Ekipa jogadór hosi estudante ESG Baqui, halakon ekipa CAFE ho rezultadu 6-0. Imajen Tatoli/Abílio Elo Nini.

OÉ-CUSSE, 27 maiu 2022 (TATOLI) – Ekipa jogadór hosi estudante Eskola Sekundáriu Jerál (ESG, sigla portugés) Baqui, halakon sekipa hosi Sentru Aprendizajen no Formasaun Eskolár (CAFE, sigla portugés)  ho rezultadu 6-0 iha torneiu desportu eskolár, iha Rejiaun Administrativa Espesiál Oé-Cusse Ambeno (RAEOA).

Jogu ne’e realiza iha kampu futeból Oébau, Rejiaun Administrativa Espesiál Oé-Cusse Ambeno (RAEOA), kinta loraik ne’e, ekipa jogadór hosi estudante ESG Baqui ofisiálmente lidera provizóriu ho rezultadu 6-0 hafoin halakon ekipa jogadór hosi eskola CAFE Palaban Oé-Cusse.

Jogu primeira parte ho durasaun menutu 30, ne’ebé dominante hosi ekipa EGS Baqui, tanba jogu foin to’o menutu 10, jogadór Adérito Sousa, númeru kamizola 10 lansa golu, no jogu kontinua to’o menutu 20 lansa-tán golu ida, no iha menutu 28 jogadór Meliquiano Falo lansa-tán golu ida.

Nune’e jogu primeira parte termina ho tempu menutu 30, lidera provizória hosi ekipa jogadór ESG Baqui ho rezultadu 3-0.

Hakat fali ba jogu segunda parte, tempu hanesan menutu 30, ekipa ESG Baqui, nafatin hatudu vontade di’ak tanba maioria domina kampu no hatudu tátika ne’ebé bonitu, tanba jogu segunda parte la’o to’o menutu 8, Adérito Sousa, lansa golu ida, hodi muda rezultadu ba 4-0.

Rezultadu ne’e halo ekipa ESG Baqui hatudu jogu furak liután, tanba foin to’o menutu 20 jogadór Carlito Eko, númeru kamizola 9 lansa golu, no to’o menutu 29, lansa-tán golu liuhosi suta penalidade.

Nune’e jogu segunda parte kompleta tempu minutu 60, lidera hosi ekipa jogadór ESG Baqui ho rezultadu 6-0, no tuir kalendáriu sei hasoru ekipa jogadór hosi ESG Palaban iha 28 maiu, sábadu dadeersan.

Ho rezultadu ne’e, treinadór ekipa jogadór Eskola CAFE, Aleixo Coa, orgullu maske lakon maibé ekipa rua hatudu jogu ho disiplina, laiha problema to’o jogi termina.

Koordenadór eskola CAFE, Aleixo Coa. Imajen Tatoli/Abílio Elo Nini.

“Sei hadi’a jogu iha futuru, liuhosi jogu ida-ne’e hanesan esperiénsia ida ba ami, atu prepara iha futuru, karik hosi ministériu kontinua tán jogu ne’e iha tinan oin mai, ami sei hadi’a ami-nia jogu ne’e, mezmu ami lakon maibé ami agradese tanba oinsá bele hatene ambiente jogu ida ba desportivu atu hatene fallansu no hadi’a iha futuru,” nia promete.

Treinadór ekipa jogadór ESG Baqui, Roberto Anunu, kontente tanba autoridade kria jogu ne’e ho objetivu atu anima estudante sira, nia parte prontu no prepara-aan ho di’ak atu kontra ekipa seluk iha loron sábadu, semana ne’e.

“Ha’u nu’udar profesór desportu no treinadór, ha’u kontente tanba ekipa ohin konsege hatudu jogu di’ak amizade tebes no disiplina,” nia orgullu.

Jogu ne’e lidera hosi árbitru Candido Tefa, asistente dahuluk Agustinho Mota no asistente daruak Bendito da Conceição.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here