Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 24 maiu 2022 (TATOLI) – Komandu Polísia Nasionál Timor-Leste (PNTL) Munisípiu Bobonaro, la rejista kazu asidente no krime grave durante selebrasaun loron restaurasaun indepedénsia 20 maiu ba dala-XX.

Komandante PNTL Munisípiu Bobonaro, Superintendente Antoninho Mauluta, relata hahú hosi preparasaun to’o serimónia hasa’e bandeira nasionál iha duni joven balun halo provokasaun iha postu administrativu Cailaco no Maliana, maibé Polísia halo kedas atuasaun deitein iha sala detensaun komandu munisípiu.

Maibé hafoin festa ne’e remata komandu deside liberta fali joven hirak-ne’e ba fali sira-nia hela fatin hodi halo sira-nia aktvidade hanesan bainbain.

“Ita kazu akontese mak nune’e ona, maibé kona-bá kazu krime grave no asidente ita la rejista, só ita-nia tránzitu sira mak halo apreensaun ba motorizada balun, tanba laiha asesór no balu la uza kapaseste,” nia informa ba jornalista sira, iha kna’ar fatin, Maliana, tersa ne’e.

Mauluta observa katak, joven sira-nia konstribuisaun seguransa no partisipasaun iha eventu importante ne’e másimu tebes, liuliu joven sira iha kapitál Maliana, tanba hotu-hotu iha rasik vontade partisipa iha misa agrdesimentu ne’ebé realiza iha Igreja Parokia Maliana.

“Ha’u Hanoin katak ita-nia joven no komunidade sira komesa komprende ona saida maka 20 de maiu no signifikante loloos hasa’e bandeira ne’e saida, ita haree sira komprende ona, tanba serimónia hasa’e bandeira ne’e atu hatudu katak ita mós sente orgullu no valoriza ita-nia eroi sira-ne’ebé mate, fakar raan no ruin ba independénsia,” nia hateten.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here