Ministru Edukasaun Juventude no Desportu, Armindo Maia, Imajen Tatoli/Antonio Daciparu.

DILI, 25 maiu 2022 (TATOLI) – Ministériu Edukasaun Juventude no Desportu (MEJD) tempu besik sei distribui kadeira no meza 5,000 ba eskola ensinu báziku no ensinu sekundáriu públiku atu fasilita estudante sira iha prosesu ensinu aprendizajen aula prezensiál. 

Ministru Edukasaun Juventude no Desportu (MEJD), Armindo Maia hateten totál kadeira no meza ne’ebé Ministériu order ona hamutuk 20,000. Maibé agora daudaun ne’e governu TL liuhosi Ministériu Edukasaun sei simu uluk kadeira no meza hamutuk 5,000, mobiliáriu sira-ne’e sei distribui ba eskola antigu sira-ne’ebé laiha kadeira no meza inklui mós eskola foun sira-ne’ebé foin harii.

“Daudaun ne’e kadeira no meza hamutuk 5,000 maka iha ona dalan, iha semana kotuk ha’u foin simu informasaun katak mobiliáriu kadeira no meza sira-ne’e tula ona iha ró. Espera tempu besik bele to’o ona iha portu Dili atu nune’e ita bele halo distribuisaun ba eskola sira-ne’ebé laiha kadeira no meza,” Ministru Armindo ba jornalista sira iha Palásiu Governu, kuarta ne’e.

Ministru Armindo haktuir, mobiliáriu sira ne’e hatama liuhosi kompañia maibé kompañia ne’ebé maka hatama kadeira no meza nia rasik ladún hatene maibé mobiliáriu sira-ne’e sosa iha nasaun Indonézia.

Enkuantu Ministériu Edukasaun sosa tán kadeira no meza 20,000 hosi nasaun li’ur, maibé iha Ministériu Edukasaun nia laran rasik, Diresaun Nasionál Tékniku Vokasionál kontinua rekolla kadeira no meza aat iha eskola sira hodi lori ba eskola tékniku vokasionál grupu teknolojia indústria atu halo reparasaun.

Rezultadu sira ne’e hatudu kuaze kadeira no meza aat liu 400 maka estudante sira iha eskola TEKVOK Bekora hadi’a hotu ona, oras ne’e hein de’it serimónia entrega ba Ministériu Edukasaun hodi kontinua halo distribuisaun ba eskola sira-ne’ebé maka menus kadeira no meza .

Jornalista: Tomé Amado

Editor: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here