Arguidu ANN bainhira PCIC detein no halo buska apreensaun ba fatin jogu kasino iha Vila Nova, Baucau, kuarta (25/05). Imajen Tatoli/Natalino Belo.

BAUCAU, 25 maiu 2022 (TATOLI) – Polísia Sentífika Investigasaun Kriminál (PCIC, sigla portugés) hamutuk no komandu Polísia Nasionál Timor-Lese (PNTL) munisípiu Baucau, kuarta ne’e, ezekuta mandadu hosi tribunál hodi halo buska domisiliáriu, apreensaun no detensaun ba arguidu AAN nu’udar na’in ba jogu kasino iha Baucau.

Tribunál Distritál Baucau (TBD) liuhosi karta mandadu buska domisiliáriu no apreensaun ho númeru Nuc 0307, 0308, 0309/02 PCCIC ne’ebé mak fó-sai atu halo buska domisiliáriu no apreensaun ba sasán ne’ebé ligasaun ho faktu ne’ebé investiga ona tuir Konstitusaun RDTL artigu 37 númuru 2 ba suspeitu insiál ANN.

Fatin jogu kasino ne’ebé PCIC halo buska aprensaun no detensaun ba suspeitu ANN iha Vila Nova Baucau, kuarta (25/05). Imajen Tatoli/Natalino Belo.

Orden halo buska konsede iha aktu inkéritu nian ne’ebé investiga hela suspeitu kona-ba autoria krime falsifikasaun dokumentu no esplorasaun jogu ilísitu tuir kódigu penál artigu 302 númeru 1 no artigu 322.

Nune’e mós TDB fó-sai mandadu detensaun ba arguidu tanba deskonfia halo krime falsifikasaun dokumentu, notasaun téknika no esplorasaun jogu ilísitu ne’ebé previstA iha kódigu penál artigu  302 númeuru 1 no artigu 322 katak sei hala’o interrogatóriu dahuluk iha oras 72 laran hafoin detensaun.

Ekipa PCIC no komandu PNTL Baucau to’o fatin jogu ne’ebé lokaliza iha aldeia Lutumutu, suku Tirilolo, postu administrativu Baucau vila, purvolta oras 11:00 no direitamente hala’o identifikasaun evidénsia hanesan mákina jogu kasino rolete 1, slot 10 totál hamutuk 11.

“Iha indikasaun krime ilísitu nune’e Ministériu Públiku promove ba tribunál no emite mandadu detensaun no buska domisiliáriu ba arguidu ANN, ida-ne’e buska ba daruak,” Xefe Investigasaun PCIC, Floriano Guterres hateten iha Vila Nova, kuarta ne’e.

Ekipa PCIC kaptura suspeitu iha munisípiu Covalima iha loron tersa, 24 maiu purvolta 17:30 no kontinua kedas transporta ba Baucau hodi buska fatin jogu iha nia rezidénsia Vila Nova, Baucau.

PCIC mós hala’o apreensaun ba dokumentu ne’ebé ligadu ho atividade jogu no direitamente dada liña polísia iha fatin jogu hodi asegura evidénsia sira-ne’ebé halo apreensaun.

iha fulan-marsu 2021 liubá, PCIC halo buska no apreensaun no tribunál rasik válida objetu sira-ne’ebé utiliza iha jogu maibé suspeitu muda evidénsia mákina hosi nia fatin laiha autorizasaun hosi tribunál no kontinua hala’o atividade komérsiu maske prosesu justisa iha tribunál seidauk finaliza.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here