Juventude no estudante nível sekundária Munisípiu Baucau partisipa formasaun kona-ba jornalizmu rádio hosi MAPKomS iha Vila Nova, sesta (27/05). Imajen Tatoli/Natalino Belo.

BAUCAU, 27 maiu 2022 (TATOLI) – Ministériu ba Asuntu Parlamentár no Komunikasaun Sosiál (MAPKomS) liuhosi Diresaun Nasionál Promosaun no Dezenvolvimentu Mídia Lokál (DNPDML) realiza formasaun jornalizmu rádiu ba juventude iha Baucau.

Xefe Ekipa DNPDML, Afonso Woytila Perreira, esplika, rádiu komunidade hanesan estasaun ne’ebé eziste mai hosi komunindade nune’e liuhosi formasaun kona-ba produsaun rádiu hanesan parte hosi fahe informasaun, koñesimentu ba komunidade sira liuliu juventude no estudante nune’e nu’udar kontributór informasaun iha futuru.

“Maioria juventude de’it, ne’ebé iha hanoin no hakarak partisipa atu hetan informasaun kona-ba serbisu jornalizmu nian,” Xefi Ekipa DNPDML informa ba Tatoli iha Vila Nova, sesta ne’e.

Matéria inportante hosi formasaun refere mak hanesan koñesimentu bázika kona-ba mídia, papél no funsaun jornalista, produsaun no hakerek notísia, produsaun serbisu anunsia públiku, feature rádiu no produsaun pakote dukumentáriu.

Hafoin formasaun sei koordena ho jestór hosi MAPKomS atu kontinua halo aprosimasaun ho formandu sira nune’e futuru sai nu’udar kontributór ba produsaun nune’e habarak liután programasaun rádiu iha munisípiu Baucau.

“Fó hanoin katak sira mos sai nu’udar kontributór entaun tuir buat-ne’ebé sira haree, sente no rona bele foti sai nu’udar informasaun no sai notísia nune’e publika publika liuhosi produsaun rádiu,” nia katak.

DNPDML konsidera formasaun refere hanesan fahe koñesimentu nune’e bele hakbiit liután juventude sira-nia koñesimentu no lori hatene mundu jornalizmu tanba mídia sei kontribui ba dezenvolvementu munisípiu liuhosi informasaun ba komunidade sira.

Estudante hosi Ensinu Sekundária Tékniku Informátika, Jerónimo da Costa de Carvalho, kontenti no agradese ba MAPKomS tanba liuhosi formasaun refere bele aumenta koñesimentu kona-ba mídia no jornalizmu.

“Esperiénsia ne’ebé fó bele aumenta ha’u-nia koñesimentu, hanoin no kapasidade iha futuru,” Jerónimo akresenta.

Formasaun ne’e hala’o iha Rádiu Komunidade Lian Matebean Baucau, ho durasaun loron-rua ne’ebé formandu sira mai hosi juventude no estudante nÍvel sekundária hamutuk na’in-14.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here