Ekipa jogadór ETV Lifau ‘dere’ ETV Palaban 4-1. Imajen Tatoli/Abílio Elo Nini.

OÉ-CUSSE, 27 maiu 2022 (TATOLI) – Ekipa jogadór hosi estudante Eskola Tékniku Vokasionál (ETV) Lifau halakon ekipa jogadór hosi eskola Tékniku Vokasionál ho rezultadu 4-1 iha torneiu desportu eskolár, iha Rejiaun Administrativa Espesiál Oé-Cusse Ambeno (RAEOA).

Jogu ne’e realiza iha kampu futeból Oébau, Rejiaun Administrativa Espesiál Oé-Cusse Ambeno (RAEOA), sesta dadeer ne’e, ekipa jogadór hosi estudante ETV Lifau ofisialmente lidera provizóriu ho rezultadu 4-1 hafoin halakon ekipa jogadór hosi eskola ETV Palaban Oé-Cusse.

Jogu primeira parte ho durasaun menutu 30, ne’ebé dominante hosi ekipa ETV Palaban, tanba jogu foin to’o menutu 10, jogadór Abel G. Tasi, númeru kamizola 10 lansa golu liuhosi suta penalidade.

Ekipa jogadór hosi ETV Lifau esforsu to’o menutu 15, jogadór Estanislau Teme, númeru kamizola 10, lansa tán golu ida liuhosi suta penalidade, nune’e ekipa rua hatuur rezultadu hanesan 1-1.

Rezultadu ne’e lori sorte di’ak ba ekipa ETV Lifau, tanba jogu primeiru parte kontinua la’o to’o menutu 27, jogadór Nazario Mene, númeru kamizola 3 lansa-tán golu daruak hodi muda rezultadu sa’e ba 2-1, nune’e jogu primeira parte termina ho tempu menutu 30, lidera provizóriu hosi ekipa ETV Lifau.

Hakat fali ba jogu segunda parte, tempu hanesan menutu 30, ekipa ETV Lifau, nafatin hatudu vontade di’ak tanba maioria domina kampu no hatudu tátika ne’eb’e furak, tanba jogu segunda parte la’o to’o menutu 15, Jogadór Adérito Mauno, númeru kamizola 15 lansa golu datoluk nian, hodi muda rezultadu ba 3-1.

Ekipa jogadór ETV Palaban, hahú hatudu fali estratéjia foun hodi troka jogadór sira, maibé nafatin laiha mudansa ruma, maske lansa beibeik ameasa ba guarda maibé la rezulta golu ruma.

Nune’e jogu segunda parte kontinua la’o to’o menutu ikus, menutu 29 ekipa ETV Lifau lansa tán golu dahaat, liuhosi jogadór, Cesaltino Neno, númeru kamizola 8, nune’e jogu segunda parte termina ho tempu 60 menutu, lidera provizóriu hosi ETV Lifau ho rezultadu 4-1.

Ho rezultadu ne’e, treinadór ekipa jogadór hosi Eskola ETV Lifau, Camilo Saet, agradese ba Sekretaria Estadu Juventude no Desportu, tanba realiza desportu eskolár atu anima estudante niv’el ensinu sekundáriu sira iha rejiaun ne’e.

Treinadór ekipa jogadór ETV Lifau, Camilo Saet. Imajen Tatoli/Abílio Elo Nini.

“Ami espera jogu ne’e iha kontinuasaun ba tinan oin, nune’e bele hatene no identifika estudante ne’ebé maka iha talentu di’ak bele uza atu reprezenta rejiaun ba kompete iha nivél nasionál, karik iha nivél nasionál loke desportu ba kada munisípiu,” nia orgullu. 

Treinadór ekipa jogadór ETV Palaban, Carlos Poto, orgullu maske lakon maibé ekipa rua hatudu jogu kualidade tanba amizade no disiplina.

Entretantu, jogu ho durasaun menutu 60, lidera hosi árbitru Agunstinho Mota, asistente dahuluk Candido Tefa, asistente daruak Bendito da Conceição.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here