Pontu Fokál Sosiedade Sivíl Munisípiu Bobonaro, Abel Perreira Mau-Resi. Imajen Tatoli/Sérgio da Cruz.

BOBONARO, 26 maiu 2022 (TATOLI) – Sosiedade Sivíl munisípiu Bobonaro, husu Governu Sentrál liuhosi Ministériu Administrasaun Estatal (MAE) aselera diskusaun ba proposta lei finansa munisipál nune’e kompleta lei podér lokál no desentralizasaun administrativa.

Governu no Parlamentu Nasionál (PN) aprova ona lei podér lokál no desentalizasaun administrativa tanba Konstituisaun RDTL artigu 5 (Desentralizasaun) hateten respeita iha organizasaun rai-laran nian,kona-ba prinsípiu atu fahe kbi’it administrasaun públika nian.

Nune’e mós artigu 72 (Podér lokál) fó dalan no harii kbi’it lokál ho ema-ne’ebé koletiva iha rai-laran ne’ebé iha órgaun  reprezentativu, ho kna’ar atu reoganizasa iha partisipasaun sidadaun idak-idak nian kona-ba solusaun problema rasik iha sira-nia komunidade no atu promove dezenvolvimentu lokál, no la afeita ba partisipasaun estadu nian.

Nune’e Pontu Fokál Sosiedade Sivíl Munisípiu Bobonaro atuál Responsável Fundasaun HABELAR, Abel Perreira Mau-Resi, esplika Governu Sentrál no Parlamentu Nasionál aprova ona lei rua ne’e, maibé presiza aselera tán proposta lei finansa munisipál nune’e bele hakbiit podér lokál.

“Presiza aselera kuandu lei desentralizasaun ne’e Prezidente Repúblika promulga ona, entaun tenke iha tán lei finanseiru atu nune’e sira bele la’o hamutuk, sé lei finanseiru laiha entaun hanesan de’it ita seidauk bele tama iha desentralizasaun, povu nafatin halerik ba dezenvolvimentu,” nia informa ba Tatoli, iha kna’ar fatin suku Ritabou, kinta ne’e.

Responsável masimu ba Fundasaun HADER ne’e esplika, podér lokál di’ak tebes tanba fó kompeténsia ba governu lokál uza nia kapasidade atu jere rasik rekursu sira iha munisípiu, rekollarasik taxa hosi rikeza naturál sira.

Tanba lei númeru 23/2021,loron 10 novembru kona-ba podér lokál no desentralizasaun administrativa no lei númeru 22/2021,loron 4 novembru konabá lei eleitorál munisipál promulga ona hosi Prezidente da Repúblika, lei ne’e rasik fó podér tomak ba munisípiu atu dezenvolve rasik área poténsia sira iha munisípiu.

Objetivu hosi lei ne’e atu establese organizasaun,kompozisaun no kompeténsia órgaun podér lokál, inklui kuadru jurídiku desentralizasaun administrativa estadu nian, órgaun hosi asembleia munisipál, prezidente munisípiu no vise-prezidente munisípiu.

Nune’e nia dehan, presiza governu sentrál aselera implementasaun podér lokál tanba tuir sosiedade sivíl nia hare lei tolu ne’e atu hakbesik dezenvolvimentu hodi abranje to’o iha nível baze.

“Ami-nia haree presiza ita aselera atu ema hotu-hotu labele preokupa atu buka serbisu iha kapitál, maibe lori ona sira-nia konsentrasaun, liuliu ema akadémiku sira bele lori sira-nia rekursu no kapasidade mai atubele esplora rikeza sira hodi bele hetan fali osan iha nível munisípiu,” nia dehan.

Nia espetativa katak, molok estabelese podér lokál no desentralizasaun administrativa governu sentrál sei implementa papél rua hanesan, primeiru investe iha setór edukasaun hanesan formasaun no kapasitasaun ba rekursu umanu iha munisípiu Bobonaro.

Enkuantu haree ba parte kapasidade polítika, bainhira governu atu delega ka nomea ema ruma tenke liuhosi eleisaun atubele hato’o nia programa no planu iha kampaña nune’e solusaun ikus povu deside hafoin lidera governu lokál.

Nia fundamenta, atu garante munisípiu ba susesu iha implementasaun lei tolu ne’e, tenke iha rekursu umanu sufisiente ho nia  kapasidade aas nune’e bele iha planu ne’ebé di’ak hodi halo jestaun ba munisípiu.

“Pepél ne’e hosi nasionál entrega ona mai, hakarak ka lakohi ema-ne’ebé kaer ona pasta ida-ne’e ninia orientesaun tenke halo ona tanba iha ona finanseiru rasik, maibé importante liu bainhira ita iha kapasidade tenke ukun ho fuan no laran hodi lori desentralizasaun ne’e to’o finál,” nia sujere.

Maibé nia husu governu sentrál no lokál atu kontinua sensibiliza lei hirak-ne’e ba komumindade sira atu nune’e sira bele intende konteúdu hosi lei refere.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here