Sekretáriu Rejionál ba Asuntu Komérsiu no Indústria, Pedro da Cunha. Imajen Tatoli/Abílio Elo Nini.

OÉ-CUSSE, 27 maiu 2022 (TATOLI) –Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, rekolla reseita ba kofre Estadu hamutuk rihun $22-resin hosi atividade feira produtu lokál durante loron 10.

“Rezultadu bazar kalan durante loron-10, ita konsege hetan reseita hamutuk rihun $22-resin, sei hatama ba kofre rejiaun hamutuk rihun $14,500.00 tanba rihun $8, ita uza atu halo pagamentu ba prémiu kompetisaun no fasilita sertifikadu inklui atribui subsídiu ba grupu vensedór restaurante sira,” Sekretáriu Rejionál Asuntu Komérsiu no Indústria, Pedro da Cunha, hatete iha Oé-Cusse, sesta ne’e.

Nia informa, fonte orsamentu ne’e rekolla hosi atividade rejistu restaurante sira hamutuk 22, grupu indústria hamutuk 13, karosa 11, jogu tradisionál bola guling hamutuk 50, kuru-kuru 45, ida-ne’e mak kontribui reseita ba kofre Estadu rejiaun nian.

“Kada restaurante rejista iha kalan primeiru de’it $10 dollár, maibé la’ós obrigatóriu depende inisiativa rasik hosi grupu sira, nomoos grupu indústria karosa kada grupu balu $5 dollár balu $10 dollár, maibé kona-ba jogu tradisionál kuru-kuru kalan ida $125,00 no bola guling $350,00 kada kalan,” nia informa.

Proposta ne’ebé Sekretaria Rejionál Komérsiu no Indústria, ajenda iha planu asaun anuál ba realizasaun feira produtu lokál tinan ne’e propoin rihun $3, uza ba atividade kompetisaun sira, hanesan homan, solu-fokál, diskursu públiku, grupu indústria transfomadór sira no sertame.

Nia subliña, bazea desizaun hosi autoridade RAEOA lidera Prezidente Autoridade, Arsénio Paixão Bano, sei iha kontinuasaun kada semana dala-ida, sei realiza iha kada loron sesta ho atividade hanesan promove produtu lokál.

“Nia objetivu atu anima komunidade ba sirkulasaun ekonomia no movimentasaun, tanba RAEOA hanesan enklave persiza kria movimentasaun, tanba daudaun ne’e autoridade mós kria ona fatin feira produtu lokál maibé sei iha faze konstrusaun,” nia katak.

Feira produtu lokál ne’e realiza durante loron 10, hahú iha 15 to’o 25 maiu, ho objetivu atu selebra loron restaurasaun independénsia 20 maiu ba dala-22 iha rejiaun ne’e.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here