Diretór Ezekutivu Asian Justice and Rights (AJAR), José Luis Oliveira. Imajen Tatoli/Francisco Sony.

DILI, 27 maiu 2022 (TATOLI)—Diretór Ezekutivu Asia Justice and Rigths (AJAR), José Luis de Oliveira, hateten iha tinan 20 Timor-Leste ukun an ne’e Governu nia dezempeñu to’o iha ne’ebé ona, nune’e tempu ona atu halo mudansa ne’ebé signifikante tanba infelizmente ema barak liu-liu feto no labarik feto seidauk sente livre hosi violénsia.

Notísia Relevante: Peskiza kona-ba violénsia hasoru feto, AJAR deskobre pontu importante 10

Tanba ne’e, nia husu husu ba polítika na’in sira atu hadi’a no mellora polítika hodi asegura feto no labarik feto mós bele goza sira-nia liberdade iha loron restaurasaun independénsia Timor-Leste bad ala-XX (20 maiu 2022-20 maiu 2022) ne’e.

“Ba feto no labarik feto sira; Ita-boot sira iha direitu no liberdade ne’e ita-booot sira hetan bainhira ita-boot sira konkista signifika ita-boot sira tenke luta. Primeiru, ita-boot sira tenke hahú kedas hosi ita-boot sira-nia an rasik bainhira akontese violénsia. Labele nonook maibé tenke ko’alia sai. Dala barak família rasik halo presaun maibé tenke hahú, entaun esforsu sira-ne’e sai hotu mak ita bele dehan “Lae ba violénsia”,” José Luis de Oliveira hateten.

Kestaun ne’e hato’o hosi Diretór Ezekutivu Asia Justice and Rigths (AJAR), José Luis de Oliveira, ba jornalista Agência Tatoli, Osória Marques, liuhosi entrevista eskluzivu ne’ebé hala’o iha nia knar fatin, Palapsu, Dili, tersa (10 maiu 2022).

AJAR nia knar prinsipál mak promove akumtabilidade ba direitu umanu nomós luta ba violasaun direitu umanu hasoru feto no labarik feto. Iha komemorasaun loron restaurasaun independénsia ba dala=XX ne’e, oinsá AJAR nia reflesaun ba direitu umanu liu-liu ba violasaun hasoru feto no labarik feto iha Timor-Leste?

Ami-nia knaar loloos mak promove akuntanbilidade ba direitu umanu. Ha’u ko’alia direitu umanu tanba ita-nia Estadu adota injustisa barak, maibé tanba dala barak prátika la halo tuir saida mak iha entaun ami fokus ba ida-ne’e. Nune’e, ita-nia Estadu iha responsabilidade ba direitu umanu no seluk mak luta ba kombate impunidade.

Partikularmente atu ko’alia kona-ba direitu feto no labarik feto, durante ami eziste, ami la espesifiku liu ba direitu feto nian maibé ami servisu ba direitu umanu. Maibé ami servisu halo parseria ho organizasaun ne’ebé servisu ba violasaun hasoru feto no labarik feto sira. Dala barak, ami haree liu ba direitu feto ne’ebé sai vítima iha tempu pasadu (1974-1999) tanba ami organizasaun ne’ebé servisu iha área justisa transzisaun. Justisa transzisaun katak ita iha post konflitu, ita iha problema pasadu tenke servisu hodi asegura ba futuru ne’ebé di’ak iha área justisa transzisaun nian.

Partikularmente ko’alia kona-ba direitu feto, iha 2001, ami hetan opurtunidade hosi UN Women atu kaer projetu ida kona-ba inisiativa spotlight hodi hametin kapasidade organizasaun sosiedade sivil, sira-ne’ebé servisu hamutuk hodi kombate violénisa kontra feto no labarik feto.

Entaun, ami-nia knar atu hametin sira-nia kapasidade, ami servisu ho Organizasaun Naun Governamentál (ONG) nasionál neen hanesan Fokupers, Alfela, pradet, Codiva, Mofee, RHTO ne’e organzisaun ne’ebé ko’alia kona-ba ema ho defisiénsia sira ka Raes Hadomi no Organizasaun ne’ebé servisu iha munisípiu Covalima, Bobonaro, Aileu, Ermera, Liquiça, Baucau no Viqueque depois agora iha Rejiaun Administrativa Espesiál Oé-Cusse Ambeno (RAEOA). Iha Munisípiu ualu, entaun ami servisu iha munisípiu no nasionál.

Ho total organzisaun hamutuk 23 ne’ebé durante tinan ida ami halo kapasitasaun barak-barak ba sira, avalia sira-nia servisu ne’ebé durante halo kombate ba feto no labarik feto ne’e oinsá, ami fornese kapasitasaun barak ba membru ONG sira-ne’e. Hosi projetu inisiativa spotlight ne’e, ami koko implementa buat ida ami bolu projetu pilotu iha nível suku liu-liu oinsá ONG hirak ne’e, implementa iha nível suku atividade ida atu promove feto, dezenvolve mekanizmu atu proteje feto hosi violénsia.

Partikularmente ami koordena ho xefe suku, ami-nia intensaun atu influénsia mekanizmu Programa Nasionál Dezenvolvimentu Suku (PNDS). PNDS mekanizmu ida-ne’ebé eziste (maske Governu nia programa) ne’ebé atu finansia servisu PNDS tanba durante ne’e PNDS foku de’it ba projetu fíziku. Agora, ami liuhosi PNDS ne’e koko oinsá atu influénsia PNDS para iha hamosu projetu ruma iha nível suku mak promove feto no direitu feto tanba ami haree iha lei ne’ebá katak knar xefe suku ka autoridade komunitária sira iha ne’ebá kompeténsia atu promove direitu feto, maibé iha prátika laiha projetu espesifiku no PNDS hala’o projetu kontrusaun nian de’it.

Liuhosi oportunidade ne’e, ami koko influénsia sira nune’e mós ami halo peskiza hosi suku 21, tuir loloos suku 23, maibé organizasaun rua la konsege halo. Iha peskiza ne’e ami deskobre buat ida-ké haree situasaun feto durante tinan 20 Timor-Leste restaura independénsia. Agora daudauk, servisu hela hodi lansa relatóriu ne’e, relatóriu ne’e ami sei lansa iha dia 28 maiu iha Timor Plaza.

Iha relatóriu ne’e ami tau titulu tinan 20 feto timor-oan, feto timorense kontinua luta ba liberta sira-nia an hosi violénsia sira. Hosi rezultadu peskiza ne’ebé ami halibur liuhosi workshop iha nível suku no iha ne’ebá ami deskobre parte iha Nasionál ida. Ita-nia Estadu buat barak sira halo ona, komesa hosi Konstituisaun (RDTL) garante konsagra ema nia direitu, garante feto labele hetan diskriminasaun no ita ratifika Konvensaun Planu Asaun Nasionál Kombate Violénsia Bazeia ba Jéneru ne’ebé eziste iha tinan 2017 maibé laiha prátika no hakerek de’it iha dokumentu leten.

Iha nível suku, iha área rurál, feto kontinua moris iha nakukun laran no maneira ne’ebé solusiona problema ne’e nafatin uza maneira tradisionál. Rezolve problema liuhosi nahe biti boot ne’ebé dala barak la a-favór ba vítima feto sira. Dala barak interrese mane sira-nian tanba informasaun la to’o iha nível suku no iha de’it nível Nasionál.

Entaun, dala ruma ema iha nível suku lahatene. Sira hakarak lori kazu ba oin maibé sira tauk tanba dehan selu karun no buat barak mak sira la hatene. Iha ne’e mak ami foin hatene no halo konkluzaun, depois de ukun-an ne’e, Timor-Leste restaura independénsia ba dala-XX 20 maibé ita seidauk konsege liberta ita-nia maluk feto sira hosi prátika violénsia.

Ita-boot dehan AJAR mós fó formasaun ba direitu umanu, sá formasaun mak ita-boot sira halo ba membru ONG sira terrenu?

Ami-nia projetu ne’e atu hametin kapasidade organizasaun sira-nian hodi fó ita-nia organizasaun fó fali ba ita-nia komunidade iha terrenu kona-ba enkuadramentu legál, treinu kona-ba transformasaun atetude. Transformasaun atetude ne’e ami elabora ba kestaun valór barlake nian ne’ebé manifesta hosi estrutura no relijiozu tanba dala ruma konserva violénsia tanba sira-nia doutrina, advokasia no halo peskiza asaun partisipatóriu atu oinsá hanorin kona-ba peskiza.

Maibé peskiza ne’ebé ami halo la’ós konvensionál maibé peskiza asaun partisipatóriu mak involve komunidade sira-ne’ebé sai sujeitu no objetu ba peskiza. Liuhosi métodu ne’e mak ita enkoraja ema atu brani ko’alia sai saida mak nia enfrenta. Tanba iha semana hirak liubá, ami hetan oportunidade hosi UN Woman liuhosi projetu inisiativa spothligt hodi hametin kapasidade sosiedade sira atu halo kombate violénsia hasoru feto no labarik feto.

Durante tinan ida ami halo kapasitasaun ba sira hodi servisu kombate ba violénsia hasoru feto no labarik feto mak oinsá, ikus mak ami implementa projetu pilotu iha nível suku atu organizasaun koko halo buat ruma iha nível suku mak atividade direito feto no dezenvolve mekanizmu proteje feto.

Ida-ne’e ami hakarak servisu hamutuk ho autoridade lokál mak liuhosi PNDS maibé durante ne’e Governu eziste programa PNDS maibé atividade ne’e halai liu ba fíziku maibé liuhosi PNDS ami koko atu halo influénsia liuhosi PNDS atu promove feto no labarik feto kona-ba knar no lei kona-ba autoridade lokál sira.

Nune’e, AJAR hakarak influénsia PNDS atu oinsá bele servisu hamutuk ho autoridade lokál hodi halo promosaun ba direitu feto no labarik feto. Aleinde atividade fíziku nian, nune’e mós halo peskiza iha suku sira. Projetu ida-ne’e presiza realiza tanba durante ne’e promosaun direitu feto no labarik feto iha de’it surat tahan leten no iha de’it Dili, nune’e mós laiha prátika ida.

Entaun, ho ida-ne’e ami hanoin atu halo tanba ita iha Planu Asaun Anual Kombate Violénsia Bazeia Jéneru (PAN VBJ) ne’ebé eziste iha tinan 2017 maibé laiha prátika no paradu de’it iha dokumentu leten no iha rural feto kontinua moris iha nakukun laran. Maneira ne’ebé solusiona problema ne’e nafatin uza maneira tradisionál, entaun dala barak la a-favór ba feto sira.

Iha peskiza ne’e AJAR deskobre kona-ba situasaun feto durante tinan 20 Timor-Leste restaura independénsia. Bele relata, sá rezultadu mak ita-boot sira deskobre liu-liu violasaun hasoru feto no labarik feto iha área rurál?

Iha peskiza jerál hanesan ha’u temi ne’e, deskobrementu ne’ebé ami hetan iha peskiza ne’e hamutuk 10;

Iha peskiza ne’e, AJAR deskobre pontu prinsipál 10 mak hanesan;

1) Legadu hosi violénsia pasadu, impunidade no estigma kontinua fó impaktu ba feto nian moris.

Katak feto no labarik feto hetan ona violénsia ne’ebe kruel iha kada períodu kolonializmu estranjeiru no okupasaun militár iha istória Timor. Karáteristika komun ida iha kada era mak autór mane sira (malae ka Timor) la hetan konsekuénsia ba sira-nia hahalok no laiha autoridade autoridade Estadu ne’ebé husu sira-nia responsabilidade, nune’e sira kontinua goza impunidade tomak. 

2) Feto no Labarik Feto hetan esperiénsia violénsia oin-oin iha suku 21 hotu.

Ilustrasaun. Imajen/Espesiál.

Violénsia sira-ne’ebé mosu iha suku sira-ne’e mak violénsia fízika hasoru feto no labarik feto, violénsia psikolojiku, ekonomiku no violénsia estruturál ne’ebé to’o ikus bele hamosu violénsia domestika. Kazu violénsia doméstika sira a’as iha suku. Ne’e hatudu katak feto no mane seidauk konsidera hanesan liu-liu laen baku sira-nia feen sira tanba hemu lanu hodi la hanoin kona-ba sira-nia feen ka ekonómia uma-laran. 

3) Kauza problema sai tiha ona abut ne’ebé kle’an ona.

Iha deskobrimentu ne’e, haree liu ba diskrepansia estruturál tanba kultura patriarkál ne’ebe bazea ba dominiu mane; Hametin hosi kustume, kultura tradisionál hanesan barlake; Estatutu labarik feto no feto ne’ebe kiik iha família, no resaun ekonomia; Dezempregu no ki’ak; mane la responsabiliza ba labarik sira.

Ida-ne’e signifika diskrepansia estruturál katak kultura patriarkál ne’ebé bazea ba dominiu mane ne’ebé hametin hosi kustume, kultura tradisionál, berlake, izolamentu sosiál.

Iha izolamentu sosiál ne’e mak la asesu ba edukasaun saúde reprodutiva relasiona ho sexu no oinsá komunidade konsidera vitima violénsia seksuál; menus informasaun nomós atendimentu relasiona igualdade jéneru no violénsia baze aba jéneru (VBJ); kaben sedu; labarik feto sai hosi eskola.

4) Ninia impaktu bele sente loos, maibé invisivel hosi autoridade sira.

Maiória kazu trata iha nivel primeiru hosi xefe suku ka autoridade lokál no laiha relatóriu ne’ebe konsistente hosi kazu sira-ne’e ba nivel munisipál no nasionál. Ida-ne’e hamosu trauma entre jerasionál no lakon oportunidade atu hetan edukasaun.

Ida-ne’e akontese tanba laiha sasukat no kustu adekuadu hosi impaktu violensia:

  • Vitima no sobrevivente ne’ebe lakon, labarik oan-kiak;
  • Problema ba kustu saúde fiziku no mentál ne’ebé grave;
  • Opurtunidade moris ne’ebé atrazu; kona-ba moris família iha suku.
  • Feto lakon poténsia ekonomia atu kontribui ba família, suku no dezenvolvimentu nasional.

5) Padraun ba resposta–silénsiu no porteiros maskulinu tendénsia ba apatia.

Iha deskobrimentu ida-ne’e, feto no labarik feto barak ne’ebé hetan violénsia, la hakat ba oin atu fó hatene ba ema kona-ba asuntu ne’e ka hato’o keixa ba xefe suku ka ema seluk, maibé sira nonook no la hetan apoiu hodi buka justisa, hetan presaun hosi familia atu nonook tanba mantein “naran diak“ no tauk se ko’alia bele kauza violénsia ne’ebé boot.

Tanba, nia informa, polisia no sistema legál formál dook liuhosi suku no susar atu asesu. Feto senti sei la hetan rezultadu ne’ebe justu ho lori ninia kazu ba oin, tantu ho solusaun tradisionál liuhusi kustume nomós liuhosi meiu legál formal, tanba sistema rua ne’e domina hosi mane no posivel intimida

6) Lista naruk ba obstaklu atu rezolve no prevene Violénsia Bazeia Feto no Labarik Feto.

Istória naruk periodu violénsia ekstrem ba feto no labarik feto, ho impunidade ne’ebe kuaze perfeitu ba autór sira-ne’ebe dala-barak nu’udar ajente Estadu.

Durante siklu violénsia ne’e, ema halo norma oioin ne’ebé ta’ís hosi esperiénsia ema Timor ohin loron iha komunidade nia moris.

Nune’e, ema haree nu’udar alvu violénsia ne’ebé aseitavel; vítima violénsia seksuák hetan stigma; sosiedade toman ona haree violénsia seksuál no husik hela de’it; no trauma entre jenerasaun, estigma, marjinalizasaun no exkluzaun–sosiedade ne’ebé halo estigama sobrevivente labarik violénsia seksuál.

7) Inisiativa balun pozitivu iha nível suku.

Violénsia hasoru feto no labarik feto sira akontese tanba impaktu hosi lia fetosan-umane bainhira atu hafolin feto, tanba ne’e komunidade iha suku balun iha esforsu atu hamenus prátika barlake;

Mudansa maneira familia sira prátika eransa patrilineál hodi labarik feto sira mos hetan eransa; asesu ba edukasaun ne’ebé di’ak liu ba labarik feto; inan-aman servisu makaas atu kuida sira-nia oan feto iha eskola; feto bele partisipa liu iha foti desizaun iha uma-laran.

Mudansa ne’e akontese tanba: kresimentu knar feto nu’udar membru Konsellu Suku; programa edukasaun no sensibilizasaun Organizasaun Naun Governamentál iha suku sira komesa aumenta sira-nia konsiénsia ba direitu feto no labarik feto, no igualdade jeneru; edukasaun ba asisténsia legal; iha uma mahon; no klinika saúde movel ne’ebé trata violénsia ba feto no labarik feto.

8) Haburas impunidade, habelar violénsia.

Iha Timor-Leste kultura impunidade ne’e buras hodi hamoe vitíma to’o sai nonook; menus apoiu prátiku ba feto ida-ne’ebe buka tulun; autoridade lokál ne’ebé domina hosi mane posibilita atu komplika hodi hato’o keixa ba sira; no konviksaun privadu no sosiedade katak violensia fiziku hosi mane ba sira-nia feen justifika iha situasaun balun.

Nune’e, mosu impunidade iha Justisa mós buras tanba menus apoiu ba feto atu buka justisa, sátan momentu sira hakarak halo buat ne’e; menus konsiénsia iha feto sira kona-ba lei ne’ebe proteje sira, inklui lei kontra violénsia doméstika no sira-nia direitu no prosedura legal kona-ba oinsá atu hala’o; justisa iha suku, nivel defensór maskulinu; no laiha insentiva ekonomia ba ema buka justisa.

9) Presiza iha esforsu inovativu espesiál hodi kombate impunidade legál no kulturál kona-ba violénsia hasoru feto no labarik feto iha nível baze no sosiedade.

10) Iha potensiál importante hodi empodera sobrevivente, modelu komportamentu não-violento, relata no enkamiña ba suku.

Hafoin deskobre pontu prinsipál 10 ne’e, saida mak AJAR sei halo?

Ami-nia relatóriu ne’e ami halo intensaun prosesu ida atu halo reflesaun ba entidade sira-ne’ebé mak servisu ba kombate violénsia feto no labarik feto mak rekomendasaun ne’ebé mak hato’o ba barak liu. Primeiru, ita atu fó atensaun barak liu ba hametin kapasidade autoridade komunitária sira tenke komprende lei ne’ebé mak vigora sira-ne’e, nune’e buat ruma iha nivel suku ne’e mak bele responde.

Ba parte ida-ne’e mós sai edukasaun ida ba sira, entaun ita tenke investe ba sira partikulamente iha edukasaun ba sira hodi sira bele hatene. La’ós de’it ba autoirdade maibé segundu ba komuidade enjerál liu-liu atensaun liubá parte rurál sira, sira-ne’ebé izoladu. Ida-ne’e mak ami rekomenda atu ita fó atensuan liubá iha suku sira, atu autoridade sira habelar informasaun, nune’e atu estabelese mekanizmu sira-ne’ebé ema bele komprende. Lei kona-ba autoriadade iha knar atu proteje no promove direitu feto maibé tanba laiha entidade mak tau responsabilidade ba sira.

Notísia Relevante: AJAR rekomenda SEII dezenvolve asuntu jéneru iha ministériu hotu-hotu

Durante ne’e, Ministériu Administrasaun Estatál apoiu ne’e mak iha asuntu adminitrasaun de’it. Iha Ministériu Solidariedade Sosiál, tuir loloos sira mak koordena ho buat ida rede referrál. Rede referrál mak rede ida-ne’ebé mak ajente Estadu no mós ONG sira-ne’ebé mak servisu atu responde violénsia ba feto sira. Iha fatin balun, rede referrál servisu kapaas ho autoriadade sira. Atu ko’alia loloos, iha Covalima-Suai, rede referrál servisu kapaas tebes ho xefe suku no xefe aldeia sira tanba bainhira akontese violénsia doméstika no violénsia seluk, xefe suku sira mak sai motor ba probelema ne’e. Agora iha munisípiu seluk ladún ativu.

Iha rekomendasaun prinsipál ruma ba Governu, nune’e bele hamatan ba deskobrementu hirak ne’e?

Ami la rekomenda ba Governu maibé ba ONG no ajente ka entidade ne’ebé mak durante ne’e servisu ba asuntu ne’e no asuntu ne’e tenke fó prioridade liu ba nivel suku iha laran mós iha instituisaun Governu. Ba asuntu ne’e Ministériu Administrasaun Estatál no Ministériu Solidariedade Sosiál no Inkluzaun (MSSI) tanba MSSI tuir lei, nia kontra violénsia domestika nian mak tenke koordena ho rede referrál sira.

Rede referrál iha munisípiu balun seidauk funsiona ho di’ak, efetivu to’o nivel suku no balun funsiona de’it iha munisípiu sira maibé iha suku seidauk. Rede referrál mak koordena hosi Ministériu Solidariedade Sosiál no Inkluzaun tanba iha laran iha polísia no Organizasaun Naun Govermentál (NGO) ne’ebé ba asuntu kombate violénsia.

Imajen ilustrasaun/foti hosi Google

Terseiru, ami rekomenda ba Sekretáriu Estadu Igualdade no Inkluzaun (SEII) atu dezenvolve asuntu jéneru iha ministériu hotu-hotu. Ida-ne’e ami hanoin esforsu hodi dezenvolve katak asuntu jéneru ne’e la’ós inkluzivu de’it iha SEII tanba buat ida abordajen ne’e tenke mosu iha ministériu hotu-hotu no tenke iha igualdade jéneru. Ho asuntu ne’e tenke servisu hamutuk ho Ministériu Eduksaun Juventude no Desportu (MEJD) ho Ministériu Administrasaun Estatál (MAE) liu-liu ho autoridade lokál sira hodi oinsá halo mós prevensaun no kombate violénsia hasoru feto no labarik feto nomós ba edukasaun formál iha eskola atu haburas iha igualdade jéneru no direitu umanu iha eskola sira.

Ne’eduni husu ba SEII tenke koordena hamutuk ho MEJD atu dezenvolve di’ak liután hodi prevene violénsia doméstika iha rai ida-ne’e.  Tanba dala barak, ha’u partisipa mós iha revizaun kurríkulu nota katak matéria kona-ba hanorin igualdade jéneru, seksualiedade iha kurríkulu ne’e iha, maibé ita-nia profesór sira mak lahanorin no dala ruma mós la’ós sira lakohi hanorin maibé tanba sira lahatene no dala ruma ba sira-ne’e hanesan lulik entaun sira la hanorin. Kuríkulu iha duni. Ami husu Sekretária Estadu Igualdade no Inkluzaun tenke servisu MEJD atu dezenvolve di’ak liután, nune’e bele prevene violénsia.

Só, ida-ne’e hanesan maneira ida atu kombate no prevene violénsia. Liga ho  deskobrimentu hirak-ne’e, karik AJAR hanesan parseiru Governu iha ona polítika balun atu bele kombate violasaun hasoru feto no labarik feto iha loron aban?

Ita iha Planu Asaun Nasionál Kombate Violénsia Bazeia ba jéneru, agora dauduan ne’e hosi Sekretáriu Estadu Igualdade, sé mak atu koordena ho PAN VBJ ne’e Sekretáriu Estadu Igualdade Inkluzaun mak koordena.

Agora daudaun sira halo hela revizaun ba PANVBJ ne’e kan eziste deste 2017, maibé dala barak iha entidade barak seidauk iha koñesimentu kona-ba PAN VBJ ne’e. Ne’eduni mós halo esforsu atu redús violénisa ba feto no labarik feto tanba ladun iha signifikante, ema barak lahatene. Asuntu jéneru ne’e tenke mosu iha aspetu hotu.

Iha AJAR nia deskobrimentu ne’e habiban liafuan ida “bainhira impunidade buras, violénsia mós buras”, oinsá AJAR nia prespetiva kona-ba terminolojia ida-ne’e?

Partikulamente ne’e problema kauza hosi ita-nia sistema judisiál mak seidauk solusiona ho efetivu. Dala barak defisiénsia rasik mosu tanba prosesu dala ruma naruk maibé dala barak mosu tanba autór judisiáriu sira mós seidauk iha koñesimentu natoon kona-ba prinsípiu igualdade jéneru. Dala barak judisiáriu balun sei iha bias jender.

Prosesu ne’e naruk, ha’u fó ezemplu, kazu violénsia seksuál ida akontese iha Baucau. Kazu nia prosesu ne’e la’o ba-mai, investiga depois autór tama tiha prizaun preventiva no prizaun preventiva ne’e labele liu tinan ida, maibé prosesu julgamentu la’o kleur tinan lima. Tinan lima mak depois foin hetan sentensa no desizaun final hosi tribunal. Sentensa lori ba, vítima feto ne’e sente laiha buat ida. Ida-ne’e juis ka tribunál kondena autór sala duni maibé depois tinan lima mak kondena mak vítima la sente justisa.

Entaun, ida-ne’e mak haburas impunidade violénsia iha ne’ebá. Ema hanoin prosesu julgamentu ba autór sira-ne’e lala’o efetivu, ema hanoin justisa laiha. Ho ida-ne’e violénsia buras no ema seluk halo tanba ida-ne’e ema halo tiha tama prizaun preventiva fulan neen sai fali de’it, laiha problema ida. Ne’eduni, ida-ne’e, mak ita rekomenda atu judusiál atu servisu entermu oinsá atu prosesu ne’e efetivu maibé mós sira-nia prespetiva tenke nakonu ho buat ida prinsipiu igualdade jéneru.

Durante peskiza iha suku, hosi deskobrimentu ne’e violasaun ida-ne’ebé mak aas liu-liu violasaun hasoru feto no labarik feto sira?

Purezemplu, iha Aileu, Ermera, kazu barak ne’e kazu abandonadu. Katak, katak namora depois ema fó oan tiha husik tiha de’it nune’e. Kazu ida-ne’e la’ós de’it akontese tanba joven sira barak hanesan falta de edukasaun maibé dala barak komete hosi estudante universitáriu sira.

Ezemplu, iha Aileu, ema deskobre universitáriu sira ida ba KKN ne’e ba namora no fó oan tiha bae ma-nia oan feto, fila tiha mai Dili, núemru kontaktu mós lakon, ema iha ne’ebá buka tuir nia responsabiliadade laiha. Kazu ida-ne’e iha fatin balun mós iha. Ida tán, buat ida insestu ne’e, aman ka tiun ka maun-alin rasik ba oan no labarik feto ne’e mós soke komunidade nia konsiénsia maibé dala barak ida-ne’e eziste iha Ermera.

Infelismente ami lahalo peskiza iha ne’ebá maibé kazu insestu iha Lospalos, Aileu ne’e xoke ema tanba aman halo fali ba oan.

Buat seluk ne’ebé ha’u la dekó fatin maibé violénsia ba iha namora, sei namora hela haksesuk malu buat ruma, ida-ne’e mós ema lamenta barak tanba violénsia iha namora mós komesa akontese.

Violénsia domestika hosi laen ba feen, dala barak mós kauza hosi fatór ekonomia tanba oan barak servisu laiha ka rendimentu la to’o atu sustenta, ida-ne’e mós sai fatór ida ne’ebé kontribui haburas violénsia hasoru feto no labarik feto iha Timor-Leste.

Ikus liu, hosi peskiza no deskobrementu hirak ne’e, ita-boot iha mensajen ruma ne’ebé hakarak husik hela ba Governu, feto no labarik feto sira iha Timor-Leste?

Mensajen ba Governu mak idade independénsia tinan 20 ne’e la’ós tempu ida-ne’ebé badak, tuir loloos hodi halo buat ruma ne’ebé ba komunidade, nune’e sira sente katak sira goza independénsia ne’e. Maun boot sira dehan liberta pátria no liberta povu, maibé iha independénsia tinan 20 ne’e, iha ema balun ne’ebé seidauk libertadu tanba barak sei moris terus no mukit hela.

Uluk ita-nia maun boot balun dehan ita tenke liberta pátria no liberta povu maibé ukun an tiha ita-nia maluk balun seidauk sente hetan libertadu. Tanba uluk halo violénsia ne’e hosi ema kolonialista sira maibé depois ita ukun-an tiha ita mak kontinua halo violénsia ba malu.

Tanba ne’e, tempu ona, tanba liberta ona povu mak entaun tenke liberta feto sira hosi violénsia hasoru feto no labarik feto ho forma oioin nune’e sira mós goza independénsia ne’e. Maibé ida-ne’e tempu ona ita atu refleta, ita-nia governante sira tenke halo reflesaun tanba tinan 20 ne’e la’ós tempu badak, nune’e sira tenke refleta ba sira-nia dezempeñu ne’ebé durante sira halo.

Tinan 20 ne’e Governu nia dezempeñu to’o iha ne’ebé ona, nune’e tempu ona atu halo mudansa ne’ebé signifikante. Maibé infelizmente ema barak liu-liu feto no labarik feto seidauk sente livre hosi violénsia. Tanba ne’e, husu ba polítika na’in sira atu hadi’a no mellora ita-nia polítika atu asegura katak feto no labarik feto mós bele goza sira-nia liberdade iha independénsia ba dala-XX ne’e.

Mensajen ba feto no labarik feto sira; Ita-boot sira iha direitu no liberdade ne’e ita-booot sira hetan bainhira ita-boot sira konkista signifika ita-boot sira tenke luta. Primeiru, ita-boot sira tenke hahú kedas hosi ita-boot sira-nia an rasik bainhira akontese violénsia, labele nonook, tenke ko’alia sai. Dala barak família rasik halo presaun maibé tenke hahú, entaun esforsu sira ne’e sai hotu mak ita bele dehan “Lae ba violénsia”.

Notísia Relevante: AJAR fó formasaun transformsaun atetude ba ONG

Jornalista : Osória Marques

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here