Guarda-rede prinsipál ekipa selesaun nasionál U-23 Timor–Leste, Junildo Pereira,Imajen/espesial

QATAR, 26 maiu 2022 (TATOLI)– Guarda-rede prinsipál ekipa selesaun nasionál U-23 Timor–Leste, Junildo Pereira, kontente no orgullu ho fatin ne’ebé sira halo treinamentu ba ne’ebé ho fasilidade modernu.

“Ha’u promote, sei hatudu prestasaun di’ak iha jogu amigável ne’ebé ekipa Timor-Leste sei kontra ekipa selesaun nasionál Kamboja iha 2 juñu agora iha Estádiu Kambodia,” Guarda Rede ne’e hateten ba agência TATOLI, kuarta ne’e.

Notísia relevante: Hala’o TC iha Qatar, kapitaun selesaun nasionál U-23 agradese ba FFTL-QFA

Guarda-rede prinsipál U-23 ne’e espera katak Federasaun Futeból Timor – Leste (FFTL) ba oin hanoin ona oinsá atu kria kampu ne’ebé ho kualidade ba jogadór sira hodi hala’o treinamentu ho di’ak, nune’e tuir kompetisaun futeból iha rai-li’ur labele derrota tan.

Ho kondisaun no fasilidade ne’ebé di’ak, nia garante bele aumenta liután nia koiñesimentu no fó-biban ba nia atu hatudu prestasaun di’ak iha jogu sira tuirmai.

Junildo moris iha Dili iha loron 04 fulan-juñu 2003, oan mane dahuluk hosi Agustinho da Costa no Ana Cicilia Guterres hosi maun alin na’in-lima.

Jogadór otas nurak ne’e hahú nia estudu iha eskola bázika Anur Dili iha 2007-2012, eskola pre-sekundáriu 2013 too 2015 no eskola sekundáriu iha Koléjiu Paulo VI Dili iha 2016 to’o 2018.

Junildo envolve aan iha futeból hanesan guarda-rede selesaun nasionál U-12, iha tinan 2014 bainhira sei ho idade 14, maibé konsege partisipa kompetisaun futeból iha Korea Súl iha kompetisaun juvenil nian.

Nune’e,  iha 2016 jogadór ne’e nafatin ultrapasa ba selesaun nasionál U-14 konsege bá tuir kompetisaun iha Kambodia iha jogu AFF nian.

Iha 2017, Junildo hakat ba selesaun nasionál U-16 hamutuk ho nia kolega sira iha pozisaun hanesan guarda-rede nafatin konsege partisipa iha jogu internasionál AFF nian iha Tailándia.

Iha tinan 2019, Junildo kompleta nia idade 19 no iha momentu ne’ebá, treinadór Eduardo Pereira hili kedan nia hanesan guarda-rede ba U-19 nian hodi bá partisipa jogu internasionál AFC nian iha Vietname.

Hosi prestasaun lubuk ida ne’ebé nia hetan maka atrai kedas treinadór selesaun nasionál U-23, Fabio Maciel da Silva nia laran hodi hili nia nu’udar guarda-rede ba iha selesaun nasionál U-23.

Hamutuk iha selesaun nasionál U-23, Junildo ho nia kolega sira konsege bá partisipa ona eventu internasionál lubuk ida hanesan partisipa jogu AFC iha Singapura 2021 no iha 2021 nafatin partisipa eventu Suzuki Cup iha Singapura hanesan baliza prinsipál too ramata.

Iha 2022 Junildo hetan nafatin fiar hosi treinadór Fabio hodi tama iha guarda-rede selesaun U-23 nian hodi bá joga iha kopa AFF ne’ebé hala’o iha Kambodia iha ne’ebé Timor–Leste sai terseiru lugar.

Nune’e iha maiu Junildo nafatin hanesan guarda-rede prinsipál Timor–Leste nian iha jogu SEA Games maski la konsege gaña Vitória maibé Junildo konsege hatudu prestasaun ne’ebé brillante.

Notísia relevante: Ekipa U-23 treinu fíziku no tátika kontra-atake iha Qatar

Jornalista : Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here