Diretór Ezekutivu Asisuasaun HAK, Sisto dos Santos. Imajen Tatoli/Francisco Sony.

DILI, 25 maiu 2022 (TATOLI)-Organizasaun Naun Govermentál HAK, kuarta ne’e, lansa livru no pamfletu kona-ba “Asuntu BESI” ba komunidade iha munisípiu Liquiça no Manufahi.

Diretór Ezekutivu HAK, Sisto dos Santos, hateten HAK no parseriu apoiante tomak iha nível lokál to’o nível internasionál ba períodu tinan ida no tinan rua konsege konklui informasaun báziku ruma, ne’ebé foin inísiu ida atu hakle’an informasaun báziku ruma.

“Informasaun báziku ida-ne’ebé mak ba ita-nia “Asuntu BESI” = asuntu bee moos, saneamentu no ijiene. Tanba, dala barak ita-nia persepsaun ne’ebé sirkula iha ita-nia komunidade no sosiedade permaturamente ita julga katak bainhira bee la mai ne’e ita julga parte seluk,” Sisto dos Santos, hateten liuhosi nia diskursu iha serimónia Lansamentu Livru no Pamfletu Asuntu Besi, iha salaun HAK, Díli, kuarta ne’e.

Maibé informasaun sira-ne’e mós, nia dehan, komunidade konsume rohan de’it hosi parte balun tanba la koko no hakle’an parte ida-ne’ebé mak seida’uk hakonu rasik, hahú hosi sira-ne’ebé mak konsumidór, ema sira ne’ebé atu tau matan, ema ne’ebé atu kontrola no hahú hosi ema-ne’ebé iha poder polítika, atu deside asuntu BESI ida-ne’e.

“Nune’e, ba HAK no ekipa iha sosiál ida katak ita presiza sirkula informasaun simples ruma, atu sai referénsia ba ita maibé nia alvu ba ita-nia komunidade sira,” Sisto dos Santos hateten.

Iha livriñu ne’e, iha imajen balun ne’ebé mak komunidade sira asesu hela no oinsás atu konserva no tau matan ba sira-nia bee-matan tanba sira mós iha obrigasaun ida atu asegura sustentabilidade bee-matan ida-ne’ebé mak Ajénsia no Governu instala ona.

“Maibé, ita-nia komunidade balun nakar uitoan, hanesan sira ba destroi kanu sira, ida-ne’e tuir loloos kompeténsia ita-nia polísia mak atu tau matan. La presiza líder komunitáriu tenke keixa, la presiza ita-nia tia no tiu sira tenke keixa maibé bainhira polísia hatene ida-ne’e nu’udar krime ida, ita tenke lori ba oin,” nia dehan.

Iha seluk, fornesidór sira iha nível munisípiu seida’uk halo ho másimu sira-nia servisu hodi kontrola, tanba mós iha limitasaun rekursu sira.

“Agora ita labele ezije de’it ita-nia fornesidór sira atu ba kontrola grupu maneza fasilidade iha sistema bee ida-idak nian. Sira defaktu tinan naruk nia laran sira iha limitasaun barak, mina ne’ebé atu ense ba iha motor mós mina laiha, ida-ne’e difikuldade boot ida. Fundu ida ne’ebé ita-nia fornesidór sira atu uza mós la sufisiente, iha nível grupu maneza fasilidade ami hanoin katak tempu naruk sira voluntáriu pelemenus iha buat ruma ne’ebé insentiva sira, atu nune’e sira la mantein ho voluntariu ne’e,” nia hateten.

Iha parte seluk, HAK mós haree katak Parlamentu Nasionál hahú mellora hodi prióritiza no agradese tebes tanba 20 maiu ne’e, Nai Prezidente Repúblika, José Ramos Horta sita ida-ne’e, entaun ida-ne’e sai asuntu prióridade ba Estadu, Nasaun no ba desizaun Nai ulun boot sira liu-liu Prezidente Repúblika.

“Ha’u ho ekipa hanoin katak ne’e momentu ida livriñu ida-ne’e ho pamfletu oituan tan ita mós sei lansa video ne’ebé mak ba ita-nia kolega hosi Care Internasionál, ne’e matéria ida ne’ebé mak ba akademista, jornalista no públiku hotu-hotu atu haree liu-liu ba konsumidór ka ita-nia komunidade no mós ba ita-nia membru Parlamentu Nasionál sira,” nia dehan.

Tanba ne’e, HAK hanoin katak ne’e temou ona maske informasaun simples maibé diagnosa ne’ebé ita hatudu ona, simplesmente bele indika katak iha problema bee-moos ne’e nia problema iha asuntu ida-ne’ebé no iha fatin ne’ebé.

“Nune’e livru ne’e iha sitema bee moos, KPK hamutuk 41 iha munisípiu rua (2) mak Liquiça no Manufahi, maibé nia períodu ne’ebé HAK ho ekipa sira halo hahú hosi tinan 2021 to’o 2022,” nia informa.

Maske nune’e, informasaun ne’e foin inísiu no nesesáriu atu hakle’an tan, atu nune’e hariku tan deskobrimentu sira atu bele ajuda líder foti desizaun sira-ne’e, maibé sira-ne’ebé konsimodór mak tenke sai mós autór ida atu ezije ba sira-ne’e foti desizaun ne’e.

Prezidente Konsellu Administrasaun Bee Timor-Leste, Empreza Públika (BTL, E.P), Carlos Peloi dos Reis, hateten Sosiedade Sívil foti nia papél importante liu mak dala ruma koko atu bele halo buat ruma iha sosiedade nia leet no nia prátika di’ak sira atu bele foti sa’e, mak bele komunika barak liu ho Orgaun Estadu sira.

“Maske BTL hanesan Empreza Públiku maibé ita hatene BTL ne’e hanesan harii ho desizaun Estadu nian, entaun iha poder atu bele rona ita-nia hanoin,” nia dehan.

Kartaun pontuasaun komunidade ne’e, hanesan meiu ida-ne’ebé Sosiedade Sívil halo hamutuk ho komunidade depois bele deteta buat ruma, nune’e saida mak detekta ne’e bele sai deskobertura ne’ebé orsida bele informa ema polítika na’in sira, bele informa ema sira toma desizaun, bele informa ema sira mak halo planeamentu ba Nasaun ida-ne’e liu-liu iha Bee Saneamentu no Hijiene.

“Hau hanoin lansamentu ida ohin ne’e, hanesan parte ida-ne’ebé mak konkretiza povu nia lian. Maske ida reprezentantivu mak Orgaun Estadu sira liu-liu Parlamentu, ita Sosiedade Sivil dala ruma ita la foti knar reprezentasaun sira-nian maibé ita nafatin hatutan lian sira-ne’ebé mak mosu iha baze, hodi influénsia nível desizaun polítika sira,” nia dehan.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here