Mariano Assanami Sabino. Imajen/Antonio Goncalves.

DILI, 30 maiu (2022)—Timor-Leste foin lalais selebra tinan 20 restaurasaun independénsia, dezafiu no oportunidade lubuk ne’ebé sai sasukat ba susesu iha dezenvolvimentu nasionál, nune’e tempu ona Estadu Timor-Leste investe ona iha setór produtivu-sira.

Atu hatene kle’an kona-ba Partidu Demokrátiku (PD) nia pontu situasaun ba konseitu dezenvolvimentu Timor-Leste ho baze ba PEDN, jornalista Agência TATOLI halo entrevista eskluziva ho Prezidente PD, Mariano “Assanami” Sabino, iha nia kna’ar fatin Kolmera, foin lalais ne’e.

Durante ita nia ukun-án to’o tinan 20 ne’e, haree ba dezenvolvimentu nasionál iha setór hotu tuir duni ona espetativa ne’ebé elebora iha PEDN ka presiza konseitu dezenvolvimentu seluk, oinsa ita bo’ot nia hanoin?

Iha tinan 2002, ita hahú harii Asembleia Konstituante hodi hamosu konstituisaun ne’ebé mak sai  baze aliserse ba Estadu Timor-Leste no aliserse ba ukun nian, ita hamosu tiha Konstituisaun iha momentu  ne’ebé hahú kedan harii mós instituisaun demokrátika sira.

Nune’e, prosesu dezenvolvimentu ita haree fazeadamente tanba prosesu dezenvolvimentu iha karakter tolu hanesan peace building, nation building, state building ho character building.

PEDN atu Governu haree investimentu nu’udar estratéjia ka dalan ne’ebé di’ak atu rezolve problema infraestrutura, problema kapasidade no sira seluk. Objetívu estratéjia ida ne’e atu fó kondisaun ne’ebe di’ak hodi kria setór privadu ne’ebe forsa. Kritikalmente, ida ne’e sei depende ba prioridade no kualidade investimentu, maibé mós depende ba kapasidade ne’ebé inklusivu inklui makro-ekonomiku no admistrativu.

Husu ba atu hamutuk haree hikas fali PEDN katak saida mak sei kuran no konsisténsia implementasaun atu kada tinan bele avalia progresu no dezáfiu iha área infraestrutura, dezenvolvimentu ekonómiku no indústrializasaun ne’ebé foku ba rendimentu Estadu tuir indikadór ne’ebé maka iha planu estratéjiku ne’e rasik.

Oinsá ho implementasaun PEDN 2011-2030 ho nian susesu no dezáfiu sira?

Konseitu dezenvolvimentu mak harii ekonomia hosi baze mai to’o nasionál liuhosi harii infraestrutura bázika hosi baze, hakarak harii administrasaun hosi baze. Tanba PD nian konsentrasaun dezenvolvimentu ne’e ba ema maka sai alvu importante.

Ita atu harii nasaun ida forte ne’e tenke harii aliserse ne’e hosi baze, tanba hahú hosi hosi baze ita sei halo mudansa lubuk ida, liuliu hamosu kreatividade, hamosu indústria ki’ik ne’ebé mosu aliserse ekonomia hosi kraik mai nasionál ho forte.

Tanba envolvimentu povu tomak iha setór dezenvolvimentu ne’e importante, nune’e durante PD nia ukun iha governasaun konsege hamosu konseitu PNDS, PDID, PIDD no buat lubuk ida ne’ebé maka reforsa ba elementu iha suku sira.

PD luta ba poder lokál atu transfere ukun ne’e to’o iha kraik, dezenvolvimentu to’o iha kraik, desizaun polítiku ne’e tenke iha kraik ne’eba. Tanba konseitu iha PEDN “ita ne’e hun ida, abut ida povu ida”.

Tempu ona atu moderniza setór agrikultura, peska no indústria kiik-oan sira ne’e hanesan sasán nesesidade bázika tenke hahú hanoin atu prodús rasik.

Ba konseitu ida dehan ukun rasik-aan ne’e katak iha setór ekonómia, sosiál, edukasaun no seluk tan tenke hamriik ona iha ita nia ain-leten rasik. Tanba refleta ba elementu tolu ne’ebé maka define kona-ba nasaun soberanu mak polítikamente no ekonomikamente soberanu.

Interpretasaun publiku ba implementasaun PEDN ne’e hatudu progresu iha planu eletrifikasaun nasionál. Oinsá setór sira seluk?

Ita tarde tebe-tebes tanba iha PEDN ne’e elementu infraestrutura importante liu maka eletrisidade, bee moos, estrada, portu no aeroportu, maibé ita iha problema boot ho bee moos, nune’e tenke investe atu halo barajen hodi rai bee ba ema, ai-horis no balada tanba bee ne’e fó enérjia ba iha planeta.

Loos duni eletrifikasaun ita konsege la’o, maibé ne’e mós foin atinje 80%, hanesan ne’e restu hanesan aldeia seidauk hetan.

Kona-ba estrada no ponte fahe ba kategoria nasionál, munisipál no rurál, maibé iha progresu di’ak tebes iha estrada nasionál, estrada rejionál komesa daudaun ona, maibé estrada rurál lubuk ida mak seidauk konsege finaliza no balu barak mós seidauk asesu estrada.

Dezenvolvimentu aeroportu tarde, maski konsege konstrui ona aeroportu ida Kovalima no Rejiaun Administrativu Espesiál Oekusi no Ambenu (RAOEA), maibé ninian utilidade ladun efetivu hodi hatama reseita.

Rekursu umanu mak sai sentru ba dezenvolvimentu, maibé hasoru hela dezáfiu boot tanba la konsege kria kampu traballu ba joven sira atu hetan osan liuliu hasa’e rendimentu atu kontribui kombate má nutrisaun liuliu kombate ki’ak no mukit iha Timor-Leste.

Tuir ita boot hanesan lideransa partidu alternativu iha Timor-Leste, polítiku urjente saida maka ita Timor-Leste presiza hodi kombate ki’ak no mukit?

Atu hamenus kiak no mukit iha Timor-Leste, dahuluk tenke konsentra maka’as iha elementu tolu importante hanesan bee, loron-matan no rai, katak tempu ona investe maka’as iha setór produtivu sira liuliu setór agrikultura no peska.

Ba oin, Governu tenke halo investimentu ba barajen atu rai udan-bee hodi utiliza másimu iha setór agrikultura no peska hodi promove ai-han sustentavél sira hodi labele dependente liu ba foos ka nesesidade bázika importasaun, no hasa’e ai-han nutritivu hodi kombate mós má- nutrisaun iha Timor-Leste.

Presiza investe mós iha setór edukasaun no saúde, tanba setór ne’e baze fundamentál ba sustetabilidade nasaun ne’e iha futuru.

Governu mós tenke investe ona iha setór turizmu istóriku, relijiaun ekolójiku tasi no foho, ai-laran liuliu área protejidu sira hanesan Nino Konis Santana atu bele hetan reseita hosi ne’e.

Bele esplika konseitu ida ne’ebé dala-wain deklara dezenvolvimentu tenke hahú hosi baze, haree ba realidade to’o agora dezenvolvimentu hahú hosi baze ona?

Ita hahú ona ho desentralizasaun, maibé ita halo falla uituan tanba ita kontinua adopta administrasaun antigu liuliu iha kolonialistania-tempu, nune’e dezevolvimentu ba aldeia no suku sira hamosu fali diskriminasaun, liuliu ema balun hetan bee moos no balun la-hetan inklui estrada no eletrisidade.

Tanba ne’e, PD hanoin presiza desentraliza hela podér-lokál, ne’ebé ita sei hili prezidente munisípiu sira ne’e lidera direita asembleia munisipál sira atu haree ida ne’e.

Maibé, kuandu ita hamosu supra estrutura polítika ita mós tenke hamosu kreatividade ekonomia, tanba laiha supra estrutura ne’e sai fali gasta osan Estadu barak liu, maibé la hamosu kreatividade, la hamosu impaktu ne’ebé pozitivu direta ba povu. Ho konseitu importante ida katak: “Dignifika Povu Maubere, Dignifika Estudante sira, Dignifika Timoroan hotu”.

Tuir ita bo’ot nian observasaun ba prinsípiu ne’ebé define iha PEDN liuliu inkluzividade, boa governasaun no trasparánsia no tau ema iha sentru ba dezenvolvimentu oinsá?  

Kona-ba transparánsia no boa Governasaun ita halo ona regulamentu balun ne’ebé tuir padraun transparánsia internasionál liuhosi estabelesementu Komisaun Anti Korrupsaun (KAK), Provedória Direitu Umanu no Justisa (PDHJ, sigla Portugés), Tribunál Contas.

Governasaun nakloke mak sei hasoru dezáfiu boot tanba partidu ne’ebé vensedór iha eleisaun mak buka nia ema no kompañia hodi fó serbisu no projetu, maibé partidu ne’ebé la manán tenke sai vítima.

Maski, iha ona lei no regra, maibé presiza implementasaun sériu no konsistente, hafoin iha boa governasaun. Bainhira halo diskriminasaun governasaun labele la’o di’ak tanba “Ita la tau ema tuir sira nia kapasidade teknokrátiku tuir nia fatin loloos”.

Nune’e, durante tinan 20 ne’e  presiza partidu polítiku sira, líder sira,  mate restu sira ne’ebé kaer nasaun ne’e tenke refleta ona hadi’a-án agora tanba lae iha kampaña polítika hakarak manán eleisaun atu halo buat hotu, maibé populasaun sei hasoru injustisa iha setór sosiál, ekonomia no polítika.

Nune’e, presiza duni hametin unidade nasionál liuhosi dalan diálogu hodi hapara impase polítika  tanba taka malu, satán malu, hatun malu ne’e laiha hanoin pozitivu ne’ebé hakarak aseleira dezenvolvimentu iha país ne’e.

Ita orgullu ho buat ne’ebé ita halo dadauk, maibé ita labele dehan susesu ona divia ita susesu liu ida ne’e, bainhira “Ita hatene rekoñese malu, tau enerjia hamutuk,  soe tempu hamutuk atu timor ne’e forte la’o ba oin”.

Ita boot nia haree presiza investimentu oinsá atu Timor-Leste labele dependensia ba produtu importasaun hanesan ai-han no nesesidade bázika?

Dezenvolvimentu infraestrutura ba setór agrikultura, peska, pekuária no turizmu, tanba kuandu infrastrutura ita harii hotu ona nian previsaun ne’e Timor-Leste sei garante seguransa ai-han.

Maibé, Governu mós presiza transforma moderniza ona setór agrikultura atu labele hein de’it tempu udan mak povu agrikultór halo toos no natar, maibé tenke hanoin atu iha bai-loron naruk moos produsaun agrikola no ortikultura la’o nafatin.

Iha Planu Estratéjiku Dezenvolvimentu Nasionál rasik kria ona prioridade ba setór agrikultura, maibé governu la tau osan ne’e oinsá mak nia implementa kada tinan tanba orsamentu ki’ik  liu. Nune’e ita la dezenvolve buat ida foku importante para atu reforsa setór agrikultura no peska.

Ita iha tasi ne’ebé pontesiál, nune’e tenke hahú hanoin atu halo investimentu ba asegura riku-soin iha tasi laran no estabelese fabrika prosesaun ikan sira tanba ema ilegál sira sei kontinua na’ok ita nia ikan.

PD iha nia konseitu ida kona-ba sidade peska oinsá nia implementasaun?

Sidade peska ne’e konseitu ida ne’ebé harakrak hamosu autoridade peska ne’ebé governu mak regula iha jestór ho nia autór sira mak kompañia ka kooperativa boot sira atu jere peskadór hodi halo peska iha Tasi Timór hodi prosesa ba indústria no faan direta.

Konseitu ne’e halo kontajen didiak ne’e tinan tolu de’it nia hatama rendimentu boot ona ba Estadu no momentu ne’e ha’u aprezenta duni tiha, maibé hafoin governu ida tuir mai ita la konsege implementa.

Konsetu ne’e liga ba tasi-Timór ne’ebé dala tolu boot liu rai-maran, nune’e sidade peska ne’e importante tebes atu haree, maibé ne’e tenke ho oklu ida integradu. Integradu katak tenke iha komponente aeru no komponente navál ne’ebé forte atu kontrolu ita nian tasi no tenke organaniza peskadór ne’ebé profisionál liuhosi formasaun ina nasaun dezenvolvidu sira.

Produtu tasi ne’e bele hamenus no kombate má nutrisaun lalais de’it tanba uma-kain hotu hanesan planu ne’ebé maka iha Konsellu Nasionál Seguransa no Soberania Ai-han no Nasionál ne’e tuir padraun ida 60% kada uma-kain konsumu produtu mai hosi tasi no 40% mai hosi rai-maran lalais kombate má nutrisaun no forma labarik sira sai matenek.

Mensajen saida maka PD fó ba sidadaun hodi kontinua iha esperansa hodi hametin unidade nasionál liuliu estabilidade no pás hodi kontribui ba dezenvolvimentu?

Ba joven sira liuliu ba alin sira kada jerasaun nian tenke iha responsablidade rasik, jerasaun 75 sira proklama independensia, hafoin inimigu tama ho luta naruk konsege liberta pátria. Nune’e jerasaun tuir mai tenke hamutuk liberta povu.

Iha restaurasaun independénsia dala-20, maibé ita hamutuk halo reflesaun klean hodi hametin unidade nasionál atu maski iha dezáfiu barak maibé esforsu  no fiar imi hotu ho asuwain nia-oan ita tenke nafatin ho ispiritu luta para atu fó kontinuidade ba rai ida ne’e ba oin hodi liberta povu hosi ki’ak no mukit.

Parabéns ba ita hotu, maibé tinan 20 mós iha dezáfiu ba ita hotu katak Timor-Leste tenke ba oin ho forte atu sai nasaun ida ne’ebé kompetetivu ho rai sira seluk tanba razaun ukun rasik-án.  Ita hamutuk tau ita nian mehi, ita-nian forsa, ita-nian ambisaun ita tenke la’o ba oin  no PD loke liman ba joven sira hamutuk fó liman ba malu la’o ba oin.

Jornalista  : Natalino Costa

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here