Labarik faan Has iha Mekadu Taibesi. Imajen Tatoli/Francisco Sony.

DILI, 24 maiu 2022 (TATOLI), Reprezentante UNICEF iha Timor-Leste, Bilal Durrani, hateten lei protesaun labarik no foinsa´e iha perigu, lei justisa juvenil, Kódigu kriansa, dekretu lei Kódigu internasionál komérsiu substitutu leite maternu, ne´ebé durante ne´e pendente fó impaktu ba labarik sira nia moris.

“Ministériu relevante sira tenke fasilita no aprova lei pendente sira, tanba to’o ohin loron iha impaktu ba labarik timoroan sira-nia moris. Hanesan ezemplu: Lei Protesaun Labarik no Foinsa’e iha Perigu, pendente hahú 2017, Lei Justisa Juvenil – pendente hahú 2010, Códigu da Criança – pendente hahú 2010, Dekretu lei kona-ba Código Internacional de Comercialização de Substitutos do Leite Materno ne’ebé pendente hahú 2010”, rekorda Bilal hateten iha nia diskursu, iha Ministériu Finansa, Aitarak-laran, Dili.

Prezidente Instituto para a Defesa dos Direitos da Crianças INDDICA, Dinorah Granadeiro, ministériu hotuhotu mai iha ne’e hodi dizemina ba análiza situasaun labarik iha rai-laran.

“Objetivu ohin loron nian mak ita halo dizeminasaun ba liña ministériu sira liuliu iha diresaun planeamentu tanba análiza ba sitausaun labarik iha Timor-Leste hanesan dadus ida-ne’ebé Ministériu Finansa liuhosi Diresaun Estatístika servisu hamutuk ho INDDICA atu haree labarik iha setór hanesan nutrisaun, saneamentu no ijiene hodi oinsá halo prevensaun no protesaun diresaun planeamentu mak sai xave hodi ministériu dezenvolve sira-nia planu no orsamentu ba ita-nia alvu sira atu hasa’e sira-nia koñesimentu ba diretór sira liga ho situasaun labarik sira-nian”, refere Dinorah.

Tanba tuir dadus ne’ebé mak INDDICA iha 48% hosi labarik sira sei moris iha má nutrisaun, kiik nia-laran. Ida-ne’e sai evidénsia ida ba Estadu oinsá hasai kiak maibé mekanizmu no situasaun oinsá mak redúz problema refere.

“Ita labele halakon dala ida maibé presiza la’o neineik no ba beibeik sei normaliza mak presiza servisu hamutuk ho ministériu elevante sira hanesan Ministériu Solidariedade Sosiál no Inkluzaun (MSSI), Ministériu Justisa (MJ), Ministériu Edukasaun Juventude no Desportu (MEJD), Ministériu Saúde (MS) mak sai xave ba asuntu labarik nian”, revela.

Tanba ne’e, Dinora husu ba ministériu sira presiza atu monitoriza no aloka orsamentu ba labarik sira-nia nesesidade. Introdusaun Chaild Marker husi Ministeriu Finansa tenke fasilita ida-ne’e.

“Bazeia ba evidénsia hodi garante katak Timor-Leste nia jerasaun tuir mai ne’e hetan protesaun husi konsekuensia raes, badak, krekas, moras, violénsia, no falta edukasaun, tanba ne’e rekomendasaun sira husi relatóriu ne’e mak análiza situasaun labarik fornese asaun konkreta sira”, konklui.

Jornalista : Osória Marques

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here