Ekipa Jestaun Merkadu husu negosiante labele faan sasán iha trotoar leten iha estrada públiku. Imájen Tatoli//Nelia Fernandes.

DILI, 26 maiu 2022 (TATOLI)—Xefe Departamentu Jestaun no Merkadu, Arthur Henriques, informa Autoridade Munisípiu Dili (AMD) liuhosi Departamentu Jestaun no Merkadu sei hasai sirkulár ida hodi bandu loja-na’in sira labele faan ka tau sasán iha trotoar leten.

Notísia Relevante: AMD sei hasai obrigatóriu negosiante faan sasán iha trotoar leten

“Ami sei hasai sirkulár ida ba loja-na’in sira-ne’ebé faan sira-nia sasán sai mai li’ur liu-liu tau iha trotoar leten ne’e. Ami sei haruka sira hatama fali faan iha loja laran,” Arthur Henriques hateten ba Agência Tatoli, iha nia knar fatin, Dili, kinta ne’e.

Pesoál Jestaun no Merkadu aviza ona ba loja-na’in sira iha Díli laran, ne’ebé kompostu hosi loja-na’in xineza sira inklui loja-na’in timor-oan sira.

“Ami kuandu sai ne’e, ami sempre aviza hela de’it ba sira, atu labele tau sira-nia sasán iha trotoár leten. Ida-ne’e ba loja-na’in Xina sira, inklui timor-oan sira bainhira nia kria ambiente ladi’ak iha estrada ibun ka ambiente ordenamentu iha Dili laran ne’e, ladun favorese ba kondisaun saudavel ni’an, ami sei hasai ka sobu,” nia dehan.

Maske nune’e, nia esplika, sirkulár ne’e atu hatun direta ba loja sira, tanba iha sirkulár ne’e ko’alia kona-ba ordenamentu ba sidade Dili liu-liu kona-ba hamoos lixu.

“Tanba, sira (Loja) ne’e dala ruma sira-nia sasán barak, sira hasai hosi kontentór hotu sira bou hela lixu sira iha loja oin. Tanba ne’e, ami hasai sirkulár ne’e atu fó ba sira, se sira la kumpre ami sei foti medida. Medida ami halo ona maibé ema kontinua ulun toos,” nia hateten.

Kona-ba negosiante faan modo iha trotoár leten, nia hatán, negosiante sira faan modo ne’e problemátiku tebes, tanba Jestaun no Merkadu foti ona medida oioin ba sira maibé sira kontinua faan nafatin.

“Ita-nia negosiante faan modo sira-ne’e, ami foti medidas oioin ona ba sira, bainhira ami tun ema laiha. Maibé ami fila sira mai fali ona, ida-ne’e mak risku boot ida ba ami. Tanba, kontrola ami kontrola, foti medida ami foti. Maibé oras ne’ebé ami fila sira kontinua rame-rame fali iha ne’ebá, ida ne’e mak kestaun boot ida ba ami,” nia akresenta.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here