Prezidente Repúblika, José Ramos Horta, enkontru ho Primeiru-Ministru, Taur Matan Ruak, iha Palásiu Prezidente Nicolau Lobato, Bairru Pite, kinta (26/05). Imajen Tatoli /Egas Cristóvão.

DILI, 26 maiu 2022 (TATOLI)—Primeiru-Ministru, Taur Matan Ruak, kinta ne’e, hala’o sorumutu dahuluk ho Prezidente Repúblika, José Ramos Horta, hafoin simu pose hodi relata atividade servisu VIII Governu Konstituisonál nian.

Notísia Relevante: PM Taur: PR Horta husu fiskalizasaun abstrata OR la implika ezekusaun

“Ne’e primeiru enkontru semenál ho Prezidente Repúblika hodi fó hanoin uitoan kona-ba seguransa no atividade Governu nian liu-liu atu ba Parlamentu Nasionál iha tempu badak defende proposta lei Grande Opsaun Planu,” PM Taur hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.

Prezidente Repúblika, José Ramos Horta, hala’o enkontru ho Primeiru-Ministru, Taur Matan Ruak, iha Palásiu Prezidente Nicolau Lobato, Bairru Pite, kinta (26/05). Imajen Tatoli /Egas Cristóvão.

Tuir Taur, uluk Governu lori buat rua de’it ba Parlamentu Nasionál no ida mak programa Governu nian no tuir fali lori orsamentu ba, maibé agora ho lei Enkuadramentu Jestaun Finanseira foun, obriga Governu antes lori orsamentu ba tenke lori uluk planu ba.

Normalmente planu ne’e akontese iha fulan maiu nia laran, entaun ho enkontru ne’e informa ba Prezidente Repúblika tempu badak Governu sei ba Parlamentu no agora membru Governu balun ba uluk ona.

“Tempu badak, Governu sei ba PN aprezenta programa hodi hetan aprovasaun no promulgasaun hosi Prezidente Repúblika, nune’e prepara halo orsamentu depois to’o orsamentu sei lori fali ba Parlamentu,” nia hateten.

Durante sorumutu, Xefe Estadu apresia Governu nia servisu no oinsá haree programa hodi kombate má-nutrisaun, hamlaha iha rai-laran.

“Prezidente Repúblika nia prioridade mak oinsá. Kombate má-nutrisaun, hamenus hamlaha iha ita-nia rain no Governu intende ida-ne’e, Governu esforsu hodi bele forma daudaun atividade sira-ne’ebé mak halo hela no Governu mós kontinua nafatin servisu hodi oinsá akomoda ideia sira-ne’e,” nia dehan.

Tanba ne’e, Xefe Governu ne’e hateten iha mós membru Governu balun sei mai hato’o ba Prezidente Repúblika, antes inisiativa sira seluk avansa ba oin prepara liu-liu ba Orsamentu Jerál Estadu 2023.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here