Líder nasionál Xanana Gusmão partisipa serimónia investidura ba Prezidente Repúblika períodu 2022-2027, José Ramos Horta, ne’ebé hala’o iha 19 maiu kalan iha tasi-Tolu, Dili. Imajen/Espesiál.

DILI, 24 maiu 2022 (TATOLI)—Deputadu bankada Fretilin, Dario Madeira, husu ba Governu liuhosi komisaun organizadora atu esklarese ba públiku tanbasá lidér nasionál, Xanana Gusmão, ne’ebé ba partisipa serimónia investidura PR iha Tasi-Tolu ne’e, tuur no hateke hosi dook de’it.

“Ita-nia serimónia toma pose ba Prezidente Repúblika  foun, ha’u rasik preokupa hanesan Kayrala Xanana Gusmão sira fó konvite ka lae, públiku kestiona no ida-ne’e mós mídia sosiál rame loos ho ida-ne’e. Líder nasionál ida hanesan ne’e fó konvite ka lae no kuandu serimónia la’o nia ba de’it iha tuur kahor ho povu sira iha iha liur. Ha’u rasik preokupa no husu duni Prezidente Komisaun organizadora ho Komisaun organizadora atu esklarese ba públiku ba serimónia ne’e hodi bele hatene,” Deputadu bankada Fretilin ne’e levanta iha plenária Parlamentu Nasionál, tersa ne’e.

Nia hateten, se komisaun organizadora mak la fó konvite entaun ida-ne’e sala bo’ot ida no presiza investiga tanbasá la fó ba lidér nasionál atu partisipa iha serimónia investidura Prezidente Repúblika períodu 2022-2027 iha Tasi-Tolu, Dili.

“Lidér nasionál boot hanesan Xanana mak ita la konvida nia ba akompaña hosi liur de’it, ida-ne’e halo moe Estadu no veteranu sira-nia oin. Ha’u husu komisaun organizadora tenke esplika responsabilidade ida-ne’e,” nia dehan.

Nune’e mós, Deputadu Partidu Demokrátiku (PD), Adriano do Nacimento, lamenta lidér nasionál Xanana Gusmão ne’ebé la hetan konvite mak dala ruma nia ba tuir serimónia pose ne’e iha li’ur de’it.

Nia hateten, preokupasaun seluk mós hato’o hosi eis Primeiru-Ministru, Estanislau Aleixo da Silva iha nia rede sosiál (facebook).

“Preokupasaun seluk mós hanesan eis Primeiru-Ministru, Estanislau Aleixo da Silva nia hakerek iha nia Facebook dehan buletin ne’ebé ha’u bele sosa tuir serimónia ne’e. Hanoin ida-ne’e ladún di’ak tanba nia hanesan eis Primeiru-Ministru no lidér ida mós ita hotu hatene. Nune’e, Governu aban-bainrua bele haree didi’ak ida-ne’e fó konvite. Se sira la mai kestaun seluk, tan ne’e presiza dignifika ita-nia veteranu no lidér sira,” nia hateten.

Ba preokupasaun ne’e, Governu liuhosi Sekretáriu Estadu Komunikasaun Sosiál (SEKOMS), Mericio Juvinal Akara, hateten komisaun organizadora hato’o hotu konvite ba lidér nasionál no eis titulár órgaun soberania sira inklui ba Xanana Gusmão no eis Primeiru-Ministru, Estanislau Aleixo.

“Ha’u foin iha komunikasaun ho Komisaun organizadora liuhosi Vise Ministru Estatál hateten, komisaun organizadora fó hotu ba líder nasionál Xanana Gusmão no eis Primeiru-Ministru, Estanislau Aleixo da Silva,” nia dehan.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

1 KOMENTÁRIU

  1. Hau sinti katak maun bot Xanana ba tiru mano pombo iha Turliu, fila fali mai, tempu lahia ato tau kazaku, nune maun nee afuu deit!

HAKEREK NO HATÁN

Please enter your comment!
Please enter your name here