Diretór PDHJ Territoriál Bobonaro, Domingos Pinto Tavares. Imajen Tatoli/Sérgio da Cruz.

BOBONARO, 25 maiu 2022 (TATOLI) – Hahú hosi fulan-janeiru to’o maiu tinan 2022 Provedoria Direitu Humanu no Justisa (PDHJ) delegasaun territoriál Bobonaro rejista kazu boa governasaun no violasaun direitus umanu hamutuk hitu.

Diretór PDHJ Delegasaun Territoriál Bobonaro, Domingos Pinto Tavares, informa keixa hirak- ne’e barak liu hasoru  funsionariu públiku tanba abandona serbisu no ajente Polísia Nasionál Timor-Leste balun halo agresaun fíziku hasoru komunidade sira.

PDHJ Delegasaun Territoriál Bobonaro ninia área jurizdisaun ne’e kobre munisípiu tolu mak hanesan, Munisípiu Covalima, Ermera no Bobonaro, maibé provizóriu to’o agora seidauk simu keixa ruma hosi munisípiu Ermera.

“Keixa hitu ne’e mai hosi munisípiu Covalima ida ho tipu keixa governasaun di’ak, depois neen ne’e hosi Bobonaro hotu ho tipu keixa violasaun direitu umanu haat no boa Governasaun rua,” nia informa ba Tatoli, iha kna’ar-fatin, Soso, Maliana, kuarta ne’e.

Nia akresenta, prosesu ba kazu hirak-ne’e aprezenta no rejista ona iha diresaun asisténsia públika nasionál no daudaun ne’e entrega ona karta notifikasaun primeiru ba kesar-na’in sira hodi hein fali notifikasaun segundu durante semana fulan-ida semana rua, hahú loron ida hatama keixa hamutuk loron 45 atu hatete ba kesar-na’in katak keixa sira-ne’e prosesu ona.

Domingos fundamenta, prosesu ba keixa ne’e iha oin tolu, ida sei lori ba Komisaun Jestaun Kesar (KJK) atu deside estatutu hosi kazu ne’e, ne’ebé envolve ema na’in-tolu mak hanesan Provedora Direitu Humanu no nia ajuntu na’in-rua ida foka ba asuntu boa governasaun no direitu umanu mak sei uza sira-nia kompeténsia hodi deside katak keixa hirak-ne’e konsidera sai kazu ka lae.

“Se kesar ne’e mak sai kazu ne’e katak kesar ne’e sei lori ba prosesu investigasaun ka prosesu mediasaun no konsiliasaun, maibé sé keixa ne’e la sai kazu entaun kesar ne’e la tama iha mandadu provedoria nian entaun Komisaun Jestaun Kesar sei deside taka no haruka fali ba instituisaun relevante,” nia heteten.

PDHJ husu ba komunidade no entidade hotu iha área jurizdisaun munisípiu tolu hanesan Ermera, Bobonaro no Covalima atu respeita nafatin ema-nia integridade fízika no liberdade sirkulasaun, atubele proteje direitu umanu inklui promove boa governasaun iha Timor-Leste.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here