Postu saúde suku Lour, postu administrativu Bobonaro, munisípiu Bobonaro ne'ebé abandona hela. Imajen espesiál.

BOBONARO, 26 maiu 2022 (TATOLI) – Xefe suku Lour, postu administrativu Bobonaro, munisípiu Bobonaro, Miguel Gomes Lopez, reprezenta komunidade sira ezije ba Ministériu Saúde (MS), atu destaka lalais médiku tanba postu saúde refere abandona hela.

Nia haktuir, tinan 2021 ne’e iha ámbitu reativa programa vasinasaun Covid-19 ba komunidade sira iha suku ne’e, Ministra Odete hamutuk ho nia ekipa konsege halo vizita simples ida hodi haree direita kondisaun infraestrutura bázika iha postu saúde ne’ebé konstrui tinan barak ona maibé seidauk bele utiliza tanba laiha médiku.

Hafoin observa fasilidade iha postu saúde refere, Ministra Odete promete ba autoridade lokál iha suku ne’e katak sei orienta Servisu Saúde Munisípiu Bobonaro atu koloka pesoál saúde atubele halo atendimentu saúde ba komunidade, maibé realidade besik tinan-ida ona governante ne’e seidauk kumpre promesa ne’e.

“Ministra Saúde rasik mai haree dehan atu koloka doutór iha-ne’e, maibé to’o agora laiha rezultadu, tanba ne’e mak ami husu ba Ministériu Saúde atubele haree problema ida-ne’e, nune’e bele halo atendimentu ba komunidade sira ho urjente, sé lae ami susar tebes,” nia informa ba ba Tatoli, iha Maliana, kinta ne’e.

Nia fó-sai katak, governu anterior harii iha 2011 ka 2012 hanesan ne’e maibé hafoin konstrusaun ne’e kedas la funsiona tanba kestaun distánsia no laiha rezidénsia ba médiku entaun tenke abandona postu saúde ne’e.

Nune’e iha mandatu lideransa komunitária ne’e iha 2020 konsege hatama planu liuhosi Programa Nasionál Dezenvolvimentu Suku (PNDS) kontrui duni dormitóriu médiku nian hamutuk kuartu rua.

Orsamentu Jerál Estadu (OJE) 2020 ne’ebé prevista iha livru munisípiu nian, prevee ba suku Lour liuhosi PNDS ho montante rihun $45 kompostu hosi operasionál $5,500 no fíziku $39,500.

Maibé Xefe Suku ne’e sente triste tanba realidade konstrusaun ne’e remata tinan rua ona médiku sira seidauk halo serbisu, to’o agora du’ut mak naruk haleu uma ne’e inklui fasilidade balun la funsiona.

Ho problema ne’e, Miguel dehan, difikulta tebes komunidade sira tanba atu asesu fasilidade saúde tenke la’o-ain husu suku ne’e ba sentru saúde Bobonaro vila ho distánsia kilómetru ualu-resin.

“Esperiénsia lubuk ne’ebé ami hasoru durante seidauk estabelese postu saúde Lour, dalabarak komunidade sira bainhira atu partu no moras ruma halo tratamentu urjente difisil tebes, até balun família sira obriga ba Bobonaro, balun hakotu vida iha dalan klaran,” nia haktuir.

Nia hatutan, governu la tau iha konsiderasaun entaun iha tempu udan monu-rai problema refere sei grave liután tanba postu saúde ne’e lokaliza iha área remota.

Nune’e mós kondisaun estrada liga ba Bobonaro vila no kapitál Maliana tenke liuhosi dalan fatuk-laran, foho-lolon no hakuur mota.

Suku Lour iha ldeia haat mak hanesan Taz-Golo, Heliquei, Olo-olo no Gali-Taz ho totál populasaun 1.394 kompostu hosi feto na’in-707, mane na’in-687 no totál uma-kain 309 ho área luan kilómetru 11,61.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here