Progresu konstrusaun postu saúde, iha suku Builale, kuarta (25/05). Imajen Tatoli/Vitorino Lopes da Costa

VIQUEQUE, 25 maiu 2022 (TATOLI)–Konstrusaun fíziku postu saúde no rezidénsia ba profesionál  iha suku Builale, postu administativu Ossu, munisípiu Viqueque, daudaun ne’e atinje ona 51,24%.

“Kustu ba obra ne’e hosi Orsamentu Jerál Estadu (OJE) 2021 ho montante $327.232,66, ne’ebé responsável hosi empreza Borala, Lda, hahú konstrusaun iha loron 25 fevereiru no ramata 24 juñu 2022,” Diretór Servisu Saúde munisípiu Viqueque, Francisco de Carvalho, hateten ba Agência Tatoli, iha ninia knar fatin, Boro-Matan, tersa ne’e.

Notísia relevante: MS kontinua kontrata profisionál saúde 1.081 atende COVID-19

Tuir dadus sensu populasaun tinan 2015, totál populasaun suku Builale hamutuk 1.137, kompostu hosi mane 574 no feto 563, ho totál uma-kain 222, ne’ebé bainhira postu saúde Builale ramata sei benifisia populasaun sira.

Aleinde ne’e, Servisu Saúde Viqueque kontinua  esforsu halo konstrusaun postu saúde Uaimori no Uabubo iha postu Ossu, nune’e husu apoiu ona ba Embaixada Japaun.

“Esforsu seluk ne’ebé ami halo ba konstrusaun postu saúde sira maka ami halo proposta ba Embaixada Japaun iha Timor-Leste hodi harii postu saúde Uabubo no Uaimori Tula, maibé Embaixada foin aprova konstrusaun postu saúde Uaimori. Ita asina ona nota entendementu no hein halo konstrusaun, ne’ebé sei la liu hosi empreza ruma, maibé obra ne’e Organizasaun Naun Govermental (ONG) sira  maka halo,” nia hato’o.

Antes ne’e, Embaixada Japaun ajuda ona konstrusaun postu saúde Buanurak iha tinan 2017 no daudaun halo ona operasaun.

“Iha tinan ne’e, ita hetan tan ajuda hosi komunidade Japaun hodi harii  postu saúde iha Uaimori,” Diretór tenik.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here