Diretór ONG CECEO, Juvinal Faria. Imajen Tatoli/Abílio Elo Nini.

OÉ-CUSSE, 24 maiu 2022 (TATOLI) – Organizasaun Naun Governamentál (ONG) iha Rejiaun Administrativa Espesiál Oé-Cusse Ambeno (RAEOA), husu Governu Sentrál tenke iha vontade polítika aselera implementasaun lei podér lokál no desentralizasaun administrativu nune’e desentraliza podér ba baze.

Diretór ONG Sentru Edukasaun Sívika Enklave Oé-Cusse (CECEO, sigla portugés), Juvinal Faria, esplika podér lokál ne’e kapaas tebes no espera bele implementa ona iha 13 munisípiu, tanba fó kompetensia Governu lokál atu halo nia kna’ar rasik.

Tanba lei númeru 23/2021, loron 10 novembru kona-ba podér lokál no desentralizasaun administrativa no lei númeru 22/2021, loron 4 novembru kona-ba lei eleitorál munisipál promulga ona hosi Prezidente Repúblika, tanba lei ne’e fó podér tomak ba munisípiu atu dezenvolve rasik poténsia sira iha munisípiu.

Konstituisaun Repúblika Demokrátika Timor-Leste prevee organizasaun Administrasaun Públika ne’ebé obedese ba prinsípiu desentralizasaun administrativa. Objetivu hosi lei ne’e atu estabelese organizasaun, kompozisaun no kompeténsia órgaun Podér Lokál, inklui kuadru jurídiku desentralizasaun administrativa Estadu nian. Órgaun ne’ebé atu implementa lei ne’e kompostu hosi Asembleia Munisipál, Prezidente Munisípiu no Vise-Prezidente Munisípiu.

Tanba lei ne’e desentraliza podér tomak ba munisípiu no lei eleitorál munisipál ne’e sei iha parlamentu lokál rasik, prezidente autoridade rasik, mak sei jere administrativamente, maibé rekursu umanu no rekursu finanseira tenke garantia.

“Ami haree, kuandu implementasaun lei tolu-ne’e sei rezolve preokupasaun komunidade kona-ba estrada, ponte, bee-moos nian, tanba ita kompara agora konsentra liu iha nasionál, maibé kuandu fó ona kna’ar ba Governu lokál uza-nia podér jere rasik, ha’u hanoin sei responde direita komunidade sira-nia nesesidade dezenvolve poténsia ne’ebé maka munisípiu iha, maibé Governu Sentrál tenke iha vontade polítika aselera” Diretór ONG CECEO, Juvinal Faria, informa ba Agência Tatoli iha Oé-Cusse, tersa ne’e.

Governu no Parlamentu Nasionál aprova lei podér lokál no desentralizasaun administrativa tanba Konstituisaun RDTL artigu 5 (Desentralizasaun) hateten Estadu respeita, iha nia organizasaun rai-laran nian, kona-ba prinsípiu atu fahe kbiit Administrasaun Públika nian.

Nune’e mós artigu 72 (Podér lokál) hosi Konstituisaun RDTL dehan, sei harii kbiit lokál ho ema ne’ebé koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak nian kona-ba solusaun problema rasik iha sira-nia komunidade no atu promove dezenvolvimentu lokál, no la afeta partisipasaun Estadu nian.

Diretór ONG CECEO ne’e informa, maske Governu no Parlamentu Nasionál aprova lei finansa munisipál maibé kumpre ona konstituisaun hodi prodús ona lei podér lokál no desentralizasaun administrativa, entaun ema hotu hein implementa lei ne’e.

Nia argumenta, Konstituisaun mak obriga tenke iha podér lokál entaun governasaun ho modelu saida de’it tenke kumpre hodi kumprimenta.

Nia espera molok estabelese podér lokál no dezentralizasaun administrativa, Governu presiza kria kritéria ida forte ba kandidatu ne’ebé asumi pasta hanesan jestór munisípiu.

“Ami haree kualkér ema se-de’it, bele sai prezidente iha podér lokál no dezentralizasaun administrativa ne’e, nu’udar jestór ba munisípiu, maibé Governu mós tenke kria kritéria ida, ba sidadaun ne’ebé atu dirije munisípiu, tenke tau ema-ne’ebé kualidade no profisionál,” nia nia fó hanoin.

Tuir nia, importante ema-ne’e iha esperiénsia, hanesan eis membru Governu iha períodu ida, kapasidade, laiha krime korupsaun, akumulativu ba igreja, autoridade komunitáriu, partidu polítiku, veteranu, no seluk tan, atu garante funsionamentu podér lokál no desentralizasaun nia progresu, nune’e ema-ne’ebé lidera munisípiu ne’e bele iha rezultadu ba dezenvolvimentu.

Nia subliña, atu garantia munisípiu ba susesu iha implementasaun lei tolu ne’e, primeiru tenke iha rekursu umanu ho kapsidade, kuandu ida-ne’e sufisiente entaun tenke iha planeamentu klara, atu lori munsípiu ne’e ba dame, pas no moris hakmatek.

Nune’e mós promove diálogu beibeik ho parte hotu, atu rona opiniaun hosi públiku sai hanesan matéria ba polítika saida de’it maka integra iha munisípiu ne’e, entaun bainhira iha planu ona entaun persiza jestór di’ak ho sistema ne’ebé hakarak adota iha munisípiu ne’e, no ikusliu maka fonte finanseira.

“Ha’u hanoin, finanseira ne’e maka xave dezenvolvimentu, kuandu iha ona kapasidade, iha ona planu maibé finanseira laiha, buat hotu-hotu labale la’o, entaun persiza orsamentu atu atinje objetivu ne’ebé maka munisípiu ne’e mehi,” nia katak.

Nia argumenta, lei rua ne’e sei presiza tán lei finansa munisipál nune’e funsionamentu bele la’o di’akliu.

Nia fó ezemplu, munisípiu bele estabelese podér lokál, desentralizasaun administrativa maibé lei finansa munisipál laiha entaun ne’e mós dezafiu ida tanba podér ne’e desentraliza ona entaun osan mós tenke iha.

“Ami rekomenda, lei ne’e importante, molok atu implementa podér lokál, dezentralizasaun no administrativa, lei ne’e tenke iha ona nune’e bele hakman podér lokál iha nivél munisípiu sira,” nia sujere.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here