Ministra Saúde, Odete Maria Freitas Belo, kinta ne’e ofisializa kuarentena rua sai sentru saúde iha RAEOA. Imajen mídia ZEESM.

OÉ-CUSSE, 26 maiu 2022 (TATOLI) – Ministra Saúde (MS), Odete Maria Freitas Belo hamutuk ho autoridade Rejiaun Administrativa Espesiál Oé-Cusse Ambeno (RAEOA), kinta ne’e ofisializa kuarentena rua sai sentru saúde no postu saúde nu’udadr meiu hakbesik fasilidade saúde ba komunidade halo tratamentu.

Kuarentena rua ne’e konstrui hosi autoridade uza orsamentu mai hosi fundu COVID-19 iha 2021, hanesan kuarentena Kiumaonteko, muda sai ba sentru saúde hodi fó atendimentu ba komunidade suku haat, Costa, Lifau, Lalisuk no Nipani, perténsia sub-rejiaun Pante Makasar.

Nune’e mós, kuarentena Manan iha suku Bene-Ufe muda sai ba postu saúde ida iha sub-rejiaun Nítibe hodi atende komunidade mai hosi suku Usitako, Bene-Ufe no Lela-Ufe.

Ministra Saúde, Odete Maria Freitas Belo, sauda polítika autoridade RAEOA tanba esforsu uza fundu COVID-19 kontrui fasilidade ba pasiente COVID-19, maibé hafoin kazu mundiál ne’e menus, deside reativa fali ba fasilidade saúde.

“Objetivu fatin rua-ne’e atu tau matan ba pasiente no ita sira-ne’ebé moras, ita espera katak fasilidade ida-ne’e bele halo tratamentu liuliu ba iha área prevensaun no promosaun, katak sentru saúde ho postu saúde sira-ne’e, atu halo ema labele moras, fasilita komunidade bainhira enfrenta moras ruma, bele halo tratamentu iha fasilidade ne’ebé besik la presiza hosi foho mai to’o vila,” Ministra Odete ko’alia iha serimónia lansamentu, ne’ebé realiza iha suku Costa, Oé-Cusse.

Governante ne’e, apela ba profisionál saúde atu serbisu ho responsabilidade liuliu ba prevensaun, labarik sira presiza hetan imunizasaun no promosaun ba moras sira durante ne’e akontese hanesan malária, dengue no seluk-tán.

Prezidente Autoridade RAEOA Arsénio Paixão Bano, agradese ba Governu Sentrál liuhosi Ministériu Saúde, tanba iha 2021 Timor-Leste enfrenta COVID-19, Oé-Cusse subsídiu atu halo melloramentu ba fasilidade saúde, nune’e Oé-Cusse hetan millaun $200-resin, konsege harii fasilidade kuarentena unidade-neen iha sub-rejiaun haat.

“Ohin RAEOA kontente tanba aumenta beibeik fasilidade iha área saúde, tanba ohin ita hakiduk ona hosi COVID-19 entaun fasilidade ne’ebé harii iha situasaun emerjénsia, agora ita uza ba fasilidade saúde, hanesan Kiumaonteko ho Mana,” nia orgullu.

Nia informa, ba kuarentena iha sub-rejiaun Oésilo ho Pássabe sei sai fatin internamentu fatin ba inan-isin rua sira, kuarentena sira iha zona sentrál Pante Makasar nian.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here