Diretór Nasionál Empregu Exteriór SEFOPE, Filomeno Soares. Imajen Tatoli/Francisco Sony

DILI, 27 maiu 2022 (TATOLI)–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE) serbisu hamutuk ho ajensia internasionál sira, hodi realiza programa reintegrasaun traballadór timor-oan sira ne’ebé antes ne’e serbisu iha Austrália no daudaun filafali mai Timor-Leste.  

Diretór Nasionál Empregu Exteriór, Filomeno Soares, hateten, programa ne’e hanesan polítika Governu liuhosi SEFOPE hodi fó hanoin ba joven timor-oan sira ne’ebé envolve-an ona iha programa mobilidade laborál serbisu iha Austrália.

“Polítika Governu atu haruka traballadór timor-oan ba serbisu iha rai-li’ur, la’ós permanente maibé ba buka osan no manán ka bele buka esperiénsia iha ema-nia rai, nune’e bainhira fila mai bele halo investimentu, hodi dezenvolve ita-nia rai liuhosi loke negósiu ruma hodi bele fó filafali serbisu ba ita-nia joven timor-oan sira ne’ebé hein hela oportunidade serbisu,” Diretór informa iha salaun STVJ Kamea, Becora, sesta ne’e.

Notísia relevante: SEFOPE inisia workshop Timor-Leste Labour Mobility Partnership

Traballadór sira ne’ebé ohin partisipa iha programa reintegrasaun traballadór hamutuk na’in-66, kompostu hosi feto 20 no mane 24.

Diretór husu ba traballadór sira, ne’ebé bá ona rai-li’ur, bainhira fila mai bele halo peskiza individuál iha idak-idak ninia munisípiu, hodi nune’e bele hamosu ideia inovativu ne’ebé merese atu implementa iha munisípiu sira.

“Tanba imi iha kapitál no hetan ona esperiénsia iha ema-nia rai atubele implementa filafali iha ita-nia nasaun, hahú ho negósiu kiik, nune’e Governu hamutuk ho parseiru sira bele buka dalan hodi fó apoiu liuhosi formasaun sira,” nia akresenta.

Programa ne’e destina ba traballadór timor-oan hotu ne’ebé ba serbisu iha rai-li’ur, maibé ohin ne’e espesífiku bá Austrália no sira seluk sei realiza iha tempu tuir mai.

Ajénsia sira ne’ebé hamutuk ho SEFOPE-DNEE realiza programam re-integrasaun ba trablladór sira ne’e mak Workforce Development Program Timor-Leste (WDPTL) no Pacific Labour Facility (PLF).

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here