Estudante sira hosi EBF Fatukenfua iha RAEOA tuur de’it rai hodi tuir prosesu aprendizajen. Imajen espesiál.

OÉ-CUSSE, 25 maiu 2022 (TATOLI) – Komunidade suku Usitaku, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), voluntária kontribui osan no materiál konstrui sala emerjénsia ba Eskola Bázika Filiál (EBF) Fatukenfua.

“Provizoriamente sala rua primeiru-anu ho segundu-anu daudaun iha li’ur ai-mahon, tanba sala mak lato’o, ami rona ona rezultadu hosi Sekretáriu Rejionál ba Asuntu Edukasaun katak, hatama ona iha planu orsamentu 2023, maibé loron moos ba daudaun kuandu tama iha tempu udan, ha’u-nia estudante sira-ne’e oinsá,” Koordenador EBF Fatukenfua, Baptista Lelan, informa ba Agência Tatoli iha Oé-Cusse, kuarta ne’e.

Estudante sira hosi EBF Fatukenfua iha RAEOA tuur de’it rai hodi tuir prosesu aprendizajen. Imajen espesiál.

Nia informa, sala aprendizajen iha EBF Fatukenfua tolu de’it, klase terseiru-anu no sestu-anu tama iha sala idak-idak no no klase kintu-anu, sestu-anu tama hamutuk iha sala-ida.

Atu rezolve situasaun ne’e parte eskola konvida autoridade komunitáriu sira, iha ona resposta, komunidade kontribui materiál no funsionáriu iha suku Usitaku kontribui osan halo sala emerjénsia.

“EBF Fatukenfua simu ona akredita ona ba II siklu, primeiru-anu to’o sestu-anu ho totál estudante hamutuk 113, maibé sala aprendizajen tolu (3) de’it, totál profesór na’in-neen (6) kontratadu na’in-lima (5) no permanente ida (1) no guarda ida. Entaun ha’u tenke ko’alia sai nune’e parte relevante sira atu hanoin no tau matan ba eskola ida-ne’e,” nia katak.

Xefe suku Usitaku, Hilario Babo, informa, autoridade komunitaríu iha ona konkordánsia ho komunidade Usitaku, kona-ba inisiativa voluntária atu halo uma permanente ida tanba hein prosesu Governu kleur.

“Ami enkontru ona iha konkordánsia halo permanente, liuhosi kontribuisaun voluntariamentu, agora ami rekolla hela kontribuisaun sira, ba komunidade sira prepara ona ai-rín, funsionáriu apoiu osan, atu hola simentu, kalen, pregu, fatuk no rai-henek, tanba tuir planu ami sei hahú kontrusaun iha juñu, no traballadór mai hosi komunidade Usitaku,” nia katak.

Antes ne’e Sekretária Rejionál ba Asuntu Edukasaun no Solidariedade Sosial Inkluzaun (SRESS), Avelina da Costa, rekoñese kondisaun eskola EBF, Fatukenfua, nune’e autoridade RAEOA ne’e prevista ona iha planu kontrusaun no reabilitasaun iha orsamentu Jerál Estadu (OJE) tinan fiskál 2023 nian.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here