Desportu eskolár iha RAEOA, ESG Leobeno halakon EGS Haubeno 2-1. Imajen Tatoli/Abílio Elo Nini.

OÉ-CUSSE, 26 maiu 2022 (TATOLI) – Ekipa jogadór futeból hosi estudante Eskola Sekundáriu Jerál (ESG) Leobeno hosi sub-rejiaun Oésilo halakon ekipa hosi Eskola Sekundáriu Gerál Haubeno hosi sub-rejiaun Nítibe iha torneiu desportu eskolár nível sekundáriu iha Rejiaun Administrativa Espesiál Oé-Cusse Ambeno (RAEOA).

Desportu eskolár ne’e realiza durante semana ida, envolve Eskola Sekundáriu hamutuk 11 ne’ebé eziste iha territóriu Oé-Cusse komposta hosi ensinu sekundáriu jerál, sekundáriu privada no tékniku vokasionál.

Jogu ne’e realiza iha kampu futeból Oébau, Rejiaun Administrativa Espesiál Oé-Cusse Ambeno (RAEOA), kuarta ne’e, ekipa jogadór hosi estudante ESG Leobeno ofisialmente lidera provizóriu ho skor 2-1 hafoin halakon ekipa jogadór hosi estudante Haubeno.

Jogu primeira parte ho durasaun menutu 30, ne’ebé dominante hosi ekipa EGS Haubano, tanba jogu foin to’o minutu 21, jogadór Venderinho A. Colo númeru kamizola 9 lansa golu ida, nune’e jogu primeira parte termina ho rezultadu provizóriu 1-0.

Hakat fali ba jogu segunda parte, ho durasaun menutu 30, ekipa ESG Leobeno, hahú hatudu tátika hodi troka jogadór sira. Ho tátika foun ne’e iha duni rezultadu, tanba jogu to’o minutu 25, jogadór Fredi Evaristo Colo númeru kamizola 17 lansa golu ida, hodi muda rezultadu ba 1-1.

Durante jogu segunda parte la’o to’o kompleta tempu minutu 60, ekipa rua hatudu forsa hanesan maskE lansa ameasa ba malu ba gurda sira maibé la rezulta golu ruma, tanba jogu ho durasaun minutu 60, ekipa rua produs rezultadu hanesan, nune’e árbitru aumenta-tán extra time durante minutu 10 hodi buka vensedór.

Nune’e jogu exta time foin hahú to’o minutu 5, ekipa Leobeno lansa golu liuhosi jogadór Okataviano Colo númeru kamizola 15, nune’e rezultadu ekipa Leobeno lidera ho rezultadu 2-1.

Ho rezultadu ne’e, treinadór ekipa jogadór Haubeno, Agelio Toma’e, orgullu tanba ekipa rua hatudu jogu ho disiplina.

“Ha’u hanoin lakon manán ne’e normál iha eventu desportu ida, importante liu atu dezenvolve kualidade desportu ne’e rasik, maka disiplina, kria amizade pás entre foinsa’e sira-ne’ebé eziste iha rejiaun ne’e,” nia katak.

Nu’udar responsável desportu iha eskola ESG Haubeno, nia sujere iha futuru autoridade tenke investe maka’as iha área desportu, nune’e dezenvolve liu-tán talentu foinsa’e sira-nia talent.

Treinadór ekipa jogadór Leobeno, Luis de Jesus Mala, kontente tanba autoridade kria jogu ne’e atu anima komunidade no estudante sira.

“Ha’u hanoin jogu ohin ne’e ekipa rua hatudu duni sira-nia forsa, ita espera jogu ne’e labele para iha tinan ne’e de’it, maibé presiza kontinuasaun, tanba atu prepara fini, liuhosi jogu ne’e, fó espíritu ba mestre sira, aliende hala’o prosesu aprendizajen nomoos prátika liuhosi eventu desportu hanesan ne’e,” nia dehan.

Jogu ho durasaun menutu 70 inklui extra time ne’e, lidera hosi árbitru Rogrigo Teixeira, asistente dahuluk Bendito da Conçeição, asistente daruak Agunstinho Mota.

Jornalista: Abílio Elo Nini
Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here