak Kardiál daudaun ne’e jonsiste 208 Kardeál, hosi sira 117 mak nu’udar Kardeál eleitór no 91 la’ós eleitór.

Iha loron 27 agostu ne’ebé mai númeru Kardeál sira-nian sei sa’e ba 229 Kardeál, no hosi sira 131 mak sai nu’udar Kardeál eleitór.

Hosi Kardeál foun sira-ne’e; na’in-ualu hosi Europa, neen hosi Ázia, rua hosi Áfrika, ida hosi Amérika Norte, haat hosi Amérija Sentrál no Latina Amérika nian.

Lista Kardeál foun ne’ebé Papa Francisco nomea (Kardeál Eleitór Foun tuir orden Kriasaun nian:

  1. D. Arthur Roche (Inglaterra), prefeito da Congregação para o Culto Divino e a Disciplina dos Sacramentos (Santa Sé)
  2. D. Lazzaro You Heung sik (Coreia do Sul), prefeito da Congregação para o Clero (Santa Sé)
  3. D. Fernando Vérgez Alzaga (Espanha), presidente da Comissão Pontifícia para o Estado da Cidade do Vaticano e presidente do Goveratorado do Estado da Cidade do Vaticano
  4. D. Jean-Marc Aveline (França), arcebispo de Marselha
  5. D. Peter Okpaleke (Nigéria), bispo de Ekwulobia
  6. D. Leonardo Ulrich Steiner (Brasil), arcebispo de Manaus
  7. D. Filipe Neri António Sebastião do Rosário Ferrão (Índia), arcebispo de Goa e Damão
  8. D. Mons. Robert Walter McElroy (EUA), bispo de San Diego
  9. D. Virgílio do Carmo da Silva (Timor-Leste), arcebispo de Díli
  10. D. Oscar Cantoni (Itália), bispo de Como
  11. D. Anthony Poola (Índia), bispo de Hyderabad
  12. D. Paulo Cezar Costa (Brasil), arcebispo de Brasília
  13. D. Richard Kuuia Baawobr (Gana), bispo de Wa
  14. D. William Goh Seng Chye (Singapura), arcebispo de Singapura
  15. D. Adalberto Martínez Flores (Paraguai), arcebispo de Assunção
  16. D. Giorgio Marengo (Itália), prefeito apostólico de Ulaanbaatar (Mongólia).
    Cardeal sira nebe nia otas liu 80
  17. D. Jorge Enrique Jiménez Carvajal (Colômbia), arcebispo emérito de Cartagena
  18. D. Lucas Van Looy (Bélgica), arcebispo emérito de Gent
  19. D. Mons. Arrigo Miglio(Itália),
  20. Arcebispo emérito de Cagliari
    Padre Gianfranco Ghirlanda, sj, (Itália),
  21. Professor de Teologia
    Mons. Fortunato Frezza (Itália), cónego de São Pedro

Núnee iha loron 27 agostu, Timor-Leste, Paraguai, Singapura no Mongolia sei iha reprezentante iha Koléjiu Kardeál sira nian hodi tulun Amu Papa Francisco tau matan ba Kreda iha mundu tomak.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here