Diretór Ezekutivu Sentru Formasaun Fundasaun Hadomi Timor, Abrão Monteiro. Imajen/Esesiál.

DILI, 27 maiu 2022 (TATOLI)—Sekretáriu Estadu Juventude no Desportu (SEJD), tinan ne’e halo koolaborasaun ho Sentru Formasaun Fundasaun Hadomi Timor (SFFHT) hodi fó formasaun Internet Saudavel ba joven sira iha territóriu nasionál.

Diretór Ezekutivu Sentru Formasaun Fundasaun Hadomi Timor (SFFHT), Abrão Monteiro, esplika atividade Internet Saudavel ne’e programa anuál Sekretáriu Estadu Juventude no Desportu, ne’ebé mak koolabora ho Fundasaun Hadomi Timor no Sentru Juventude iha 13 munisípiu hodi realiza formasaun Internet Saudavel ba foinsa’e sira-ne’ebé ho idade 15 to’o 24 iha Ensinu Sekundáriu no Grupu Juventude sira.

“Objetivu hosi formasaun ne’e atu sensibiliza internet ba joven sira, nune’e sira hatene vantazen no dezvantazen hosi Internet mak ida ne’ebé,” Abrão Monteiro informa ba Agência Tatoli, via telefónika, sesta ne’e.

Formasaun ne’e, SFFHT fó ona formasaun ba joven sira iha Munisípiu Lautém, Baucau, Viqueque, Manatutu, Liquiça, Maliana, Aileu no agora halo hela formasaun iha Manufahi-Same tanba SEJD fó formasaun ne’e tenke fó hanesan ba joven sira iha territóriu nasionál hodi la deskrimina joven sira liuhosi formasaun.

Iha munisípiu 13 ne’e, kada munisípiu iha partisipante hamutuk na’in-66, ne’ebé mai hosi Eskola Sekundáriu no Grupu Juventude diferensa ne’ebé eziste iha kada munisípiu.

“Balun mai hosi Juventude Crúz Vermelha, Ensinu Sekundáriu Jerál, Ensinu Sekundáriu Katólika no balun mai hosi Ensinu Sekundáriu Tékniku Vokasionál sira,” nia dehan.

Matéria ne’ebé SFFHT fó partisipante sira mak dijitál komunikasaun no informasaun, no ko’alia kona-ba dadus teknolojia ka dadus utilizasaun internet, oinsá atu bele uza google meet, google drive, oinsa atu bele jere pájina facebook, oinsá atu bele kria no jere konta kanál youtube no oinsá atu kria no públika informasaun iha blogspot.

Tuir nia, Sentru Formasaun Fundasaun Hadomi Timor fó matéria sira-ne’e atu foinsa’e sira iha koñesimentu utiliza plataforma sira-ne’ebé iha internet, nune’e sira labele utiliza sala.

“Ita hatudu ba sira vantazen boot hosi Internet mak liuhosi aplikasaun sira-ne’e no aplikasaun sira ne’e bele muda ita-nia atividade lor0-loron. Tanba ne’e, ami-nia objetivu prinsipál, liu mak oinsá atu bele sensibiliza ita-nia foin-sa’e sira, atu sira hatene katak vantazen hosi internet saudavel ne’e mak ida-ne’e, hanesan uza plataforma ne’e bele ajuda ita-nia atividade loro-loron, tantu ba eskola, atividade negósiu no ba iha área servisu seluk,” nia dehan.

Formasaun Internet Saudavel ne’e kada munisípiu ho durasaun loron ida, hahú hosi dader to’o lokraik.

Formasaun ne’e apoiu hosi Sekretáriu Estadu Juventude no Desportu (SEJD) ho totál orsamentu hamutuk $13.700 ba realizasaun formasaun Internet Saudavel iha territóriu nasionál.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here