Pontu Fokál RHTO, Honório Gusmão. Imajen Tatoli/Celestina Teles.

COVALIMA, 24 maiu 2022 (TATOLI)—Pontu Fokál Organizasaun raes Hadomi Timor Oan (RHTO), Honório Gusmão, informa RHTO durante ne’e rejista ona ema ho difisiénsia na’in-304 iha munisípiu Covalima.

“Durante ne’e ami rejista ema ho difisiénsia hamutuk na’in-304 no hosi númeru ne’e na’in-rua (2) mak mate  ona. Entaun, ema ho defisiénsia iha munisípiu Covalima hamutuk na’in-302,”  Honorio Gusmão informa Agência Tatoli, iha sede suku Ogues, postu administrative Maucatar, tersa ne’e.

Bazea ba regra bainhira ema ho difisiénsia atu hetan subsídiu hodi Governu haree ba sira-nia kondisaun no hasai atestadu médiku grau III mak iha direitu hetan subsídiu hosi Governu, bainhira grau I no II sira la iha direitu atu hetan subsídiu maibé hetan de’it apoiu umanitáriu hosi Governu.

Tuir dadus ne’ebé mak RHTO rejista iha Covalima, ema ho difisiensia barak liu iha postu administrativu Maucatar, hanesan iha suku Matai, Ogues, iha postu Tilomar iha suku Maudemo maibé postu administrativu sira seluk balun ema na’in-12 no balun la to’o na’in-10.

Tipu ema ho difisiénsia sira hanesan ema ho defisiénsia fíziku mak hanesan ain, liman, defisiénsia psiko sosiál mak hanesan moras mentál, intelektuál ema ne’ebé difisil atu entende no tipu ema ho defisiénsia sensoriál mak hanesan matan, tilun no ibun.

Durante ne’e, RHTO fasilita ona ema ho difisiénsia hodi trata sira-nia dokumentu fasilita sira hetan apoiu hosi Governu, maibé ema ho difisiénsia 302 ne’e maioria labarik ho idade kiik ne’ebé seidauk iha kartaun eleitorál, entaun sira seidauk bele hetan subsídiu hosi Governu.

“Ami apoiu hodi trata sira-nia dokumentu hanesan kartaun eleitorál, Billete Identidade (BI) no atestadu médiku,” nia dehan.

Jornalista : Celestina Teles

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here