Embaixadór Australia iha Timor-Leste, William Terrence Costello, akompañadu hosi Diretòr Edukasaun hala’o vizita kortejia iha EBC Suai Loro. Imajen Tatoli /Celestina Teles.

COVALIMA, 26 maiu 2022 (TATOLI)—Embaixadór Austrália iha Timor-Leste, William Terrence Costello, sente kontente bainhira Eskola Bázika Sentrál (EBC, sigla portugés) Suai Loro implementa programa Apoiu Lideransa liuhosi Mentoria no Aprendizajen (ALMA) ho susesu.

“Ha’u kontente bainhira rona progresu ne’ebé di’ak no pozitu kona-ba programa ami-nian. Ha’u komprende no sente triste bainhira dezafiu ne’ebé mak eskola enfrenta,” Byl Costello bainhira halo vizita kortejia iha Eskola Bázika Sentrál (EBC, sigla portugés) Suai Loro, kinta ne’e.

Tanba, nia dehan, ko’alia kona-ba edukasaun iha dezafiu mak hanesan oinsá atu envolve labarik sira hetan edukasaun no asegura, oinsá kualidade manorin sira atu manorin labarik sira aprende ho di’ak.

Objetivu hosi programa ALMA ne’e atu hanorin no apoiu monorin sira oinsá atu aprende no dezenvolve di’ak liután sira-nia kapasidade, nune’e motiva estudante sira aprende ho kualidade di’ak.

Programa ALMA ne’e atu asiste no ajuda manorin sira mai ho idade ne’ebé foun ho esperiénsia ne’ebé sira iha, nune’e bele akompaña no akonselamentu ba manorin hodi hanorin estudante sira no hala’o servisu manorin ho kualidade.

“Edukasaun importante favór toma atensaun ba imi-nia edukasaun no prosesu aprendizajen agora kedas atu asegura imi-nia futuru ne’ebé ho susesu,” nia dehan.

Embaixadór hato’o apresiasaun espesiál ba profesór sira tanba papel profesór la’ós fasil dala barak la hetan atensaun ne’ebé diak hosi governu maibé hanesan Austrália ida ne’e oinsa atu buka meiu atu apoiu liu tan   asegura servisu ne’ebé kualidade husu atu atende estante ho fuan bo’ot kontinua fó matenek ba estudante no hanorin tuir padraun no kualidade.

 Diretór EBC Suai Loro, Francisco Babo informa, eskola bázika sentrál Suai Loro implementa programa Apoiu Lideransa Mentória no Aprendizajen (ALMA) hosi Austrália ho susesu.

“Ami sente orgulu simu vizita kortejia hosi embaixadór Austrália iha Timor-Leste hodi monitoriza implementa porgrama ALMA ne’ebé durante implementa ajuda hosi ami-nia mentór hodi halo observasaun sala de aula, traballu grupu ba profesór no grupu ba kargu xefia sira, ami hetan susesu,” nia dehan.

Maske EBC Sai Loro implementa programa ALMA ho susesu maibé nafatin hasoru dezafiu hanesan menus sala de aula, ho nune’e profesór sira fahe estudante ba turno dader ho lorokraik no presiza konstrui moru haleu eskola hodi bele evita asidente trafegu no animál sira labele estraga jardin iha eskola.

Tuir dadus estudante, EBC iha Suai Loro hamutuk 703 no hosi númeru ne’e fahe ba turnu dadeer estudante hamutuk 350 no lorokraik 350-resin ho nia profesór 34.

Jornalista : Celestina Teles

Editór     : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here