Bebé ida simu vasina polio husi pesoál saúde sira iha Sentru Saúde Formosa. Imajen Tatoli/Antonio Dasiparu

DILI, 24 maiu 2022 (TATOLI)— Tuir dadus estatístika Hospitál Nasionál Guido Valadares (HNGV), hahú hosi fulan-janeiru too abríl, rejista bebé na’in-1.774 mak moris ho kondisaun normal no mate na’in-32 tanba kauza no inan-sira la kontrola-an iha sentru saúde sira.

“Totál bebé moris hosi janeiru too abríl hamutuk 1.774, bebé ne’ebé mak moris ho kidan mak uluk hamutuk 51, bebé  ne’ebé mate hamutuk 32 no inan ne’ebé mate hamutuk na’in-haat,” Xefe Gabiente Kontrolu Kualidade  Hopsitál Nasionál Guido Valadares (HNGV), Sara Maria Xavier, hateten ba jornalista sira iha nia knaar fatin HNGV-Bidau, tersa ne’e.

Hahú janeiru too abríl totál inan-isin rua ne’ebé baixa iha maternidade HNGV hamutuk 1.677, inan-isin rua ne’ebé partu normál hamutuk 1.209, inan-isin rua ne’ebé partu liuhusi sesariana hamutuk 396 no inan sira ne’ebé mak partu liuhusi ventoza ka instrumentál  hamutuk 109.

Nia dehan bebé sira mate ne’e tanba kauza husi  komplikasaun ka infensaun  ne’ebé inan sira hetan bainhira isin rua la kontrola iha sentru saúde sira ne’ebé mak besik  hodi halo kuidadu ante natal  entaun bele kauza ba bebé mate iha inan nia kabun laran.

“Ita husu ba inan -sira bainhira atu partu bele hakbesik ba  sentru saúde hodi konsulta no partu tanba la kontrola bele hamosu komplikasaun hodi afeta ba bebé no nia-inan nia vida,” nia sujere.

Nia mós husu ba inan sira tenke  hetan edukasaun saúde  kona-ba oinsá atu sura movimentu  bebé durante oras 24 liuliu  bainhira  inan isin-rua tama  fulan ualu ba leten.

“Bebé  movimentu  mínimu dala 12 la inklui ho nia toba kalan, bainhira menus  frekuénsia signifika  iha buat ruma ne’ebé mak ladun di’ak ba   bebé entaun ida ne’e fó sinal perigu ida ba inan para ba  sentru saúde atu hetan asisténsia lalais hodi bele  tulun bebé ne’e labele mate iha kabun laran,” nia rekomenda.

Atu bele prevene mortalidade bebé  iha inan nia kabun ne’e presiza han hahán  nutrisaun  ne’ebé mak adekuadu  no inan presiza  hahán  ne’ebé nutrisaun  hanesan modo tahan sira  ne’ebé riku ho vitamina  no nutrisaun di’ak durante dezenvolvimentu   bebé iha inan nia kabun.

Notísia relevante:  2020, Bebé 5.633 moris iha HNGV, na’in 94 mate 

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here