Atividade evaluasaun no reflesaun ba eleisaun prezidensiál tinan 2022 iha munisípiu Viqueque, sesta (27/05). Imajen Tatoli/Vitorino Lopes da Costa

VIQUEQUE, 27 maiu 2022 (TATOLI)–Komisaun Nasionál Eleisaun (CNE, sigla portugés) hamutuk ho entidade kompetente, sesta ne’e, halo evaluasaun no reflesaun ba eleisaun prezidensiál tinan 2022 iha munisípiu Viqueque.

Komisáriu CNE destakadu munisípiu Viqueque, Olávio da Costa Monteiro  Almeida, konsidera atividade ne’e importante tebes tanba iha prosesu eleisaun, órgaun eleitorál sira hamutuk ho autoridade  no komunidade iha relasaun di’ak hodi mobiliza rekursu sira ho di’ak.

“Ohin ita halo avaliasaun ba buat sira ne’ebé akontese iha prosesu eleisaun prezidensiál laran, liuliu iha munisípiu Viqueque, maibé la’ós problema boot no la sai obstákulu, hanesan kondisaun udan no dalan bainhira atu mobiliza materiál eleisaun,” Olávio da Costa informa ba Agência Tatoli, iha sentru evakuasaun munisípiu Viqueque.

Notísia relevante: Apuramentu Viqueque, Lú Olo lidera ho votu 20.962 reprezenta 49,79%

Liuhosi evaluasaun ne’e mak bele identifika problema sira ne’ebé durante eleisaun CNE no Sekretaria Tékniku Administrasaun Eletorál (STAE) hasoru, nune’e bele reforsa liután kbiit tanba kada munisípiu sempre halo evaluasaun no aprezenta ba Govenu hodi hadi’a iha eleisaun parlamentár iha tinan 2023.

“Rezultadu  votasaun eleisaun pezidensiál ba períodu 2022-2023 liu daudaun no munisípiu Viqueque no Lautém laiha keixa reklamasaun,  iha prosesu apuramentu munisipál no apuramentu nasionál, ida-ne’e rezultadu ne’ebé ita hotu lori susesu. Tanba ne’e maka ami mai hakbesik ba entidade hotu iha munisípiu Viqueque hodi halo evaluasaun no refelesaun ida-ne’e,” nia hato’o.

Biban ne’e, Komisáriu CNE agradese ba parte Polísia Nasionál Timor-Leste (PNTL) ne’ebé koloka ona membru seguransa sira iha sentru no estasaun votasaun sira iha munisípiu Viqueque, inklui apoiu hosi autoridade sira no liña ministériál sira ne’ebé apoiu transporte hodi distribui materiál sensitivu no la sensitivu ba sentru votasaun sira.

Iha fatin hanesan, Administradór munisípiu Viqueque, Januário Soares ‘Bolly’, dehan, hosi eleisaun ne’e ita bele hadi’a ba futuru tanba bainhira sidadaun ida vota tuir nia rezidénsia iha kartaun eleitorál, maka sei hasoru difikuldade tanba komunidade balun liuliu estudante sira hela iha fatin seluk.

“Taxa partisipa iha eleisaun bele menus tanba transporte laiha sidadaun balun la tuir eleisaun, ho ida-ne’e ha’u hakarak sujere ba parte kompetente sira hodi haree no hadi’a lei eleitorál, nune’e ema bele vota iha fatin ne’ebé de’it,” nia tenik.

Atividade ne’e partisipa hosi administradór munipál, Komadante Polísia Nasionál Timor-Leste (PNTL) Viqueque, Diretór liña ministeriál,  reprezentante adiministradór postu, inklui  xefe suku sira.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here