Grupu Fitun Enklave aprezenta teatru anima komunidade iha enseramentu feira produtu lokál. Imajen Tatoli/Abílio Elo Nini.

OÉ-CUSSE, 25 maiu 2022 (TATOLI) – Grupu Teatru Fitun Enclave, aprezenta teatru iha eneseramentu feira produtu lokál hodi anima komunidade no estudante sira kona-luta asesu ba edukasaun, iha Rejiaun Administrativa Espesiál Oé-Cusse Ambeno (RAEOA).

Koordenadór Grupu Teatru Fitun Enclave, Baptista Lelan, informa, iha feira produtu lokál ne’ebé autoridade realiza iha ajenda barak ne’ebé envolve másimu estudante iha kompetisaun solu fokál, kestionáriu (cerdas cermat), toka múzika no homan.

Entaun estudante kalan-kalan partisipa másimu, maka Grupu Teatru Fitun Enclave, aprezenta teatru ida hodi anima komunidade sira inklui estudante sira, ho objetivu oinsá luta atu asesu ba edukasaun liuhosi tentasaun no impedimentu.

Tanba dalaruma akontese tentasaun kulturál, hola malu sedu, no tentasaun ekonomia la sufisiente atu dudu oan sira ba eskola.

“Objetivu hosi teatru ne’e atrai no enkoraja estudante sira, nia talentu profisionál nomoos motiva sira oinsá bele luta atu hetan edukasaun ne’ebé di’ak, objetivu seluk atu fó hanoin ba inan-aman sira-ne’ebé autoriza oan-sira kalan-kalan mai iha feira ne’e, tanba balu nia intensaun katak, labarik sira mai iha bazar kalan ne’e atu ba joga ilegál sira hanesan kuru-kuru no bola guling,” Baptista Lelan, ko’alia hafoin aprezentasaim teatru iha enseramentu feira produtu lokál iha Palaban Oé-Cusse, tersa ne’e.

Tuir nia, atu hakatliu hosi impedimentu no tentasaun hirak-ne’e, maka família persiza iha komunikasaun ne’ebé forte, tanba daudaun ne’e akontese impedimentu oinoin, balu hola-malu sedu, ka envolve traballadór infantíl, maibé laiha interese ba labarik sira-nia futuru.

Nu’udar Oé-Cusse oan, agradese ba autoridade RAEOA lideradu Prezidente Autoridade RAEOA, realiza feira produtu lokál ne’e, hodi selebra loron resturasaun independénsia 20 maiu, ho atividade oinoin.

Prezidente Komisaun Organizadora, Pedro da Silva, atuál Sekretáriu Rejionál ba Asuntu Komérsiu no Indústria, orgullu tanba teatru ne’ebé aprezenta maske ho kómiku maibé iha nia sentidu ne’ebé interesante ba motivasaun nian.

“Ita espera liuhosi komedi ne’e, bele hetan ona esperiénsia ona oinsá familia ida luta hosi buat ne’ebé simples, atu asesu ba edukasaun to’o hetan nia rezultadu ne’ebé família nia mahi ba futuru,” nia orgullu.

Grupu Teatru Fitun Enclave ejiste iha Oé-Cusse, hahú iha 2004 ne’ebé aprezenta promosaun liuhosi teatru  kona-ba saúde, edukasaun, agrikultura no setór seluk ho totál membru na’in-10.

Feira produtu lokál ne’e, realiza durante loron 10, hahú 15 to’o 25 maiu, ho objetivu promove talentu juventude, grupu kooperativa inklui promosaun produtu lokál Oé-Cusse nian.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here