Diretór Jerál Indstrústria MTKI, Carlos Ximenes. Imajen/Espesiál

DILI, 24 maiu 2022 (TATOLI)—Ministériu Turizmu Komérsiu no Indústria (MTKI) liuhosi Diresaun Jerál Indústria, hamutuk ho empreza Haberan Unipesoal Lda, fó sai rezultadu estudu viabilidade ba parke industria iha suku Ulmera no Vatuvou, postu administrativu Bazartete, munisípiu Liquiçá, ne’ebé atinje ona 60%. 

Diretór Jerál Indstrústria MTKI, Carlos Ximenes, hateten, hafoin Governu asina akordu ho empreza iha fulan-rua liubá, sira hahú halo estudu viabilidade, ho kolesaun dadus sekundáriu no primáriu.

“Liuhosi estudu viabilidade ne’e empreza sente avansa liu tanba fulan-rua sira atinje ona 60%. Entre fatin Vatuvou no Ulmera tenke hili ida nu’udar alternativu, ikus atu sai hanesan parke industriál, nune’e ohin konkluzaun hatudu katak Ulmera sai potensiál atu sai parke industriál ba faze dahuluk. Ba longu prazu, fatin rua ne’e viável hotu ba parke indústriál, maibé Ulmera iha potensialidade liu tanba besik liu ba Portu Baía Tibar ne’ebé agora atu finaliza ona,” Diretór Jerál informa iha Sentru Konvesaun Dili (CCD, sigla portugés), tersa ne’e.

Notísia relevante: MTKI kontrata kompañia Haberan inisia estudu viabilidade ba parke industriál Ulmera

Nune’e, MTKI sei hein relatóriu hodi bele kompleta iha tempu fulan-rua nia-laran bele finaliza hanesan dokumentu finál ida.

“Dadus primária seidauk kompleta tanba iha terrenu ekipa téknika hosi empreza hasoru difikuldade oituan, konsultór sei buka meiu atu finaliza,” nia akresenta.

Estudu viabilidade ne’e empreza Haberan halo hamutuk ho Institutu Teknolojia Surabaya, iha Indonézia no agora hela dadus primária mak seidauk konklui. Agora hela fulan-rua empreza atu kompleta dadus, ne’ebé bainhira kompleta ona rezultadu mak sei aprezenta iha Konsellu Ministru hodi hetan apresiasaun, hafoin loke konkursu hodi halo kontrusaun infraestrutura.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here