ilustrasaun hemu aimoruk

DILI, 27 maiu 2022 (TATOLI)— Ministériu Saúde (MS) liuhosi Diresaun Nasionál Farmacia no Medikamentu, apela ba populasaun iha territóriu nasionál atu labele konsumu aimoruk herbál sira la ho reseita médiku tanba fó risku ba vida.

“Ami haree agora aimoruk herbál barak tama ona iha Dili no munisípiu sira. Husu ba komunidade atu labele konsumu arbiru aimoruk bainhira la tuir reseita médiku nian. Tanba Kompaña importadór hanesan HWI no K-LINK too agora seidauk rejista kualiadade aimoruk iha Ministériu Saúde, maske sira rejistu ona iha SERVE hodi iha legalidade ona halo negósiu,” Xefe Departamentu Manegementu Autorizasaun no Introdusaun Merkadoria, iha Ministériu Saúde, Teodoro Marçal de Jesus, hateten ba Agência TATOLI iha knaar fatin-Caicoli, sesta ne’e.

Nia sujere ba populasaun iha territóriu nasionál katak hakarak konsumu aimoruk tanba moras tenke ba konsulta iha postu, sentru saúde no ospitál referál inklui HNGV hafoin simu aimoruk tuir moras ne’ebé afeta.

“Tanba ita hakarak uza aimoruk ho di’ak, ita tenki konsulta ba ema ne’ebé mak iha koñesimentu kle’an kona-ba aimoruk atu nune’e labele prejudika ita-nia moris ka ita-nia saúde,” nia sujere.

Ministériu Súde liuhusi Diresaun Nasionál Farmasia no Medikamentu identifika kompaña importadór balun faan aimoruk herbál iha Timor-Leste kontinua ho meiu ilegál.

Nia esplika, Kompaña importadór aimoruk herbál HWI no K-link la rejsitu no la tama iha sistema rejistu liuliu atu kontrola kualidade aimoruk. Tanba empreza rua ne’e legal halo negósiu, maibé laiha legalidade ba kontrolu kualidade aimoruk.

Daudaun ne’e, MS rejistu de’it kompañia importadór haat mak hatama aimoruk herbál 2019 too 2022 hanesan Acibee, Melia Herbal, Propargyl SW, Herbal B.A Gomi2 Unipesoal LDA.

Kompañia importadór balun hetan sertifikadu lisensa ba negósiu hosi SERVE,I.P no hetan lisensa importadór hosi Ministériu Saúde, maibé  ladauk rejistu sira-nia produtu hodi asegura aimoruk nia kualidade. Tanba aimoruk sira ne’e barak mak halai liu ba proteina no vitámina.

Tanba ne’e, Ministériu Saúde halo ona akordu ho Autoridade Aduaneiru-Alfandega hodi tama iha Sistema Janela Unica hodi bele kontrola medikamentu sira ne’ebé empreza halo importasaun.

“Fulan-oin, ami asesu ona sistema janela úniku atubele fó informasaun ba produtu ilegál no legál hodi Alfandega bele prende hodi labele faan iha Timor-Leste,” Nia informa.

Entretantu, Klínika privadu ne’ebe seidauk submete dokumentu aplikasaun ba prosesu rejistrasaun iha Ministériu saúde mak hanesan, Xiao HU Unipessoal, Centru Supermercado LDA,  Raya Farma Lda, Aarnext Timor Farmacia, Inti Sumber Ricna,  Oceano Lda,  3D Life Science Timor Lda, Ankang Unipessoal Lda,  Fastep. Lda, Rani Auto motór.Lda,   Sales Luis Lda,  Herbal Costa Gibran 2.

Klíniku privadu sira ne’ebé rejista iha Ministériu Saúde   hamutuk kompaña ulau  hanesan  Farmasia Moris Foun, Instana Farmacia, Farmagest Colmera, Bethesda  Husada Farmasia, Farmacia Foho Osan Mean, Vintro Horas, Kura Hao, Stamford Medicál.

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here