Desportu eskolár iha RAEOA, ETV Lifau okupa terseiru lugár iha modalidade futeból. Imajen Tatoli/Abílio Elo Nini.

OÉ-CUSSE, 30 maiu 2022 (TATOLI) – Kompetisaun desportu eskolár iha jogu futeból nível ensinu sekundáriu iha Rejiaun Administrativa Espesiál Oé-Cusse Ambeno (RAEOA), ekipa jogadór hosi Eskola Tékniku Vokasionál (ETV) Lifau hosi sub-rejiaun Pante Makasar, okupa fatin datoluk hafoin manán ekipa hosi Eskola Sekundáriu Jerál (ESG) Leobeno hosi sub-rejiaun Oésilo ho rezultadu 1-0.

Jogu finál ne’e realiza iha kampu futeból Oébau, Rejiaun Administrativa Espesiál Oé-Cusse Ambeno (RAEOA), iha segunda dadeer-ne’e, ekipa jogadór hosi estudante ETV Lifau ofisiálmente sai terseiru lugár ba desportu eskolár époka 2021 nian.

Jogu ne’e hahú iha primeira parte ho durasaun menutu 30, ekipa rua lansa kedas kontra-atake ba malu ho idak-idak nia tékniku no tátika jogu hodi hetan vitóiria. Maski ekipa rua tensaun aas, maibé la rezulta golu ruma, nune’e jogu iha primeira parte ekipa rua hatudu forsa hanesan 0-0.

Hakat fali iha segunda parte tempu hanesan minutu 30, ekipa rua nafatin iha vontade lansa kontra atake ba malu, ESG Leobeno mai ho jogu ofensivu halo bola barullu iha liña oin, hodi fó oportunidade barak ba avansadu, Fredi Jeristo Colo númeru kamizola 17, no avansadu Domingos Falo, númeru 12 lansa sutu barak, maibé guarda rede konsege salva no barak liu sai hosi guardiaun.

Ho presaun ne’e, halo jogu manas liután, nune’e ekipa ETV Lifau mós halimár fali ho jogu kalma hodi duir bola barak ba avansadu sira, atu prodús golu ba ninia avansadu, maibé defeza ESG Leobeno metin liu.

Jogu kontinua la’o, ekipa rua idak-idak hatudu estratéjia hodi troka jogadór-sira, no jogu komesa rame liután tanba ekipa rua fó presaun ba malu, maibé la konsege prodús rezultadu ruma.

Ho estratéjia foun ne’e lori sorte di’ak ba ekipa ETV Lifau, tanba jogu segunda parte besik remata ona iha menutu 28 nu’udar menutu ikus nian, jogadór Zefriano Meni, númeru kamizola 3, lansa golu liuhosi, nune’e ekipa ETV Lifau, ofisialmente okupa fatin datoluk hodi terseiru lugár ba desportu eskolár poka 2021 iha RAEOA.

Ho rezultadu ne’e, treinadór ekipa jogadór hosi Eskola ETV Lifau, Camilo Saet, agradese ba Sekretáriu Estadu Juventude no Desportu, tanba realiza desportu eskolár atu anima estudante nível ensinu sekundáriu sira iha rejiaun ne’e.

“Ami espera jogu ne’e iha kontinuasaun ba tinan oin, nune’e bele hatene no identifika estudante ne’ebé maka iha talentu di’ak bele uza atu reprezenta rejiaun ba kompete iha nivél nasionál, karik iha nivél nasionál loke desportu ba kada munisípiu,” nia orgullu.

Treinadór ekipa jogadór Leobeno, Luis de Jesus Mala, kontente tanba autoridade kria jogu ne’e atu anima komunidade no estudante sira.

“Ha’u hanoin jogu ohin ne’e ekipa rua hatudu duni sira-nia forsa, ita espera jogu ne’e labele para iha tinan ne’e de’it, maibé presiza kontinuasaun, tanba atu prepara fini, liuhosi jogu ne’e, fó espíritu ba mestre sira,” nia dehan.

Desportu eskolár ba époka 2021 ne’e, realiza ba eskola sekundáriu Jerál hitu no Eskola Tékniku Vokasionál haat, ne’ebé eziste iha territóriu Oé-Cusse.

Nune’e Kompetisaun ne’e finál ba terseiru lugár ne’e, lidera hosi árbitru Candido Tefa, asistente dahuluk Rodrigo Teixeira, asistente daruak Bendito da Conceição.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan