Komandante Operasaun Nasionál PNTL, Superintendente Xefe Pedro Belo. Imajen/ Egas Cristovão

DILI, 25 maiu 2022 (TATOLI)— Komandante Operasaun Nasionál Polísia Nasionál Timor-Leste (PNTL), Superintendente Xefe Pedro Belo, informa situasaun seguransa iha territóriu nasionál la’o hakmatek, iha ámbitu hahú Komemorasaun Restaurasaun Independénsia dala-20 no investidura Prezidente Repúblika, José Ramos Horta.

“Seremónia investidura Prezidente Repúblika halo iha Dili, maibé ita nian komemorasaun loron restaurasaun independénsa 20 maiu ba dala-20 halo iha munisípiu hotu, nune’e Komandu Jerál fó orden ba Komandu Munisípiu hotu atu halo seguransa ba eventu ne’e. Tanba ne’e seguransa iha territóriu nasionál la’o kontroladu,” Komandante Operasaun ne’e hateten ba jornalista sira hafoin ramata enkontru avaliasaun seguransa ba seremonia investidura PR foun no Komorasaun Restaurasaun Independensia, iha Sentru Formasaun Polisia (CFP,sigla portugés)-Comoro, kuarta ne’e.

Nia dehan situasaun la’o normál tanba ho baze ba relatóriu  ne’ebé simu hosi hosi Komandu PNTL munisípiu sira  katak la rejista kazu ruma durante atividade seremonia restaurasaun independénsia no investidura PR foun.

Superintendente Xefe dehan iha dezafiu no obstakulu balun ne’ebé PNTL hasoru iha seremonia investidura PR foun no  komemorasaun restaurasaun independensia iha 20 maiu, maibé kontinua fó seguransa hodi rezulta situasaun la’o di’ak.

“Ita rekoñese iha limitasaun no difikudade liuliu membru PNTL hasoru tanba membru polisia tránzitu la to’o, nune’e ho pasénsia membru polisia balun tenke ajuda  fó apoiu ba seguransa hodi regula karreta motór iha Tasi-Tolu,”tenik Superintendente Xefe Pedro Belo.

Nune’e, Komandante Pedro Belo afirma presiza aumenta tan membru PNTL sira liuhosi rekrutamentu atu iha situasaun sira hanesan bele koloka membru sira atu asegura seguransa.

“Ita hatoo ona preokupasaun sira ne’e liuliu farda ba trázitu sira ba Komandu Jerál atu haree hodi tau konsiderasaun.” nia afirma.

Maski nune’e, Komandu PNTL kontinua husu ba membru sira iha territóriu nasionál kontinua matein orden hodi asegura seguransa ba sidadaun sira hotu hodi moris iha pás no estabilidade.

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here