Prezidente Repúblika, José Ramos Horta. Imajen Tatoli/Antonio Daciparu

DILI, 26 maiu 2022 (TATOLI)— Prezidente Repúblika, José Ramos Horta, kongratula Provedória Diretu Humanu no Justisa (PDHJ), kinta ne’e, selebra aniversáriu ba dala-18 no kontinua husu hatudu serbisu ho profisionál  liuhosi monitorizasaun, nune’e bele  kontribui di’ak liután  ba prosesu dezenvolvimentu nasaun ne’e.

“PDHJ nia serbisu di’ak tebes durante nia ezisténsia hodi defende direitu umanu sidadaun nian, ne’ebé garante iha Konstituisaun Repúblika no seluk maka atu fó justisa liuliu tulun sidadaun sira ne’ebé hasoru hela situasaun injustisa laran no la asesu ba justisa,” Xefe Estadu hatoo asuntu ne’e iha nia intervesaun

PR Horta mós nota iha tinan hira ikus ne’e PDHJ, Komisaun Anti Korrupsaun (KAK) halo serbisu di’ak tanba iha rekusu umanu kualidade hodi halo investigasaun kle’an no di’ak tebes.

“Parabéns ba imi hotu iha Prevedória Diretu Umanu no Justisa,” Xefe Estadu kongratula.

Prezidente Parlamentu Nasional,Aniceto Guterres. Imajen Tatoli/Antonio Daciparu

Iha biban hanesan,   Prezidente Parlamentu Nasionál, Deputadu Aniceto Longinhos Guterres husu ba PDHJ atu halo peskiza no estudu siéntifiku molok aprezenta relatóriu ba Parlamentu Nasionál.

“Halo estudu kle’an no fundamentál kona-ba asuntu bo’ot tolu hanesan Direitu Umanu, Justisa no Boa Governasaun. Ha’u enkoraza PDHJ atu aprezenta relatóriu anuál ba Parlamentu Nasionál tinan ne’e inklui pontu estudu ba asuntu tolu ne’e,” Prezidente PN sujere.

Ministru Prezidénsia Konsellu Ministru, Fidelis Leite Magalhães, mós kongratula PDHJ no dezeja serbisu hodi hala’o knaar ne’ebé hatudu ona iha Konstituisaun RDTL.

Ministru PCM, Fidelis Magalhaes Leite, Imajen Tatoli/Antonio Daciparu

“Ba dahuluk lori Primeiru Ministru nia naran hakarak parabéniza PDHJ ne’ebé selebra tinan ba-18 no dejeza kontinua serbisu ho empenamentu ba kna’ar ida ne’ebé hatur ona iha ita nia konstituisaun RDTL,” Ministru Fielis  kongratula.

Kona-ba dezafiu no limitasaun PDHJ, Governante ne’e dehan Governu sei buka dalan hodi rezolve kestaun sira ne’ebé daudaun PDHJ enfreta liuhosi diskusaun Orsamentu Jerál Estadu (OJE) kada tinan.

Nune’e mós Reprezentante ONU iha Timor-Leste, Roy Trivedy, mós  hato’o parabéns ba PDHJ nian aniversáriu ba dala 18 ho aniversariu ne’e bele mellora serbisu ho di’ak liután.

Representante UN iha Timor Leste Roy Trivedy Imajen Tatoli/Antonio Daciparu

“Trata kestaun diretu umanu ne’e importante tanba mundu ohin loron ema hakarak viola ema nia direitu. Tanba ne’e hanesan reprezentante ONU iha Timor-Leste husu ita boot sira kontinua hatudu prestasaun serbisu hodi defende direitu umanu,  justisa no boa governasaun iha Timor-Leste,” nia enkoraja.

Dezafiu iha prosesu invetigasaun

Entretantu, Provedora Diretu  Humanu no Justisa (PDHJ), Jesuina Maria Ferreira Gomes, hateten durante PDHJ nian ezisténsia hahú hosi 2005 too 2022 (tinan 18)  sei enfreta dezafiu halo investigasaun ba kazu liga ho direitu umanu no boa governasaun.

Difikuldade hirak ne’e mak hanesan, difisil ba PDHJ atu hetan dokumentu no informasaun kona-bá violasaun ne’ebé akontese.

Provedora Direitu Umanu no Justisa, Jesuína Maria Gomes. Imajen Tatoli/Antonio Daciparu

“PDJH hasoru dezafiu bainhira ezerse nian funsaun hodi garante prosesu investigasaun tanba hasoru hela difikuldade atu asesu dokumentu ka informasaun sira kona-ba violénsia sira hodi fasilita PDHJ nian serbisu ho di’ak,” Provedora Jesuina hateten.

Atu solusiona dezafiu ne’e, PDHJ submete ona  proposta revizaun  estatutu lei- númeru 7/20004 ba Parlamentu Nasionál  no sai ona projetu lei Parlamentu Nasionál ne’ebé iha tempu badak SEI halo diskusaun iha espesialidade.

Proposta revizaun ne’e ho konteúdu atu halo atualizasaun no armonizasaun ba artigu sira inklui infrasaun iha ámbitu administrativu, nune’e bele halo separasaun klara kona-bá krime no mós kazu sivil no halo mós introdusaun ba estatutu espesiál funsionariu PDHJ, hodi garante independénsia hodi eleva dezempeñu funsaun hosi funsionáriu nian.

Entertantu progresu servisu PDHJ durante ezisténsia tinan 18 nia laran hahú tinan 2005-2021 simu keixa hamutuk 3.553, kompostu hosi feto 609 no mane 2.618,  inklui keixa anónimu hamutuk 66.

Keixa ho alegasaun ba violasaun direitu umanu hamutuk 1.432, keixa ba violasaun prinsípiu Governasaun 1.085 inklui keixa ne’ebé relasiona ho alegasaun korrupsaun 95.

Hosi kazu hirak ne’e konsege loke investigasaun ba kazu hamutuk 1.546, kompostu hosi violasaun direitu umanu 738, boa Governasaun 719 no kazu korrupsaun 89, Enkuantu iha 102 kazu mak konsege halo mediasaun kompostu hosi violasaun direitu umanu 42 no boa Governasaun 58.

Kona-ba formasaun, hahú hosi 2005 too 2021 PDHJ ho parseiru sira fó ona formasaun ba membru PNTL hamutuk 1.773, kompostu hosi mane 1.600 no feto 173 ba membru F-FDTL hamutuk 275, kompostu hosi mane 82 no feto 83.

PDHJ mós realiza desiminasaun ba funsionáriu ho entidadede públika liuliu estudante no komunidade sira ho aprozimasaun liu ema 10.000.

Notísia relevante:  PDHJ rejista membru PNTL 78 komete violasaun direitu umanu

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here