Kargu xefia sira partisipa semináriu no asaun traballu ne'ebé partilla hosi MAE iha Vila Nova Baucau, tersa (24/05). Imajen Tatoli/Natalino Belo.

BAUCAU, 24 maiu 2022 (TATOLI) – Ministériu Administrasaun Estatal (MAE) sei sosializa dekretu-lei númeru 2/ 2017, loron 22 marsu kona-ba sistema jestaun rezídu sólidu urbana tanba rejime ne’e promulga dezde 2017 maibé to’o oras ne’e seidauk implementa.

Nune’e Ministériu Administrasaun Estatal tersa ne’e, hala’o semináriu no asaun traballu iha munisípiu Baucau kona-ba futuru implementasaun dekretu-lei ne’e.

Pezensa Ministériu Administrasaun Estatal iha Baucau ho objetivu fahe informasaun kona-ba dekretu-lei númeru 2/ 2017, loron 22 marsu kona-ba sistema jestaun rezídu sólidu urbana nune’e munisípiu, sosiedade no entidade sira bele hahú iha konsiénsia kontrola lixu tanba artigu 5 hosi dekretu-lei ne’e fó kompeténsia ba autoridade munisipál sira halo jestaun ba lixu.

“Ita sei sosializa, hodi prepara kondisaun sira atu iha tempu badak bele hahú ona jestaun iha munisípiu sira nune’e aplika dekretu lei refere,” Diretora Nasionál Organizasaun Urbana hosi MAE, Maria Gorete Marques Belo hateten iha Vila Nova.

Dekretu-lei ne’e inísia hosi Ministru Administrasaun Estatal Dionísio Babo Soares iha VI Konstitusionál no aprova iha Konsellu Ministru iha loron 20 dezembru 2016 iha tempu Primeiru Ministru Rui Maria de Araújo no promulga hosi Prezidente Repúblika Taur Matan Ruak, iha loron 15 marsu 2017.

Dekretu-lei públika ona iha Jornál Repúblika ne’e ho kapítulu hamutuk hitu no iha artigu hamutuk 57.

Preámbulu hosi Dekretu-Lei atu garante direitu hotu ho ambiente saudável nian, ekilibradu, promove asaun defeza meiu ambiente no dezenvolvimentu sustentável ba ekonomia.

Nune’e mós prosede elaborasaun regra ne’ebé klara hodi promove no asegura ijiene urbana no halo jestaun rezídu urbana, sein prejuízu ba dezenvolvimentu ekonómika.

Diretora Nasionál Organizasaun Urbana ne’e fundamenta, sistema jestaun sólidu urbana nian seidauk implementa tanba seidauk iha kondisaun entaun seidauk bele rekolla taxa no seidauk bele aplika multa ba entidade ne’ebé kontra ordenasaun.

Vantajen hosi aplikasaun dekretu lei refere sei hatudu ambiente ne’ebé moos, kontribui ba saúde ne’ebé saudável no bainhira implementa lei póder lokál no desentralizasaun administrativa munisípiu sira bele sai sidade saudável.

“Dekretu lei ne’e rasik hateten bainhira kontinua sunu, naklekar ka la soe iha fatin mak sei iha multa hosi valór osan $50 to’o $115,” Maria Belo akresenta.

Artigu 19 (Sistema jestaun rezídu) hosi Dekretu-Lei ne’e engloba ba parte hitu hanesan akondisionamentu, despozisaun ka soe lixu, rekolla, valorizasaun, transporte, tratamentu no eliminasaun ka halakon lixu ne’ebé mak sei implementa dala-ida ka bele fazeadamente tuir kondisaun finanseiru, rekursu umanu administrasaun munisipál nian.

Ditetór Servisu Edukasaun Munisípiu Baucau, Augosto Ornai, hateten seminariu ne’e importante tanba sistema jestaun lixu iha sidade maibé sente hakfodak tanba dekretu lei númeru 2/2017 promulga ona maibé foin dahuluk sosializa.

“Polítiku sira iha vontade prodús rejime jurídiku sira liga ho lixu maibé tinan-lima tiha mak rona lei ne’e iha ona, entaun ita só prodús de’it lei maibé laiha asaun konkreta,” nia kestiona.

Nia fó hanoin ba parte ezekutivu katak, atu rezolve problema lixu mak presiza iha vontade polítika sériu atu implementa rejime ne’e no presiza asaun konkreta liuliu koordenasaun entre liña ministeriál sira.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here