Diretór Servisu Saúde munisípiu Viqueque, Francisco de Carvalho. Imajen Tatoli/Vitorino Lopes da Costa

VIQUEQUE, 25 maiu 2022 (TATOLI)–Diretór Servisu Saúde munisípiu Viqueque, Francisco de Carvalho, informa, kazu dengue ne’ebé daudaun rejista iha rejiaun hamutuk 68.

“Kazu dengue ne’ebé rejista iha munisípiu Viqueque hahú fulan-janeiru to’o maiu hamutuk 68. Provizóriu iha semana ida-ne’e ita seidauk rejista kazu dengue foun no hosi kazu hirak ne’e labarik na’in-rua maka mate,” Diretór Servisu munisipál hateten ba Agência Tatoli, iha ninia knaar fatin, Boro-Matan, kuarta ne’e.

Tuir Francisco de Carvalho, kazu dengue rejistadu maioria idade menus hosi tinan 15, barak liu ho tinan 5, ne’ebé maioria akontese iha postu administrativu Viqueque vila.

“Hosi kazu dengue ne’e ita halo ona investigasaun no ita mós halo intervensaun ba moras ne’e liuhosi programa fumigasaun, inklui halo abastesimentu ba tau iha bee hodi hamate susuk nia oan sira ne’ebé moris iha tanki laran. Ida-ne’e esforsu Servisu Saúde munisípiu Viqueque nian,” nia akresenta.

Notísia relevante: Sentru Saúde Viqueque rejista dengue 31 iha abril

Tuir Diretór, atu kombate moras ne’e tenki iha partisipasaun hosi parte komunidade inklui ekipa saúde halo fumigasaun no abastesimentu.

“Bainhira komunidade la halo impeza iha sira-nia ambiente no uma maka susuk sei nafatin moris. Tanba ne’e, ita tenki hakoi lata mamuk no fase tanki, tanba daudaun ita iha tempu udan, ne’ebé lata mamuk sira tenki kee rai hodi hakoi tiha, se la hakoi lata mamuk maka susuk sei moris iha laran,” nia tenik.

Nune’e, Diretór Servisu munisipál husu komunidade hamoos ambiente no profisionál saúde sira halo intervensaun hodi halakon susuk.

“Bainhira saúde de’it maka halo intervensaun no komunidade sira la halo limpeza mak sei problema. Tanba ne’e, konsiénsia komunidade maka tenki a’as hodi hamoos ambiente. Nune’e, ita bele redús kazu dengue ne’ebé oras-ne’e iha munisípiu Viqueque sei kontinua rejista,” nia tenik.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here