TradeInvest Timor-Leste. Imajen/Espesiál

DILI, 26 maiu 2022 (TATOLI)—Ajénsia ba Promosaun Investimentu no Esportasaun Governu Timor-Leste (TradeInvest) ho apoiu hosi Market Development Facility (MDF) promove diálogu entre Governu ho setór públiku no privadu kona-ba komérsiu no esportasaun.

TradeInvest no MDF realiza semináriu ne’e hodi fahe informasaun kona-ba Institutu Kualidade Timor-Leste (IQTL, sigla portugés) no Komérsiu Esternu hosi Ministériu Turizmu no Indústria (MTKI) sira-nia knaar.

“IQTL no Komérsiu Esternu MTKI fahe hanoin kona-ba apoiu ne’ebé sira bele fó ba setór privadu, liuliu ba esportadór sira atubele kompreende didi’ak Governu nia prosesu sira no bele halo tuir regulamentu sira no fahe esperiénsia kona-ba obstákulu ne’ebé sira hasoru bainhira halo esportasaun ba sira-nia negosiu,” Diretór Ezekutivu Tradelnvest Timor-Leste, Arcanjo da Silva, hateten, hanesan liuhosi nota komunikadu ne’ebé Agência Tatoli asesu, kinta ne’e.

Notísia relevante: Governu reforsa kompeténsia TradeInvest nu’udar entidade responsável promosaun investimentu privadu

Diálogu ne’e tanba haree ba informasaun nu’udar valór prinsipál ida Tradelnvest, ne’ebé fó ba setór privadu iha faze hotu negósiu nian.

“Tradelnvest nia misaun maka fasilita investidór no esportadór sira hodi hala’o sira-nia negósiu iha Timor Leste. Ami-nia knaar prinsipál ida maka liga ho setór privadu ho setór públiku, liuhosi fahe no fó informasun ne’ebé relevante kona-ba oportunidade dezafiu no atividade investimentu no esportasaun iha Timor Leste,” nia akresenta.

MDF no Tradelnvest serbisu hamutuk hahú hosi tinan 2016 hodi promove esportasaun no investimentu iha Timor-Leste, tanba ne’e parte rua asina akordu kooperasaun téknika datoluk nu’udar kuadru referénsia ba organizasaun rua hodi promove investimentu no esportasaun iha setór produtivu sira.

Diretór Nasaun MDF nian iha Timor-Leste, Drew Johnson, hateten, sira-nia paoiu ba TradeInvest ne’e importante tebes hodi apoiu ba esportadór sira bele dezenvolve no diversifika ekonomia.

“Ho akordu tékniku foun ne’e, MDF no Tradeinvest sei serbisu hamutuk nafatin hodi hatán ba dezafiu oinoin ne’ebé hasoru hosi empreza timor-oan sira,” nia tenik.

Semináriu ne’e partisipa hosi ema na’in-50, inklui empreza esportasaun sira, asosiasaun setór privadu no parseiru ba dezenvolvimentu.

Tinan ne’e Tradeinvest espera katak esportadór na’in-lima sai kliente foun iha tinan 2022, no sei kontinua fasilita semináriu advokasia sira iha tinan ida-ne’e nia laran hodi liga setór privadu ho públiku.

Semináriu ne’e realiza tanba MDF hetan finansia hosi Governu Austrália.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here