Desportu eskolár, ESG Palaban susesu manán ESG Leobeno 1-0 iha kuartu finál. Imajen Tatoli/Abílio Elo Nini.

OÉ-CUSSE, 30 maiu 2022 (TATOLI) – Kompetisaun desportu eskolár iha jogu futeból faze kuartu finál, iha domingu ne’e, ekipa hosi Eskola Sekundáriu Jerál (ESG, sigla portugés) Palaban hosi sub-rejiaun Pante Makasar susesu manán ekipa Eskola Sekundáriu Jerál (ESG) Leobeno hosi sub-rejiaun Oésilo ho rezultadu 1-0.

Jogu kuartu finál ne’e realiza iha kampu futeból Oébau, Rejiaun Administrativa Espesiál Oé-Cusse Ambeno (RAEOA), ekipa jogadór hosi estudante ESG Palaban ofisialmente hakat ba finál sei hasoru ekipa hosi eskola Kátolika Santo António Oé-Cusse, iha segunda 30, maiu ne’e ih a kampu futeból Oébau.

Jogu ne’e hahú iha primeira parte ho tempu menutu 30, ekipa rua lansa kedas kontra atake ba malu ho idak-idak nia tékniku no tátika jogu hodi hetan vitória. Maske ekipa rua tensaun aas, maibé la rezulta golu ruma, nune’e jogu iha primeira parte ekipa hatudu forsa hanesan 0-0.

Hakat fali iha segunda parte tempu hanesan menutu 30, ekipa rua nafatin iha vontade lansa kontra atake, ESG Leobeno mai ho jogu ofensivu halo bola barullu iha liña oin, hodi fó oportunidade barak ba avansadu, Fredi Jeristo Colo númeru kamizola 17 no avansadu Domingos Falo, númeru 12 lansa sutu barak, maibé guarda rede konsege salva no barakliu sai hosi guardiaun.

Ho presaun ne’e, halo jogu manas liután, nune’e ekipa ESG Palaban mós halimar fali ho jogu kalma hodi duir bola barak ba avansadu sira, atu prodús golu ba ninia avansadu, maibé defeza ESG Leobeno metin liu, hakat ladi’ak.

Jogu kontinua la’o, ekipa rua idak-idak hatudu estratéjia hodi troka jogadór-sira, no jogu komesa rame liután tanba ekipa rua fó presaun ba malu, maibé la konsege.

Ho estrátejia foun ne’e lori sorte di’ak ba ekipa ESG Palaban, tanba jogu segunda parte besik remata ona iha menutu 29 nu’udar menutu ikus nian, jogadór Filipe Pereira, númeru kamizola 9, lansa golu liuhosi kabesada.

Nune’e ekipa ESG Palaban, ofisialmente hakat ba finál hodi hadau taxa desportu eskolár ba époka 2021, sei hasoru ekipa eskola sekundáriu Kátolika Santo António, iha segunda, 30 maiu ne’e.

Ho rezultadu ne’e, treinadór ekipa hosi ESG Palaban, José Neno, orgullu tanba ekipa rua hatudu jogu kualidade no disiplina, tanba jogu hahú to’o termina, situasaun iha kampu laran la’o ho hakmatek.

“Maibé ami sei iha oportunidade jogu ba finál, hanesan treinadór, ha’u la garante tanba jogadór-sira kolen, tanba durante loron tolu, hahú sesta, sábadu no domingu joga full, entaun ami sei prepara tuir forsa ne’ebé iha,” nia katak.

Treinadór ekipa jogadór Leobeno, Luis de Jesus Mala, kontente tanba autoridade kria jogu ne’e atu anima komunidade no estudante sira, hodi atu dezenvolve talentu joven sira-nian.

“Ha’u hanoin jogu ohin ne’e ekipa rua hatudu duni sira-nia forsa, ita espera jogu ne’e labele para iha tinan ne’e de’it, maibé persiza kontinuasaun, tanba atu prepara fini, liuhosi jogu ne’e, fó espíritu ba mestre sira, alende hala’o prosesu aprendizajen nomoos prátika liuhosi eventu desportu hanesan ne’e,” nia akresenta.

Kompetisaun jogu eskolár ne’e lidera hosi árbitru Rogrigo Teixeira, asistente dahuluk Agustinho Mota, asistente daruak Bendito da Conceição.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan