Ekipa jogadór hosi ETV Pássabe derota ho rezultadu 8-0 kontra ESG Palaban iha desportu eskolár. Imajen Tatoli/Abílio Elo Nini.

OÉ-CUSSE, 26 maiu 2022 (TATOLI) – Ekipa jogadór hosi estudante Eskola Sekundáriu Tékniku Vokasionál (ETV) Pássabe derota ho rezultadu 8-0 hafoin kontra Eskola Sekundáriu Gerál (ESG) Palaban iha torneiu desportu eskolár.

Jogu ne’e realiza iha kampu futeból Oébau, Rejiaun Administrativa Espesiál Oé-Cusse Ambeno (RAEOA), kinta dader ne’e, ekipa jogadór hosi estudante ESG Palaban ofisiálmente lidera provizóriu ho rezultadu 8-0 hafoin halakon ekipa jogadór hosi estudante ETV Pássabe.

Jogu primeira parte ho durasaun minutu 30, ne’ebé dominante hosi ekipa EGS Palaban, tanba jogu foin to’o minutu 15, jogadór Mariano Taimenas, númeru kamizola 6 lansa golu ida.

Vitória dahuluk ne’e, lori sorti di’ak ba ekipa jogadór ESG Palaban, tanba jogu la’o to’o menutu 25, Mariano Taimenas lansa-tán golu ida, no liutiha to’o minutu 29, jogadór Filipe Pereira númeru kamizola 9 lansa-tán golu hodi muda rezultadu ba 3-0, nune’e jogu primeira parte termina ho tempu menitu 30 lidera provizóri hosi ekipa ESG Palaban ho rezultadu provizóriu 3-0.

Hakat fali ba jogu segunda parte, ho durasaun minutu 30, ekipa ESG Palaban, nafatin hatudu vontade di’ak tanba maioria domina kampu no hatudu tátika ne’ebé bonitu, tanba jogu segunda parte la’o to’o minutu 5, jogadór Juvito Lopes, númeru kamizola 13 lansa golu ida, hodi muda rezultadu ba 4-0.

Rezultadu ne’e lori sorti di’ak ba ekipa ESG Palaban, jogu kontinua la’o foin to’o minutu 10, Mariano Lopes lansa golu, no menutu 17 lansa -tán golu datoluk nian, hodi muda rezultadu sa’e ba 6-0.

Tempu ba segunda parte hela de’it minutu 13, maibé ekipa ESG Palaban kontinua hatudu vontade nafatin, jogu la’o to’o minutu 20, jogadór Mariano Soares, númeru kamizola 10 lansa golu, no minutu ikus, minutu 19, lansa-tán golu daruak.

Nune’e jogu sugunda parte termina ho tempu 60 minutu, ekipa jogadór hosi ESG Palaban lidera provizória ho rezultadu 8-0, nune’e tuir kalendáriu ekipa ESG Palaban sei hasoru ekipa entre ESG Baqui ho CAFE iha sábadu dadeersan, 28 maiu.

Ho rezultadu ne’e, treinadór ekipa jogadór ETV Pássabe, Manuel da Conceição, orgullu maske lakon maibé ekipa rua hatudu jogu ho disiplina, laiha problema to’o termina tempu menutu 60

Treinadór ekipa ETV Pássabe, Manuel da Conçeição. Imajen Tatoli/Abílio Elo Nini.

“Ohin ami derrota, tanba jogadór sira laiha sapatu kika, sira uza de’it sapatu kets, no durante ne’e iha eskola ladún realiza treinu, entaun ida-ne’e maka ami-nia frakeza ohin derrota ne’e, maibé orgullu maske lakon importante jogu ne’e la’o di’ak to’o rohan,” nia katak.

Treinadór ekipa jogadór ESG Palaban, José Neno, kontente tanba autoridade kria jogu ne’e atu anima estudante sira, no prepara an ho di’ak atu kontra ekipa seluk iha jogu tuir mai.

Jogu ho durasaun minutu 60 ne’e lidera hosi árbitru Agunstinho Mota, asistente dahuluk Rogrigo Teixeira, asistente daruak Cândido Tefa.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here