Diretór Servisu Terra no Propriedade Munisípiu Bobonaro, Castro Lacu Martins. Imajen Tatoli/Sérgio da Cruz.

BOBONARO, 30 maiu 2022 (TATOLI) – Hahú hosi fulan-janeiru 2022 to’o agora Diresaun Nasionál Terra no Propriedade (DNTP) Munisípiu Bobonaro, rekolla reseita hamutuk $27,901 ba kofre estadu.

Diretór Servisu Terra no Propriedade Munisípiu Bobonaro, Castro Lacu Martins, informa taxa hirak-ne’e rekola liuhosi  sidadaun estranjeiru, liuliu xinés no barak liu kontribui hosi sidadaun timoroan ne’ebé mak durante ne’e utiliza rai no uma estadu hodi halo atividade negíosiu iha merkadu.

“Sira-ne’e balu selu paradu dezde 2016 mai to’o agora, entaun ami halo xamada liuhosi karta ofisiál ba sira, mak taxa ne’ebé sira kontribui hahú hosi janeiru to’o data iha agora ne’e hamutuk $27,901, ita hatama ba kaixa estadu,” nia informa ba Agência Tatoli, iha kna’ar-fatin, bairru Maravila, segunda ne’e.

Nia dehan, uma no rai estadu ne’e iha munisípiu Bobonaro ne’ebé sidadaun sira utiliza halo atividade negosiu mai hosi postu administratrivu Balibo, Atabae, Cailaco, Bobonaro no Maliana.

Durante ne’e diresaun sempre hakbesik ba baze halo aprosimasaun atu esklarese ba sidadaun sira kona-bá devér no direitu ba utilizasaun propriedade estadu nian.

Maibé durante ne’e sidadaun barak mak iha konsiénsia koopera ho estadu selu taxa, maibé balu parte diresaun hasai karta xamada dala tolu ona mós até agora seidauk iha kompreensaun la koopera ho estadu.

Castro fundamenta, bainhira diresaun hato’o karta xamada dala tolu mak sidadaun sira la koopera sei hasai fali karta notifikasaun bazea ba dekretu-lei númeru 19/2004 (Rejime Jurídiku Bens Imóvel: Afetasaun Ofisiál no Arrendamentu) hodi notifika durante loron 30 tenke hamamuk fatin atu fó fali sidadaun sira seluk utiliza.

Maibé hakarak kontinua sei iha oportunidade durante loron 15 sidadaun refere bele hato’o rekursu hasoru estadu  ba Ministériu Justisa.

“Ha’u-nia mensajen mak ne’e, ba oin nudar sidadaun ne’ebé di’ak ita tenke kontibui, maske $1 dolar ka $5 dolar selu nafatin atu ita rasik mak dezenvolve ita-nia rai, ita husu de’it maibé ita rasik lakohi kontibui entaun sé mak atu dezenvolve,” nia apela.

Atu kontribui ba dezenvolvimentu Timor-Leste liuhosi reseita rai laran, mak diresaun Terra no Propriedade  iha ona planu tempu badak sei sukat rai,  liuliu komunidade sira-ne’ebé hela iha uma estadu hanesan Soso, Ramaskora no Ritabou kada fulan tenke selu taxa $11.

Terra no Propriedade indentifika ona totál sidadaun Timor-oan no estranjeiru ne’ebé durante ne’e okupa proprietáriu eatadu nia hodi halo atividade negósiu no halo uma privadu maibé parte Ministériu Justisa seidauk autoriza.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here