Vise Xefe Bankada Parlamentár PLP, Francisco de Vasconcelos. Imajen/ Egas Cristovao..

DILI, 30 maiu 2022 (TATOLI)—Bankada Parlamentár prontu kontribui ba diálogu ne’ebé inísia hosi Prezidente Repúblika, José Ramos Horta, tanba antes ne’e iha kompromisu eleitorál to’o simu pose nu’udar Prezidente Repúblika.

Notísia Relevante: Horta promete promove diálogu ho partidu asentu parlamentár  

Vise Bankada PLP, Francisco de Vasconcelos, hateten iha kompromisu politika, Prezidente Repúblika atuál sempre hato’o sei hala’o diálogu ho partidu sira iha asentu Parlamentár hodi hamutuk lori dezenvolvimentu nasaun ba oin, nune’e PLP prontu kontribui.

“To’o agora ami seidauk simu karta ruma hosi Prezidente Repúblika kona-ba diálogu maibé ba diálogu importante no PLP prontu kolabora ba diálogu saida de’it,” Vise Bankada PLP ne’e hateten ba Agência Tatoli iha Parlamentu Nasionál, segunda ne’e.

Tan ne’e, nia dehan,  hein de’it matéria saida mak PR bele aprezenta iha diálogu ba asuntu interrese nasionál lori dezenvolvimentu nasaun nian.

“Prezidente Repúblika simu pose jura ona sei halo knar tuir konstituisaun de’it ne’ebé agora plenária aprova lei lubuk no orsamentu, katak Parlamentu servisu la’o loos no normál hela. Tan ne’e,  Prezidente ko’alia kona-ba diálogu iha kompeténsia promove diálogu soké nia substánsia no matéra ne’e saida,” nia hateten.

Deputadu hosi bankada Governu ne’e hateten, partidu tolu ne’ebé daudaun kaer hela VIII Governu Konstitusionál ontinua sólidu no metin hodi bele implementa programa sira-ne’ebé trasa ona to’o mandatu ramata, ne’ebé hela tinan ida resin de’it ona.

“Governu plataforma tolu metin hodi implementa ba introdús programa medida foun barak iha Orsamentu Retifikativu ba rekuperasaun ekonómika. Ne’ebé asaun real oinsa orsamentu ne’ebé aloka implementa kala’e hanoin ida ne’e Prezidente Repúblika halo ida-ne’e ka lae,” nia dehan.

Tan ne’e, PR nia responsabilidade oinsá garante funsionamentu Estadu ne’ebé Parlamentu aprova orsamentu ona, Governu tenke introdús medida sira-ne’ebé trasa ona.

Xefe Bankada KKUNTO, Olinda Guterres, hateten to’o agora KKUNTO rasik seidauk simu karta ruma kona-ba diálogu ne’ebé hala’o hosi Xefe Estadu maibé bainhira iha inisiativa ruma prontu kontribui.

“Diálogu ba asuntu ba dezenvolvimentu, ami KUNTO prontu fó apoiu. Maibé, diálogu ba disolve Parlamentu Nasionál, ida-ne’e ami la aseita tanba partidu tolu iha Governu agora la’o di’ak no metin hela, no garante ukun sei to’o nia mandatu ramata,” nia dehan.

Antes ne’e, Vise Bankada Fretilin, Antóninho Bianco, hato’o katak Fretilin desde uluk prontu hala’o diálogu ho sé de’it hodi lori dezenvolvimentu nasaun ba oin katak “Unidade Asaun no Progresu, Hamutuk Ita Bele”.

“Tanba ne’e, diálogu ne’ebé Prezidente hakarak hala’o buat ne’ebé di’akFretilin desde uluk to’o mai agora prontu hamutuk hala’o diálogu maibé diálogu la’os atu disolve Parlamentu ne’e ita la konkorda” Nia afirma

Nune’e mós, Xefe Bankada CNRT, Duarte Nunes, konfirma to’o agora seidauk simu karta ruma hosi Xefe Estadu atuál kona-ba diálogu, nune’e se iha diálogumak CNRT  prontu fó opiniaun bainhira iha inisiativa.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here