Prezidente CCI RAEOA, Eurico da Rosa. Imajen espesiál.

OÉ-CUSSE, 26 maiu 2022 (TATOLI) – Prezidente Kámara Komérsiu Industria (CCI, sigla portugés), Rejiaun Administrativa Espesiál Oé-Cusse Ambeno (RAEOA), Eurico da Rosa, sujere ba Governu sentrál, ba futuru implementasaun podér lokál no dezentralizasaun administrativa, persiza hadi’a uluk direitu setór privadu ba sustentabilidade ekonómia iha rejiaun ne’e.

“Ami hanesan parseiru dezenvolvimnetu, apoiu no kontribui importante mak hadi’a lei ne’ebé bele proteje direitu setór privadu, tanba geografikamente setór privadu iha Oé-Cusse ameasa boot ligadu ho ita-nia regulamentu ne’ebé sei fraku, entaun ameasa ba sustentabilidade, tanba setór privadu hanesan autór dezenvolvimentu ka xave importante no indikasaun ba nasaun dezenvolvidu, maka ekonomia tenke forte no na’in ba ekonomia, tanba setór privadu mak bele halo investimentu no kria kampu traballu, ” Prezidente CCI, ko’alia iha Oé-Cusse, kuarta ne’e.

Maibé nia espera, iha futuru Governu sentrál implementa podér lokál ne’e, sei fó solusaun ba atraza dezenvolmentu ne’ebé akontese ona, importante persiza prioridade uluk mak infraestrutura bázika, atu fasilita komunidade bele asesu ba bee-moos, estrada, eduksaun no saúde.

Nu’udar setór privadu orgullu tanba lei númeru 23/2021, loron 10 novembru kona-ba podér lokál no dezentralizasaun administrativa, no lei númeru 22/2021, loron 4 novembru kona-ba lei eleitórál munisípál promulga ona hosi Prezidente Repúblika, tanba lei ne’e fó podér tomak ba munisípiu atu dezenvolve rasik poténsia sira iha munisípiu.

Konstituisaun Repúblika Demokrátika Timor-Leste, prevee organizasaun Administrativa Públika ne’ebé obedese ba prinsípiu desentralizasaun administrativu. Objetivu hosi lei ne’e atu estabelese organizasaun, kompozisaun no kompeténsia órgaun Podér Lokál, inklui kuadru jurídiku dezentralizasaun administrativa Estadu nian.

Órgaun ne’ebé atu implementa lei ne’e komposta hosi Asembleia Munisipál, Prezidente Munisípiu no Vise-Prezidente Munisípiu. Tanba lei ne’e dezentraliza podér tomak ba munisípiu no lei eleitorál munisipál, ne’e sei iha parlamentu lokál rasik, prezidente autoridade rasik, mak sei jere administrativamente, maibé rekursu umanu no rekursu finanseira tenke garantia.

“Ha’u hanoin Lei Podér Lokál ne’e sei fó benefísiu másima ba munisípiu, tanba implementasaun podér ne’e sei to’o iha suku, tanba kada suku bele reprezenta iha kámara munisípiu sira, no kada munisipíu iha nia orsamentu rasik ne’ebé mak sei alokadu to’o nivél suku,” nia katak.

Governu no Parlamentu Nasionál aprova lei Podér Lokál no dezentralizasaun administrativa tanba Konstituisaun RDTL artigu 5 (Dezentralizasaun) hatete Estadu respeita, iha nia organizasaun rai-laran nian, kona-ba prinsípiu atu fahe kbiit Administrasaun Públika nian.

Nune’e mós artigu 72 (Podér Lokál) hosi Konstituisaun RDTL dehan, sei harii kbiit lokál ho ema ne’ebé koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak nian kona-ba solusaun problema rasik iha sira-nia komunidade no atu promove dezenvolvimentu lokál, no la afeta partisipasaun Estadu nian.

Nune’e, prezidente CCI RAEOA, afirma, atu implementa podér lokál ne’e, persiza ema-ne’ebé tenke hatene nia kompeténsia bazeia tuir lei, no onestu ba povu no nasionalismu ne’ebé aas ho esperiénsia ne’ebé natoon.

Nia informa, implementasaun podér lokál ne’e ho pakotemenmtu kompleta kedas ho Lei Eleitoral Munisipál signifika kada munisipál sei halo eleisaun hodi hetan nia reprezentante iha kámara munisípíu.

“Lei podér Lokál la’o karik ne’e hanesan programa dezenvolvimento ida-ne’ebé integradu hosi nivél nasionál to’o nível munisípiu, ha’u hanoin sei la akontese problema finanseiru, ha’u fiar katak ida-ne’e tama iha programa integradu” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan