Logotipu La'o Hamutuk. Imajen/Espesiál

DILI, 25 maiu 2022 (TATOLI)—Organizasaun Naun Govermentál (ONG) La’o Hamutuk apresia proposta-lei grande opsaun planu tinan 2023 tanba Governu esforsu hatudu realidade no situasaun loloos hosi finansa Estadu.

Notísia Relevante: PN hahú audiensia públika ba proposta-lei Grande Opsaun Planu 2023

“La’o Hamutuk apresia katak liuhosi proposta-lei grande opsaun planu 2023 ne’e, Governu esforsu atu hatudu realidade no situasaun loloos hosi finansa Estadu inklui fó projesaun katak Fundu Petrolíferu sei mamuk molok tinan 2035, no realidade reseita hosi produsaun mina no gás nafatin hatudu tendénsia tun,” Peskizadora La’o Hamutuk, Eliziaria Febe Gomes, hateten liuhosi konferensia imprensa ne’ebé hala’o iha Bebora, Dili, kuarta ne’e.

Iha 24 fulan-maiu, ONG La’o Hamutuk hato’o karta aberta ida ba deputadu/a Parlamentu Nasionál kona-ba proposta-lei grande opsaun planu 2023. Ho karta ida-ne’e, La’o Hamutuk hakarak atu kontribui ba avaliasaun no diskusaun ba dezeñu dirasaun Polítiku ida-ne’ebé realistíku, ekitável no sustentável liu ba Timor-Leste.

Iha karta aberta refere, La’o Hamutuk husu Ministériu Finansa atu hadi’a no atualiza informasaun kona-ba projesaun ba despeza no reseita ba futuru.

La’o hamutuk nota katak proposta-lei ida-ne’e uza dadus finanseiru ne’ebé la inklui impaktu hosi Orsamentu Retifikativu 2022, ne’ebé aumenta OJE 2022 ba biliaun $1,24. Iha ezbosu lei nia laran, iha mós informasaun ne’ebé la konsistente no La’o Hamutuk preokupa katak projesaun ba reseita iha futuru inklui reseita la mai serteza ka laiha evidénsia.

Iha karta aberta ne’e, La’o Hamutuk inklui informasaun kle’an tan kona-ba preokupasaun hirak ne’e no husu Ministériu Finansa atu fornese informasaun kompletu kona-ba sira-nia estimasaun hirak ne’e atu ajuda Membru Parlamentu no públiku bele avalia proposta ida-ne’e no komprende realidade situasaun finansa Estadu, inklui impaktu hosi proposta lei ida-ne’e.

Maske La’o Hamutuk apresia katak, proposta-lei grande opsaun planu 2023 kria oportunidade atu estabelese planu integradu ne’ebé kontribui ba objetivu espesífiku, La’o Hamutuk observa katak proposta-lei ne’e sita medida 263.

Ne’e signifika katak proposta lei ida-ne’e falta atu identifika “Opsaun Prinsipál” maibé inklui lista medida barak lahó indikasaun medida ka programa saida mak sei hetan prioridade ka alokasaun boot liu.

“Iha karta aberta, ami identifika proposta programa ruma ne’ebé importante liu atu sai prioridade iha OJE 2023, inklui agrikultura ne’ebé orienta ba konsumsi lokál, edukasaun, saúde no bee mós no saneamentu. Hafoin Fundu Petrolíferu mamuk, sei laiha osan tan atu investe iha setór xave sira. Nune’e, mak ita presiza uza oportunidade ida-ne’e atu investe iha povu,” Peskizadora La’o Hamutuk ne’e akresenta.

Nune’e, iha karta aberta refere, La’o Hamutuk mós identifika proposta programa balun ne’ebé konsidera labele sai prioridade iha OJE 2023, inklui Aeroportu Regionál sira no komponente Projetu Tasi Mane.

Ezemplu, ezbosu lei ida ne’e inklui “aquisição de terrenos e reassentamento da população”, maibé Projetu Tasi Mane iha hela inserteza. laiha razaun atu aloka osan ba dezlokasaun komunidade se viabilidade projetu ne’e seidauk klaru.

“Tanba ne’e, presiza prioritiza estudu independente kona-ba kustu, benefísiu no risku molok aloka osan tan ba implementasaun, hanesan ANPM no Timor GAP fó komitmentu atu realiza. Tuir mai, proposta Lei ida-ne’e mós inklui estensaun auto-estrada iha Costa Súl ne’ebé liga ho Projetu Tasi Mane. Tanba, konstrusaun faze primeiru realiza ho kustu tokon $350 ba kilómetru 30 de’it, ho kualidade ne’ebé ladi’ak no daudaun ne’e kondisaun balun hahú aat ona,” nia dehan.

Se Governu propoin atu kontinua harii auto-estrada ida-ne’e, karik kustu tomak bele to’o $1,3 biliaun, maske estudu independente ba projetu ida-ne’e seida’uk hala’o tanba mosu dúvida boot, benefísiu saida mak sei fó ba povu no oinsá mak impaktu ba sustentabilidade finanseiru.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here