Diretór Edukasaun RAEOA, Daniel Mauno. Imajen Tatoli/Abilio Elo Nini.

OÉ-CUSSE, 26 maiu 2022 (TATOLI) – Sekretaria Estadu Juventude no Desportu (SEJD) prevee orsamentu hamutuk rihun $15 ba autoridade Rejiaun Administrativa Espesiál Oé-Cusse Ambeno (RAEOA), hodi realiza desportu eskolár kompete iha modalidade tolu ba nivél ensinu sekundáriu sira iha Oé-Cusse.

“Ita halo ona abertura iha kuarta, 25 maiu ne’e tanba hetan apoiu finanseira hamutuk rihun $15 ne’ebé aloka mai hosi Sekretaria Estadu Juventude no Desportu, atu apoia implementasaun eventu desportivu eskolár nível sekundáriu ba modalidade futeból, voleiból no atletizmu,” Diretór Edukasaun RAEOA, Daniel Mauno, hatete iha Oé-Cusse, kinta ne’e.

Nia informa, tuir loloos orsamentu ne’e ba eventu 2021, mumentu ne’e edukasaun RAEOA simu orientasaun hosi SEJD atu realiza iha novembru 2021, maibé la konsege realiza, entaun foin mak realiza iha 2022 ne’e ho razaun tanba orsamentu nia ezekusaun tenke iha 2021.

Tán ne’e, autoridade RAEOA koopera ho Diresaun Rejionál Sekretáriu Estadu Juventude no Desportu, iha akordu estensaun ezekusaun orsamentu iha 2022 ho prazu to’o juñu tinan ne’e.

“Tanba eventu desportu eskolár ne’e sai mós hanesan programa nasionál, ne’ebé kada tinan hosi SEJD realiza ba munisípiu sira inklui RAEOA,” nia afirma.

Partisipasaun iha eventu eskolár ne’e prioridade ba nível ensinu sekundáriu, komposta hosi ensinu sekundáriu jerál hitu no ensinu sekundáriu tékniku vokasionál haat, hamutuk 11.

Nune’e bele kompete iha modalidade tolu, iha eventu eskolár ne’e maka futeból ba mane, voleiból ba feto no mane, atletizmu halai ho distánsia kilometru lima ba feto no kilómetru hitu ba mane.

Dirijente edukasaun Oé-Cusse, apela profesór no estudante sira atu hatudu disiplina ho profisionál, kria amizade entre eskola sira, nune’e bele hasa’e prestasaun kualidade desportu iha rejiaun ne’e.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here