Inspetór Jerál no Prezidente Komisaun Monitorizasaun no Fiskalizasaun ba Implementasaun Medida Sosio-Ekonomia MESSK, Higino Alves. Imajen Tatoli/Francisco Sony

DILI, 25 maiu 2022 (TATOLI) – Inspesaun Jerál hosi Ministériu Ensinu Superiór, Siénsia no Kultura (IJ-MESSK) haruka fila relatóriu ezekusaun izensaun propina hosi Universidade Nasionál Timor Lorosa’e (UNTL) no Universidade Dili (UNDIL) nian tanba relatóriu sira-ne’e la kondiz ho lista manuál pagamentu propina ba estudante sira.

Bazea ba diploma ministeriál númeru 34 ne’ebé atribui serbisu ba iha komisaun monitorizasaun no fiskalizasaun ba pagamentu daruak semester-pár. Hosi diploma ministeriál ne’e relata prosesu pagamentu izensaun propina to’o loron 90 no aumenta tán loron 15 hodi prepara relatóriu tanba ne’e maka prosesu pagamentu ne’e hahú hosi janeiru to’o marsu depois abríl universidade sira tenke submete sira-nia relatóriu.

Inspetór Jerál MESSK, Higino Alves, esplika Timor-Leste iha instituisaun no universidade 18 mak eziste hosi instituisaun ensinu superiór 18 ne’e kuaze hetan ona apoia transferénsia orsamentu ba konta bankária idak-idak nian hodi hala’o pagamentu propina ba estudante sira tuir dadus ne’ebé maka submete ona ba Ministériu Ensinu Superiór no Ministériu Finansa.

Maibé hosi totál IESPP 18 ne’ebé eziste no simu ona transferénsia subsídiu ne’e kuaze instituisaun Ensinu 16 mak kompleta ona sira-nia relatóriu no hela de’it Universidade de Dili (UNDIL) no Universidade Nasionál Timór-Lorosa’e (UNTL) maka sira-nia relatóriu tenke haruka fila tanba la kondiz ho lista manuál ne’ebé iha.

“Loloos ne’e UNDIL no UNTL mós submete ona sira-nia relatóriu izensaun propina ba mai ministériu maibé sira-nia relatóriu maka la kondiz ho manuál tanba ne’e maka ami devolve fila fali sira-nia relatóriu ne’e atu ba hadi’a depois maka bele submete mai fali,”  Inspetór Higino ba Tatoli iha ninia servisu fatin Kolmera, kuarta ne’e.

Nia fó-sai katak, UNTL nian kuaze lista pagamentu ne’e estudante barak mak la asina, iha lista ne’e sira tau ona vistu katak estudante sira asesu ona ba pagamentu propina, maibé estudante sira la asina ho razaun estudante sira-ne’e sei hala’o hela estájiu tanba ne’e mak ministériu husu ba UNTL atu buka tékniku oinsá hodi bele hetan fila-fali estudante sira-ne’e.

Tanba ezijénsia Ministériu Finansa nian husu bainhira IESPP sira atu hato’o relatóriu ne’e tenke aprezenta mós ho evidénsia, ne’e duni IJ-MESSK tenke devolve fila-fali UNTL ho UNDIL nian relatóriu ne’e.

“Ha’u halo ona kontaktu parese ohin ka aban sira bele submete fila-fali relatóriu mai ministériu, maibé kuandu laiha maka IJ sei hatún fila-fali ekipa ida hodi ba halo justifikasaun ba sira,” nia tenik.

Tuir dadus estudante hosi IESPP 18 ne’ebé iha direitu atu hetan pagamentu izensaun propina ne’e hamutuk estudante 66.106 bazea dadu ne’e maka Ministériu Finansa prevee orsamentu $5,428,394.00 hodi halo transferénsia ba konta bankária instituisaun idak-idak nian. Maibé realidade hatudu depois iha ezekusaun ne’e kuaze estudante 15.466 mak hetan direitu ba pagamentu ho totál osan $3.155,766.00. Enkuantu estudante 10.997 lakon direitu ho nune’e IESPP 18 tenke devolve fila-fali metade osan $1.024,593.00 s ba kofre estadu.

Jornalista   : Tomé Amado

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here